Konsulateqarfiup ammarnerata kingorna Naalakkersuisoq nunanullu allanut ministerit marluk tusagassiortunik katersortitsinermi: Nutaamik aallartinneruvoq

Canadap Nuummi konsulateqarfia tallimanngornermi ualikkut pisortatigoortumik ammarneqarpoq.

Ammaanersiornermi Canadap nunanut allanut ministeria Anita Anand Nuummiippoq. Danmarkimi nunanut allanut ministeri Lars Løkke Rasmussen aamma tallimanngornermi ammaanersiornermut peqataasussaagaluarpoq, kinguaattooramili peqataasinnaasimanani.

Lars Løkke Rasmussenili kingusinnerusukkut Nuummut tikippoq, arfininngornermilu nunanut allanut tunngasunut naalakkersuisoq Vivian Motzfeldt ataatsimeeqatigalugu.

Ministerit pingasut taakku Canadamiut nakkutilliilluni umiarsuaata Jean Goodwill-ip silataani arfininngornermi tusagassiortunut katersortitsipput.

Vivian Motzfeldtip tusagassiortunik katersortitsinermi aallartilluni Canada qutsavigaa piffissami ilungersunartumi Kalaallit Nunaat tapersersormassuk.

- Tamanna qujamasuutigeqaarput Kalaallinut tuppallersaataavoq qanigisatsinnik suleqateqaratta sanilimillu tapersersuisumit najorneqaratta, Vivian Motzfeldt oqarpoq.

Canadamiut erfalasuat maanna Nuummi konsulatip silataaniittoq ukiuni aggersuni, nunat taakku marluk ilinniartitaanikkut, kulturikkut niuernikkullu suleqatigiinnerujartorneranni, pingaarutilimmik assersuutaajumaartoq aamma oqarpoq.

- Issittumi isumannaatsuunissaq qulakkeerniarlugu NATO-mi aamma suleqatigiissaagut, Motzfeldt oqarpoq.

- Nutaamik aallartinneq

Canadami nunanut allanut ministeri Anita Anand aamma oqalugiarpoq.

Motzfeldt Løkke Rasmussenilu ataatsimeeqatigiinnermut suleqatigiilluarnerlu pillugit qutsavigai.

- Maani diplomatitut sulinitta Canadamiorpassuit, qallunaarpassuit kalaallillu iluaqutigissavaat, Anita Anand oqarpoq.

Taanna oqarpoq nunat taakkua akornanni aningaasaqarnikkut attaveqatigiinneq Issittumilu isumannaatsuuneq sammineqartuassasut.

Lars Løkke Rasmussen oqarpoq Nuummiinnini nuannaarutigalugu, piffissamilu ilungersunartumi ikinngutigiilluarneq pingaaruteqarluinnarnerarlugu. Canadalu taama ikinngutaalluartuunerarlugu oqarluni.

- Canada ukiuni 80-ini diplomatikkut attaveqarfigisimavarput, taamaattumik sivisuumik suleqatigiissimavugut, misigivungali Nuummi konsulateqarfittaarluta nutaamik aallartittoqarnera suleqatigiinnerup annertusarnissaanut periarfissatsialaasoq, Lars Løkke Rasmussen oqarpoq.

USA-mit sioorasaarneqarneq pillugu aperineqartut

Nunatta nammineersinnaatitaanera Canadap Danmarkitut isumaqarfigimmagu aamma ajornartorsiut Kalaallit Nunaannut nutaanik periarfissaqalersitsisinnaanera, Lars Løkke Rasmussenip nuannaarutigaa.

Tusagassiortut apeqquteqarsinnaalermata, ilaatigut apeqqutigineqarpoq Kalaallit Nunaat USA-mit suli navianartorsiortinneqarnersoq.

Vivian Motzfeldt akivoq qaammatip ataatsip matuma siornatigornit pissutsit pitsaanerulersimasut, maannalu USA-mik toqqaannartumik oqaloqateqartoqalersimasoq.

- Kissaatigisarput suli angunngilarput, qanorlu kinguneqassanersoq oqaatigissallugu siusippallaarpoq, Motzfeldt oqarpoq.

Canadap "ilamernga" Nuummi

Vivian Motzfeldt aperineqarpoq Canadap maannakkut Kalaallit Nunaanni konsulateqarfittaarnera qanoq isumaqarnersoq.

Ilaatigut akivoq erseqqissarlugu Kalaallit Nunaata Canadamut diplomatikkut attaveqarnerminik annertusaanissaq sivisuumik sulissutigisimagaa, qujamasullunilu nangilluni:

- Kisimiinnginnitsinnik misigisimaneq uagutsinnut pingaaruteqarluinnarpoq. Ikinngutigut maani nikorfaqatigivagut, Motzeldt oqarpoq nangillunilu:

- Siunissami attaveqatigiinnerup annertusarnissaa ajornannginnerulissaaq, maanna Nuummi „Canadap ilaanik“ pilersitsisoqarmat aamma Canadami sinniisoqarfimmik ammaanissaq sulissutigigatsigu.

Canadap nunanut allanut ministeriata erseqqissarpaa suleqatigiinnermi pingasut pingaarnerusut:

1. Issittumi illersornissaq isumannaassuserlu
2. Aningaasaqarneq — Aningaasaqarluarnerup nunat isumannaatsuunikkut ataqatigiinnerulersittarpai, oqarpoq.
3. Inuit imminnut attaveqatigiinnerat – nunanut allanut ministeri oqarpoq inuit Canadameersut 100-t sinnillit ammaanersiornermi Nuummi peqataassasut. Kalaallit Nunaata Canadallu atanerat annertusarneqarpoq.