Kunngeqarfiup Danmarkip illersornissamut Canadamut isumaqatigiissut annertusigaa

Danmarkip Canadallu illersornissamut tunngasuni arlalinni suleqatigiinnerulernissamik isumaqatigiissut tallimanngormat atsiorpaat.

Taama Illersornissamut ministereqarfik tusagassiuutitigut nalunaarummi allappoq.

- Ikinngutivut pisariaqartippavut, Canadalu Atlantikup illuatungaani attaveqaatinik nukittorsaasoqarnissaanik siunissamilu suliassanik ataatsimoorluta aaqqiinissamik kissaateqartoq suleqatigaarput, illersornissamut ministeri Troels Lund Poulsen (V) oqarpoq.

Isumaqatigiissut Münchenimi isumannaallisaanermut tunngasunik ataatsimeersuarnermi atsiorneqarpoq.

Troels Lund Poulsenip Savalimmiuni nunanut allanut kulturimullu tunngasunut naalakkersuisup arnap Sirið Stenbergip aamma Kalaallit Nunaanni nunanut allanut tunngasunut naalakkersuisup Vivian Motzfeldtip isumaqatigiissut atsiorpaat.

- Canada Kalaallit Nunaata saniliisa qaninnersaraat Natomilu qanittumik iliulluni. Taamaattumik illersornikkut qaniginerpaasatsinnik suleqatigiinnerup nukittorsarnissaa pissusissamisuuginnarpoq. Nunat marluk akornanni Natollu iluani, Vivian Motzfeldt oqarpoq.

Canadamit illersornissamut ministeri David J. McGuinty isumaqatigiissummik atsiortuuvoq.

Tusagassiuutitigut nalnaarummi isumaqatigiissummi ilaatigut iliuuseqarnissami, sumiiffimmi ataatsimut soqutigisaqarfiusuni nakkutilliinermi kiisalu ilinniartitaanermi, ilitsersuinermi sungiusarnernilu suleqatigiittoqassasoq allassimavoq.

Isumaqatigiissut Kunngeqarfiup Danmarkip Canadallu suleqatigiinnissamik isumaqatigiissutigeriigaanut ilassutaavoq.

Danmark Tysklandimik, Canadamik Nogemillu Atlantikup avannaani imaatigut isumannaatsuunissaq pillugu suleqatigiinnermut siorna juunimi ilaaqqilerpoq.

Isumaqatigiissutip atsiorneqartup suleqatigiinnerup annertusarnissaa tigussaasumik angusaqarnissaq qitiutillugu qulakkiissagaa, allassimavoq.

Canadap annertuumik Kunngeqarfimmik Danmarkimik tapersersuereersorlu, ingammik USA-p præsidentiata Donald Trumpip Kalaallit Nunaata tiguarnissaa pillugu kissaateqarluni oqariartuuteqartareersorlu, isumaqatigiissusiortoqarpoq.

Nunami nunanut tunngasunut allanut ministeri Anita Anand kingulliulluni Kalaallit Nunaanniippoq, sapaatit-akunnerani qaangiuttumi tallimanngornermi Canadap sinniisoqarfia aamma atoqqaartinneqarpoq.

Issittumiinnerunissaq siunertaalluni sinniisoqarfik ammarneqarpoq.

Tamatuma saniatigut Canada sumiiffimmi sakkutuuliinerulerpoq. Siiunissami sakkutuut amerlanerulissapput Issittumilu nakkutilliinissamut akersuunnissamullu atortoqarnerulerluni.

/ritzau/