Nunatta karsia 2025-mi tatineqaqaaq. Tamanna missingersuutinut takussutissami nutaami, Naalakkersuisut sapaatip-akunnerani kingullermi ataatsimiinnerminni tusaatissatut tigusaanni, uppernarsarneqaqqippoq.
Takussutissami 386 millionit koruuninik amigartooruteqarnissaq naatsorsuutigineqartoq atuarneqarsinnaavoq. Missingersuutigineqaqqaaraluartuniit amigartooruteqartoqarnerussaaq, tassa 121 mio. koruunit missingiutigineqaqqaarnikuugaluaramik.
Nunatta karsia 2025-mi tatineqaqaaq. Tamanna missingersuutinut takussutissami nutaami, Naalakkersuisut sapaatip-akunnerani kingullermi ataatsimiinnerminni tusaatissatut tigusaanni, uppernarsarneqaqqippoq.
Takussutissami 386 millionit koruuninik amigartooruteqarnissaq naatsorsuutigineqartoq atuarneqarsinnaavoq. Missingersuutigineqaqqaaraluartuniit amigartooruteqartoqarnerussaaq, tassa 121 mio. koruunit missingiutigineqaqqaarnikuugaluaramik.
Kisitsisilli allanngoratarsinnaanerat naalakkersuisoqarfiup eqqumaffigeqquaa.
Nunatta karsiata annertuumik unammilligassaqarnera juunimi missingersuutinik saqqummiussinermi ilisimaneqareerpoq. Amigartoorutit 347 mio. koruuniunissaat naalakkersuisoqarfimmit juunimi naatsorsuutigineqarpoq, kisitsisillu taakkua 386 mio. koruuninut tassa massakkut amerlipput.
Isertitaqarnerusoqartoq - isertitakiffiunerilli amerlanerusut
Aningaasaqarnermut missingersuusiornermut takussutissiaq ilaatigut pissutaasut arlallit taavai, sooq ajornerulersimanersoq:
- Eqqussuinermut akitsuutit 91 mio. kr.-nik ikinnerusut.
- Nuna tamakkerlugu akileraarummit isertitat 49 mio. kr.-nik ikinnerusut.
- EU-mik peqatigiinnissamik isumaqatigiissummik isertitat 46 mio. kr.-nik ikinnerusut.
- Pisortanit utoqqalinersiutinit 61 mio. kr.-nik aningaasartuuteqarneruneq.
Aamma isertitaqarnerusoqarpoq, kisianni amigartoorutinut iluaqutaanissaannut naammannatik. Isertitaqarfiunerusut naalakkersuisoqarfimmit uku eqqaaneqarput:
- Soraarnerussutisianut akileraarutinit 121 mio. kr.-inik isertitaqarneruneq.
- Isertitanit allanit 6 mio. kr.
Peqqinnissaqarfik atuinerulersimavoq, kisianni 66 mio. kr. allanit kontonit nuunneqarnerisigut amigartooruteqarnissaq 1,5 mio. kr.-inut apparneqarput.
Namminersorlutik Oqartussat akiliisinnaassusikinnerujussuusut
Aningaasaqarnermut Akileraartarnermullu Naalakkersuisoqarfiup nunatta karsiata imai aamma takussutissiorpai, tassanilu siusinnerusukkut naatsorsorneqartuniit ikinnerujussuunerat paasinarsivoq:
- Akiliisinnaassuseqarneq Namminersorlutik Oqartussat qaammatini kingullerni aqqaneq-marlunni, qaammatit naaneri tamaasa 54,5 mio. kr. aamma 737 mio. kr.-t akornanniissimapput.
Ukiut kingulliit ataatsimut isigissagaanni akiliisinnaassuseqarnerup ukiup siulianut sanilliullugu appasinnerusimavoq, tassa oktobar 2023-mi septembar 2024-llu akornanni akiliisinnaassuseq 675 mio. kr.-nit 1.208 mio. kr.-nillu akornanniissimammat.
Namminersorlutik Oqartussat septembarip naanerani 54 millionit koruuninik atuisinnaasimapput, 2024-milu piffissami tamatumani 675 million koruuninik atugaqarsinnaasimallutik. Takussutissiami takuneqarsinnaapput.
Naalakkersuisut nunatta karsiata aningaasartuutai upernaarli misissoqqissaalerpaat, tassa ajoqutaasinnaasut annikillisinniarlugit sipaarfiusinnaasunik ujaasillutik. Aningaasaqarnermut Naalakkersuisoq Múte B. Egede (IA) ukioq manna siusinnerusukkut apersorneqarnermini oqarpoq.
