Kingumut qiviarfissanngorpoq, pissutsinullu nutaanut ikaarsaarfissanngorluni

JUULLI QALLIARTORPOQ.

Atuagagdliutini Grønlandspostenimilu 1940-kkunni juullimut aviisini saqqummersartuni allaaserinnittarnerit assigalugit tarrajussinerani unikaallalaarnissaq, juullillu tipaatsunnartuata misiginissaa pisariaqartilersarparput.

Taamani oqaatsit amerlasuut atorneqarneq ajorput, qanilaarnermilli imaqartarput: inuulluaqqusinerit, ulluinnarni pisut pillugit allaaserisat, ukiuuneranilu nipaalleruttorfiani ataatsimoornissamik eqqaasitsissutit.

ULLUMIKKUT — ukiut 80-it qaangiuttut — ileqquusoq taanna suli attapparput: juulli ataatsimoorfiuvoq. Piffissaq inuulluaqqusiffiusoq eqqaasitsissutigisarlugulu qaamarnup mikisup taartumi pingaaruteqassusaa.

UKIORLI manna aamma immikkut ittuuvoq. AG-p juullimut aviisia naqitatut atuartartunut annguteqqaarneraniit, AG-p juullimut aviisia naqitaq kingulleq saqqummerpoq. Eqqarsaat eqqumiippoq. Pissutsit allanngornerat malinnaaffigaagut. Siunissamut digitaliunerusumut ingerlavugut, oqaluttuat allaanerusumik suliarineqartalernissaannut, atuartartullu aviisinik atuarnatik qarasaasiakkut atuartalernissaannut. Ukiortaamiillu AG Sermitsiarlu kattullugit naqitatut saqqummertalereernerata kingorna, aappaagu decembarimi juullimut aviisi saqqummertussaq qularnanngitsumik Sermitsiap AG-llu ataatsimoorutissagunavippaat.

ILEQQUTOQQANIK unitsitsisoqalinngilaq - ilusaaliuna allanngulersoq. Juulli pillugu oqaluttuat suli attanneqassapput. Allaaserisassavagut, katersortassavagut saqqummiuttassallugillu. Tusagassioriaaserli nutaaliorfiusinnaasoq aqqutigalugu.

ALLANNGUILERFIUP nalaani ima oqarusuppugut: Qujanaq.

AG-p juullimut aviisia ukiorpassuarni angerlarsimaffissinniitittarneranut, igaffimmi nerrivimmi juullillu unnukkuani eqqissisimaarfimmi atuartarsimagassiuk qujanaq. Aviisi decembarip qaammataanni atuartarsimaneranut, avitseqatigiissutigisarsimaneranut, toqqoqqasarsimaneranut atortarsimaneranullu qujanaq.

Piffissaq nutaaq aggersoq aamma taama pitigu. 1940-kkunni juullimut inuulluaqqusinerit siulliit eqqaallugit: qanilaartumik, ataatsimoorfiusumik ullullu qaammariartulernissaannut neriuuteqarfigalugit.

JUULLIMI PILLUARITSI ukiortaarsiorluarisilu.