Kommuni alla avinnissamik taasititsisussanngortoq

Nanortalik nunaqarfiilu Kommune Kujallermut ilaaginnassanersut immaqaluunniit kommunitut namminersortunngussanersut, Kommune Kujallermi septembarip aqqarnganni taasissutigineqassaaq.

Taama Kommune Kujalleq nittartakkamini allappoq.

Innuttaasut taasititsinissaq sioqqullugu kommunalbestyrelsimi ataatsimiititaliat siulittaasui, kiisalu Aningaasaqarnermut Inuussutissarsiornermullu Ataatsimiititaliami ilaasortat Nanortalimmi nunaqarfiinilu innuttaasunik ataatsimiititsissapput.

- Septembarip aqqarnanni taasititsinerup inernera Naalakkersuinikkut suliaqartunut ingerlateqqinneqassaaq, inerneriumaagaa pillugu suleriaqqinnissamut kommunimiit aalajangiisinnaanavianngilagut, suliassarmi Inatsisartuni aalajangiiffigineqarluni suliarineqassammat. Taamaattumik isumasiuititsilluni taasititsinissaq sioqqullugu innuttaasunut ataatsimiisitsinissatsinnut innuttaasut peqataalluarumaarnerat neriuutigaara, ilisimasassanimmi immersorneqarfiussaaq, apeqquteqartoqarsinnaassallunilu, borgmester Malene Vahl Rasmussen (D) oqarpoq.

Kommune Kujallermit avissaarnissamut tapersersortissarsiorlutik, Nanortalimmi nunaqarfiinilu innuttaasut atsiornernik 500-nit amerlanerusunik 2024-mi katersipput. Nanortalik nunaqarfiilu ineriartortinneqanngitsut Kommune Kujallermiillu sumiginnarneqartut, innuttaasut isumaqarput.

Narsarmijini aamma Aappilattumi aggustip 11-ani, Nanortalimmi Tasiusamilu aggustip 12-anni, Ammassivimmi Alluitsup Paanilu aggustip 13-anni, innuttaasunut ataatsimiisitsisoqassaaq.