Kujataani kommunimi pakatsineq paasissagutsigu 2024-mut novembarip qaammataanut utertariaqarpugut, taamanikkut isumaginninnermi suliaqarfimmi annertuunik unammilligassaqarfiuvoq. Taamaammat Naalakkersuisut meeqqallu, inuusuttut inuillu innarluutilinnut aqutsineq sullissinerlu tiguniarlugit aalajangernerannik kinguneqarpoq.
Taamatut iliuuseqarneq taamani Meeqqanut Inuusuttunullu Naalakkersuisup Aqqaluaq B. Egedep ima nassuiarpaa:
Kujataani kommunimi pakatsineq paasissagutsigu 2024-mut novembarip qaammataanut utertariaqarpugut, taamanikkut isumaginninnermi suliaqarfimmi annertuunik unammilligassaqarfiuvoq. Taamaammat Naalakkersuisut meeqqallu, inuusuttut inuillu innarluutilinnut aqutsineq sullissinerlu tiguniarlugit aalajangernerannik kinguneqarpoq.
Taamatut iliuuseqarneq taamani Meeqqanut Inuusuttunullu Naalakkersuisup Aqqaluaq B. Egedep ima nassuiarpaa:
- Kommunimi ajornartorsiutit annertungaarmata pinasuartuullutillu, innuttaasut pisinnaatitaaffii inatsimmillu eqquutsitsineq qulakkeerneqarniassammata kommunimut ingerlaannartumik ikiuinissaq pisariaqarpoq.
Akisussaaffik utertinneqassaaq
Naalakkersuisut taamaalillutik Kommune Kujallermut akisussaaffimmik pingaarutilimmik, kommunip aningaasaqarnerata pingajorarterutaanik naleqartumik, arsaarniarlutik iliuuseqarnerat Nanortalimmi Qaqortumilu sulisussaaleqinerup kingunerisaanik meeqqat inuusuttullu pillugit suliat 857-it ingerlasut, taakkununngalu inuit innarluutillit pillugit suliat 300-t ingerlanerat ilaatigut tunngavilersuutigineqarput.
Naalakkersuisut aalajangernerat taamani borgmesterip Stine Egedep nuannaarutigaa.
Akisussaaffiup kommunimut utertinneqarnissaa siunninneqaqqavoq, tamannali – imaluunniit taamaaliortoqannginnera – Kommune Kujallermi pisortaanerup Randi Vestergaard Evaldsenip sakkortuumik qisuariarfigaa.
- Suliassaqarfik
iperarallarneqarsimasoq akuersaarneqarsinnaanngitsumik ingerlanneqarpoq -
aqunneqanngilaq, uppernarsaasiortoqartarani suleqatigiinnerlu ataqqineqarani, kommunimi pisortaaneq Namminersorlutik Oqartussat pillugit oqarpoq.
Naatsorsuutigineqartoq eqquutinngilaq
Namminersorlutik Oqartussat 2024-mi novembarimi akuliunnerisigut naatsorsuutigineqarnikuugaluartut tikkuarpai, tassa “sulianut malinnaaneq, uppernarsaasersuineq siuariartornerlu Namminersorlutik Oqartussanit qularnaarneqassapput. Naatsorsuutigineqaraluartut taakkua naammassineqarsimanngillat, ajoraluartumik”.
- Kommunimut pisortaanertut ikkunneqarninniilli suliassaqarfik
pingaarnersiuinermi qaffasissusimik inissisimasimavoq. Kommune Kujalleq innuttaasunut sulisunullu ulluinnarni
attaveqartarpoq, taamaammallu aarleriummernarpoq paasillugu Namminersorlutik
Oqartussat suliassamik isumaginninneranni aaqqissugaanngitsumik
ingerlasoqarmat, uppernarsaasiortoqarneq ajormat amigartumillu
ataqatigiissaarineqartarmat, tamannalu innuttatta akornanni
toqqissimannginneramik naammaginninnginnermillu pilersitsisilluni, kommunimi pisortaaneq tusagassiuutitigut nalunaarummi allappoq.
Kommunimi pisortaanerup Namminersorlutik Oqartussat suliamut tunngatillugu naammattumik ilisimasaqannginnerarpai, kommunimimi sulisut sulianut tunngasunik, paasissutissanik allanillu pisariaqartunik uppernarsaatinik piumasaqaraluaraangamik iluatsinneq ajorpaat.
- Tamatuma saniatigut utertitsipallannissaq pillugu
tunngavissaqanngitsumik ilungersorfigineqarpugut, tamatumuunalu malunnarpoq
suliassap qanoq annertutigissusia pisariutigineralu Namminersorlutik Oqartussat
aatsaat paasilersimagaat, Randi Vestergaard Evaldsen oqarpoq.
Suleqatigiissitaq ujartoraa
Kommuni suliassaqarfimmik aqutsisinnaalerniassammat suleqatigiissitamik pilersitsinissaq siuariartortitsinissamik qulakkeerinnittussamik isumaqatigiissutigineqarsimasoq tikkuarpaa. Susoqaranili. Suleqatigiissitap suliami qitiunera kommunimi pisortaanerup ima nassuiarpaa:
- Sivisuumik suliassaqarfik iperarsimaneqassappat kommunip
ingerlatseqqilernissaanut utertinneqarnissaa pillugu iliuusissamik kommunip
siunnersuuteqarnissaa inatsisitigut pisussaaffiliussaammat. Taama iliortoqarsinnaanngilaq tassami suliassaqarfik pillugu
kommune paasisutissanik atuuttunik, suliniutinik aallartinneqarsimasunik,
suliap siumukarneranik minnerunngitsumillu massakkut pissutsit qanorpiaq
issusii pillugit paasissutissanik soqanngimmat.
- Taamaammat kommunip suliassaqarfiani tamarmiusumi suliassaq
annertooq aaqqissuussamik ingerlajunnaarsimasutut oqaatigisariaqarpoq.
Piumasaqaatit tallimat
Kommunip susassaqarfiup sukkavallaamik paasissutissanillu tunngavilerneqanngitsumik utertinnissaa taassuma mianersoqqussutigaa. Taamaattumik Kommune Kujalleq ima piumasaqaateqarpoq:
- 2024-mi novembarimiit maannamut paasissutissaatigineqartunik erngerluni nassiussisoqassasoq
- Kinguarsaqqinnani piviusumik pisussaaffilikkamillu suleqatigiissitaliortoqassasoq
- Suleqatigiinneq ataqatigiissaarinerlu aalajangersimasumik ilusilerneqassasut
- Oqaluuserisassat aalajangiinermilu tunngavissat piffissaalluartillugu nassiunneqartassasut
- Aqutsisoqarnikkut peqataanikkullu erseqqissumik inissiisoqarsimassasoq
Randi Vestergaard Evaldsenip naggasiutitut Namminersorlutik Oqartussanut ima oqarpoq:
- Namminersorlutik Oqartussat erngerluinnarlutik malunnaatilimmik
pitsanngorsaanissaat suliniuteqarnissaallu naatsorsuutigaarput.
Akisoqanngitsoq
Sermitsiap Meeqqanut, Inuusuttunut Ilaqutariinnullu Naalakkersuisoq Nivi Olsen oqaaseqartinniaraluarpaa. Naalakkersuisoqarfimmut ataasinngormat allakkatigut saaffiginnissut suli akineqanngilaq. Naalakkersuisup Aqqaluaq B. Egedep kommuni ikiorniarlugu 2024-mi novembarimi akuliunneranit Inatsisartunut qinersisoqareerneranit akisussaaffik maanna Nivi Olsenip tigunikuuaa.
