Kina USA-mut kaammattuivoq ikiaroornartulerisutut pasineqartoq Maduro piaarnerpaamik iperagaassasoq
Venezuelap præsidentia nuliaalu tusagassiorfiit arlallit naapertorlugit New Yorkimi oqartussaasut tigummivaat.
Kina aamma Venezuela qanittumik ikinngutigiillutillu iligiipput, taamatullu Venezuelas præsidentia, Nicolás Maduro, ilaatigut Kinap præsidentia, Xi Jinping, naapinnikuupput Beijingimi 2023-mi Madurop tikeraarnerani. Madurop iperagaanissaa Kinap maanna piumasaraa.
Foto (arkiv): Miraflores Palace/Reuters
Kina nunanut allanut ministeriaqarfianit piumasarineqarpoq amerikamiut piaarnerpaamik venezuelap præsidentia, Nicolás Maduro, nuliaalu iperagaassasut.
Nutaarsiassaqartitsivik AFP naapertorlugu Ministeriaqarfik tusagassiorfinnut taamak allappoq.
- Kina kaammattuuteqarpoq Nicolás Madurop nuliaalu inuttut isumannaatsuunissaat USA-p qulakkiissagaa, taamatuttaaq piumasaqarpoq aappariit piaarnerpaamik iperassasut, kiisalu Venezuelap naalakkersuisuisa uppitinniarneqarnerat USA-p unitsissagaa kaammattuutigineqarpoq, ministeriaqarfik allappoq.
Nalunaarut saqqummiunneqarpoq Maduro nulialu Venezuelami ippassaq amerikamiut immikkut ittumik sakkutuuisa tigusarineqarinninnerisa nunaannillu qimagutsitsinerisa kingorna.
Amerikamiut tusagassiorfii arlallit naapertorlugit Maduro sapaammi New Yorkimiippoq, ilaatigut ikiaroornartulerisutut kokainimillu eqqussiniarnermik isumaqatigiissuteqarsimasutut unnerluutigineqarluni.
Kina venezuelalu qanittumik suleqatigiipput, Kinallu nunanut allanut ministeriaqarfia erseqqissaavoq amerikamiut venezuelami iliuusaat assuarigitsik.
Præsidentip nuliatalu tigusarineqarnerisa saniatigut Caracasimi aammalu nunap immikkoortuini La Guaira, Miranda Araguamilu naalagaaffinni saassussinernik arlalinnik malitseqarpoq.
- Amerikamiut iliuuserisimasaat nunat tamalaat inatsisaannik, nunat tamalaat akornanni attaveqarnermi ileqqorissaarnermut tunngaviusunik kiisalu FN-ip isumaqatigiissutaanut siunertanut tunngavinnullu ersarissumik unioqqutitsineruvoq, Kinami nunanut allanut ministeriaqarfik allappoq.
Aterminik taasinngitsoq Venezuelami nunap aqutsisoqarfiani atorfilittaq New York Timesimut oqaluttuarpoq, USA-p saassussinerani inuit minnerpaamik 40-t toqutaasimasut. Taakkunannga ilaapput venezuelamiut innuttaasut sakkutuullu.
USA-p oqarnera naapertorlugu toqutaasimasut amerikamiutaqanngillat.
Madurop arfininngornermi tigusarineqarnerata kingorna , Venezuela-p eqqartuussiviata qullersaata aalajangerpaa præsidentip tullersortaa Delcy Rodriguez præsidentitut atuutilerallartinneqassasoq.
Tamanna sioqqullugu USA-p præsidentia, Donald Trump, tusagassiortunik katersortitsinermi oqarpoq USA Rodriguezimik attaveqarsimasoq, taannalu "piareersimasoq suliassatsinnik pingaarutilinnik suliarinninnissamut, Venezuela angusaqarluarnerulersinniarlugu".
Taamaattorli aamma Trumpip oqaatigaa USA-p qulakkeerniaraa Venezuelami aqutsisunik taarsiisoqarnissaa.
Nuna 2013-imiilli saamerliusumit Maduromit aqunneqarpoq, taannalu sioqqullugu partiiqatigisaa Hugo Chávez aqutsisuuvoq.
