Kommunalbestyrelsip aqquserniorsimaneq isumaqatigiinngissutigigaa: Malitassat malinneqarsimanersut misissuisoqassasoq

Avannaata Kommuniani qinikkat amerlanerussutillit, Naleqqameersut Siumumeersullu, Ilulissani akunnittarfimmik nutaamik sanaartornissaq kommunalbestyrelsip septembarip 25-ani ataatsimiinnerani akueraat. Taamaattumik Ilulissat Invest ApS, akunnittarfimmik "Hotel Anchor Bay"-mik taasaminik sanaartornissamut akuerineqarpoq. 

Qinnuteqaatip taassuma inaarutaasumik qinikkanit suliarineqarnerani akunnittarfissap tungaanut aqqusinermik sanaartorsimaneq, Atassutip Demokraatillu apeqquserpaat. Atassutip siulittaasuata paasinninnera naapertorlugu inatsimmik uniuisoqarsimasinnaavoq.  

AAMMA ATUARUK:

Ilulissani nutaamik akunnittarfiliortoqarnissaa akuerineqartoq

- Aqqusineq Hotel Anchor Bay eqqarsaatigalugu suliarineqarnikuusoq, kommunip pilersaarutaanut ilaanngilaq, tassa imaappoq maanna akuersigutta maannakkuminngaannit uanga silatinni quiliorsinnaalissuunga eqqissillunga naammassereerukkulu qinnutigiinnartussanngorlugu akuerineqarnissaa neriuutigalugu? Taamannak apererusuppunga kommunalbestyrelsimut tamarmut. Tassa inatsisit unioqqutillugit taammannak suliaqarniartalersimanerpugut? Aqqalu C. Jerimiassen ataatsimiinnermi oqarpoq.

Aqqusineq pineqartoq maanna naammassineqareerpoq. Tassa Ilulissat Invest ApS-imi piginnittup aappaata, Flemming Bisgaardip, aqqusiniliornissaq siunertaralugu nunaminertamik qinnuteqaataa, Avannaata Kommuniani nunaminertalerisunit siorna oktobarip 20-ani akuerineqarluni atuuttussanngortinneqarsiamasoq, nunagis.gl-imi takuneqarsinnaavoq.

Borgmesteri: Teknikkimut ingerlatsivik tatigilluinnarpara

Avannaata Kommuniani borgmesterip, aqquserniorsimaneq pillugu uparuaat illuatungilerpaa. Taassuma aqquserniornissamut akuersissummik tunniussisut, tassa teknikkimut ingerlatsivimmi sulisut, sulinerminni qaffasittumik ilisimasaqarnerarlugit nersualaariarlugit ima oqarpoq.

- Uanga nammineerlunga toqqissisimaffigilluinnarpara teknikkeqarfiup ingerlatsinera taamaammallu suliat ingerlanneqarsimanerat apeqqusersinnaanagu, Lars Erik Gabrielsen (S), kommunalbestyrelsimut oqarpoq.  

Demokraatit: Suliaq tiktokkikkut paasivarput

Atassut aqqusernup suliarineqarsimanerata ingerlaneranut apeqqusiisutuaanngilaq. Demokraatineersoq, Heidi Møller, aqquserniornerup aallartinnerani qinikkatut ilisimasaqarsimanatik oqarpoq. Suliamillu ilisimasaqalernera qinikkat ataatsimiinneranni pinngilaq.

- Qinikkat uagut ilisimanikuunngilarput aqqusineq suliarineqarmat, kisianni aatsaat taamanikkut paasivarput borgmesteri tiktokkikkut ikkussimmat, ilaatigut uparuaalluni demokraatinut, qalipaatinut aalajangersimasunut illersuisut ajortisaarisuunerarlugit.

- Taamaattumik tupinnanngilaq naammangittaalliortoqarmat. Suliap ersarissumik ingerlasimannginnera taanna pissutaaqataasorujussuuvoq, Heidi Møller oqarpoq.

Atassut: Ilivitoqqammi?

Atassutip aqquserniornermi suliap ingerlanera kisiat isorinngilaa. Partiimmi siulittaasuata oqarnera naapertorlugu sumiiffik aqquserniorfigineqartoq inuit toqunikut timaannik peqarpoq.

- Sanaatorfigineqartoq ilivitoqqanik arlariinnik peqarpoq. Tamakkununnga tunngasunik qulaajaasoqarnikuua? Imaanngilaq aporfissarsiortunga kisianniliuna suleriuseq eqqortumik ingerlassappat, namminersortorlu kinaluunniit eqqornerlunneqassanngippat, tamakkuuku pillugit apeqqutinik puttallarartitsisugut, Aqqalu C. Jerimiassen aperaaq. 

Taassumali apeqqutaa ataatsimiinnermi akineqanngilaq eqqaaneqaqqinnanilu.

Suliami inatsisit malitassallu malillugit suliaqartoqarsimanersoq misissorneqassasoq ataatsimiinnermi aalajangerneqarpoq. Sermitsiap paasissutissaatai naapertorlugit suliaq eqqortumik suliarineqarsimanersoq misissorlugu Avannaata Kommuniata aallartereerpaa.