Katuaq ukiualunni unammillernartumik inissisimareerluni millionilikkaanik sinneqartooruteqartoq

Atuaruk aamma

Katuaq 2023-mi amigartooruteqarpoq

Katuaq ukiuni kingullerni marlunni aningaasaqarnikkut ilungersunartorsioreerluni maanna illorraap tungaanut saqippoq. Sinneqartoorutit 4 millionit koruuniusut 2025-mut naatsorsuutit takutippaat.

Katuaq tusagassiutitigut nalunaarummi taama allappoq.

Katuap aningaasaqarnikkut erloqinartorsiornera 2023-mi eqqartuussivimmi ajorsarnermi kingorna aallartippoq, tamannalu 2023-mi 2024-milu immikkut ittumik annertuumik aningaasartuuteqartitsillunilu amigartooruteqarfiungaarpoq. 2025 tassaasimavoq Katuami immikkoortoqarfinni tamani aningaasaqarnikkut makisitseqqinniarluni ilungersorfik, missingersuutinik malitsitiniaqqissaarfik sipaarniuteqarnerlu.

Immikkoortoqarfiit tamarmik aningaasaqarnikkut makititseqqinniarnermi suleqataasimapput. Ilaatigut sulianut atatillugu angalanerit pikkorisartitsisarnerillu annikillisinneqarujussuarsimapput, kulturillu illorsuani nuukiit aningaasallu suliassanut pingaarnernuinnaq atorneqarsimallutik.

Aningaasaqarnikkut makisitseqqinniarnermi Naalakkersuisut aamma Kommuneqarfik Sermersooq tamarmik immikkut ittumik 2 mio. kr-inik tapiissuteqarsimapput.

- Katuap nammineq aningaasaataasa pigeqqilernissaannut Erhverstyrelsip piffissaliussaa sioqquterujussuarlugu pimmat tulluusimarutissavortaaq, ilutigalugumi kulturikkut qaffassisumik ingerlatsinerput attatiinnarsimasinnaasimagatsigu. Tamatuma takutippaa, sulisut, pisortat, siulersuisut, suleqativullu avataaniittut, siunertamut aalajangersimasumut siunnerfeqarluta immitsinnut ikioqatigiikkutta angusarisinnaasavut annertoorujussusut, siulersuisuni siulittaasoq Juaaka Lyberth oqarpoq.

Nunatta Isiginnaartitsisarfia suleqatigalugu alliliineq

Suleqatigiilluarsimaneq angusarissaarnermut peqqutaanerpaavoq, pisortaq Ivaaq

Kriegel oqarpoq.

- 2025 piumasaqaateqarfiusimaqaaq, suliffitsinnili ataatsimoorluta

kivitseqatigiissimavugut. Sulisut tamaasa qutsavigivakka aamma Siulersuisut,

tunniusimalluarlutik akisussaassuseqarlutillu suleqataasimanerinut. Suleqataalluarnerat aalajangiisuusimavoq maanna Katuap aningaasatigut patajaattumik siunissamut isigaluni toqqammaveqalerneranut.

Katuaq 1997-imi sananeqarmalli taamaassimasoq inuiaqatigiinnut malinnaallutik ineriartortuassasoq siulersuisut aningaasaateqarnimillu pilersitsisut kissaatigaat.

Suleqatigiissitassap ad hoc udvalgip, siorna pilersinneqarnissaa isumaqatigiissutaasup sulinissani aallartissagaa ukiumoortumik ataatsimiinnermi isumaqatigiissutigineqarpoq.

Kommissoria maanna isumaqatigiissutigineqarsimalermat Katuap allilerneqarnissaanut siunnersuusiornissaq, matumanissaaq Nunatta Isiginnaartitsisarfiata inissaaleqinerata aaqqiiffigineqarnissaanik imaqartussaq ataatsimiititaliap suliassaasa ilagissavaat.

Ataatsimiititaliap isumaliutissiissutissani 2026-p naalernerani saqqummiutissavaa.