Kinamiut umiarsuaatileqatigiiffiat Issittoq aqqusaarlugu umiarsuarnik ataavartumik angalanissamut aqqutissiuussivoq

Umiarsuaatileqatigiiffik Kinamiunit pigineqartoq umiarsuit aqqutannik nutaamik pilersitsivoq, siunissami containerit Europamut assartorneqartartut Avannaata Kangiatigut umiartorneqartalissapput.

Umiarsuaq containerinik assartuut Sea Legend-imeersoq, Kinamiit Europamut Avannaata Kangia aqqutigalugu oktobarimi 2025-mi angalavoq. Nutaarsiassaqartitsiviit arlallit naapertorlugit, umiarsuaatileqatigiiffik aalajangersimasumik aqqummik maanna pilersitsivoq.

Assi: Andrzej Jackowski/EPA/Ritzau Scanpix

Thomas Munk Veirum Thomas Munk Veirum Tusagassiortoq

Saqqummersinneqarpoq 11. Aggusti 2026 - 14:32

Berlingske naapertorlugu Financial Times allappoq, Kinamiut suliffeqarfiutaat Issittoq aqqusaarlugu umiarsuakkut angalasarnermik sapaatip-akunnerani matumani aqqummik nutaamik ammaavoq.

Umiarsuaatileqatigiiffik Sea Legend umiarsuaatileqatigiiffiullu umiarsuaatai atorlugit Avannaata Kangia aqqutigalugu angalassaaq, angalanerullu ilaa Ruslandip avannaata sineriaa sinerlugu ingerlassalluni.

Umiarsuaatileqatigiiffiup nunarsuup kissatsikkiartornera aamma umiarsuarnut assartuutinut nunani allani politikki allanngorartoq pissutigalugit, aqqut taanna atorpaa.

Ussassaarut

Aviisi Financial Times naapertorlugu Kinamiut umiarsuaat Europamut assartuisut avannaata kangiatigut ingerlaarnermikkut, angalanerat ullunik 40-nit 20-nut appartinneqarsinnaavoq.

- Taamaasilluni angalaneq akikinnerulissaaq, suliffeqarfiillu allaat »nunarsuarmi politikkimut tunngasut akerleriissuteqarfiillu tamaasa« avaqqutaarisinnaavai, Ruhal Khanna, sillimmasiisarfimmi Allianz-imi nunarsuaq tamakkerlugu umiarsuartigut navianartorsiortitsinernut siunnersuisartumi pisortaasoq, Financial Times-imut oqarpoq.