Kuutak piffissaq kingullerpaaq atorlugu suliffissaraluani taamaatiinarlugu Malu peqatigalugu aallarnisaasutut takorluugartik anguniarpaa

Namminneq sulinerminni imminnut naalagarerusullutik AD Marketingimi ilinniartuunerminniilli ilisimareerpaat. Kuutak Olsenip ilinniarnermi kingorna aallarnisaasutut aallartsissimavoq, Malu Falckillu misilittagaqarnerunissani siulliullugu anguniaqqaartariaqarusussimavaa.

- Ilinniarnerput naammassigatsigu Kuutallu marluulluta RD Marketing Bureaumi suleqatigiittarpugut, suleqatigiilluartarpugullu. Taamanikkulli namminersulernissaq marluulluta takorluugaraarput. Ilinniagarput naammassigatsigu Kuutak Olsen ingerlaannaq aallartillunilu uanga RD Marketing Bureaumi suligallaqqaarpunga, Malu Falck oqaluttuarpoq.

Aalajangerniarneq sivisusimavoq, kiisamilu Malu Falck aalajangerlunilu suliffimminiit soraarmat alloriarneq tulliuttoq sunaanersoq tassunga qularutissaasimanngilaq. Soraarnerata aqaguani Kuutak Olsen sianerfigineqarlunilu ersarissumik ima aperineqarpoq: Takusakkamut ilanngussinnaavunga?

- Namminersortutut aallartinnissara aalajangerakku Kuutak siullertut eqqarsaatinniippoq. Suliunnaarnerma aqaguani sianerfigalugulu Takusakkamut ilanngussinnaanerlunga aperaara. Eqqaamanerlunngikkukku peqatigerusunnginneriga siusinnerusukkut aperisimavaanga, Malu Falck oqaluttuarpoq nangillunilu.

- Taamani Kuutak kisimiilluni piginnittuuvoq, suliffeqarfeeraalu Takusakka Productionsimik taaguuteqarpoq. Piffissarlu eqqorluinnartoq nalaanneqartoq paasinarsivoq: Kattunnissamut qanoq isumaqarnersoq paasiniarlugu sianerfiginissaanut ulloq sioqqullugu Kuutak Olsen meeqqat angerlarsimaffianni atorfininnissamut oqaloqatiginnippoq. Atorfininnissamut isumaqatigiissut atsioriaannaasoq taamaatiinnarlugu, siunissarput ataatsimoorullugu sulissutiginiarlugu Kuutak aalajangerpoq.

Kuutak Olsen nuannarisaminik taamaatitsiinnarniarluni aalajangersimagaluarpoq, atorfimmillu nutaami atorfininnissamut isumaqatigiissut saavani atsioriaannanngorsimagaluarpoq. Suliffilli matuneqarani pilerseqqinneqarpoq. Malu Falck suleqatigilerpaa, tunaartarisarlu allanngorpoq – suliffeqarfiullu aqqa aamma allanngunngorpoq.

- Suliffeqarfimmik unikaallatsitsiniarluni aalajangersimagaluarpoq, taamaammallu atorfininnissamik isumaqatigiissummik piareersimasuuteqarpoq. Suleqatigilerpugulli. Taaguut "Productions“ nuannarivallaannginnakku, taamaammat peerniarlugu aalajangerpugut, suliffeqarfillu ullumikkut Takusakkamik taaguuteqarpoq, Malu Falck itisiliivoq.

Suliffeqarfeeraq matuneqarlunilu kingorna Takusakka I/S pilersinneqarpoq, piginnittooqataanerlu assigiimmik agguarneqarpoq. Kuutak Olsen Malu Falckilu ullumikkut suliffeqarfimmik ataatsimut ingerlatsisuupput, suliffeqarfitsillu siuariartortippaat.

Mianerisassarujussuaq

Aallarnisaasut ilaat ukiorpassuarni pilersaarusiortarput. Malu Falck qaammaat ataaseq taamaallaat pilersaarusiorpoq. Aningaasaanik toqqorsimasuuteqanngikkaluarlu suliffimminit apriilip aallartinnerani soraarpoq, maajillu aallaqqaataani Takusakka I/S pilersitseqataaffigaa.

- AD Marketingimi apriilip aallartinnerani ullormiit ullormut soraarpunga. Ullormi tassani soraarninni mianersugaalliorujussuarpunga, qaammammilu tamatumani ineqarnermut akiligassakka qanoq akilissanerlugit naluara. Eqqarsaannarpunga: ‘Maannakkut taamaaliussaanga, taava qanoq pisoqassanersoq takussavarput.’ Taamaattoq Takusakka I/S 2024-mi maajip aallaqqaataani piviusunngorpoq, Malu Falck oqaluttuarpoq.

Malu Falckip  Kuutak Olsenillu Takusakka I/S-imi ullut makku atugaat ulapaarfiungaatsiarput. Tupaallannarnerpaaq tassaavoq nittarsaassinermik suliaqartut qanoq piumaneqartiginerat, suliassaaleqisimanngillallu.

- Tupaallaatiginerpaasarput tassaavoq suliatta qanoq annertutigisumik piumaneqartigineri. Piumaneqarluartorujussuuvugut, taamaammallu sullitassanit nutaanit saaffigineqartuarpugut. Pitsaanerpaavorli assigiinngitsunik suliassaqarfik taanna annertuumik ilisimallugulu attaveqaatigissaaratta. Imminut ussassaarutigisimanngilagut – suliassat namminneerlutik takkuttarmata pisariaqarsimanngilaq, Malu Falck oqaluttuarpoq.

Unammillernarnerpaaq

Sullitat amerlagaluaqisut suliassallu namminneq ingerlaarusaartuaraluartut, namminersortutut inuuneq nuannersuinnaanngilaq. Sullitat Malu Falckimut Kuutak Olsenimullu ajornartorsiutaanngikkaluartut allamik ajornartorsiuteqalerpoq – naatsorsuuserineq. Allaffissornikkut malittarisassat ima annertutigisimapput ukiorpassuarni aallarnisaasutut takorluugaq kinguarsarneqarsimalluni.

– Uannut Kuutammullu unammillernarnerpaasimasoq tassaavoq naatsorsuuserineq, pingaartumik akileraarutinut tunngasut tamaasa eqqarsaatigalugit. Allaffissornermilu kukkunissamut siooraneq pissutigalugu siusinnerusukkut aallartissimanngilagut.

- Taamaammat Takusakka pilersikkatsigu naatsorsuuserisumik ingerlaannaq atorfinitsitsivugut. Naak immikkut ilisimasalimmik ikiorneqaraluarluni malittarisassat paasiuminaammata tamanna ajornakusoorsimavoq. Aningaasaqarniarneq qularnanngitsumik ilikkagassatsinnit tamanit ilinniarfiunerpaavoq, Malu Falck oqaluttuarpoq.

Suliffeqarfiit aallarterlaat amerlasuut ukiumi siullermi ilungersorlutik ingerlaniartartut Takusakka iluanaarnarnerpaamik ’qarmamut’ aporput. Suliffeqarfiup pilersinneqarneranit ullut 90 qaangiutiinnartut aningaasarsiorlualerput – malitsigisaanillu ingerlalluarnerat annertusiartuinnarpoq.

- Suliffeqarfitsinnik aallartitsinitsinniit qaammatit pingasuinnaat qaangiunneranni suliassat ima amerlatigilersimapput suliassat takkussuuttut amerlangaarmata angummanniartariaqalersimalluta. Naak maannakkut ukiut marluk qaangiutereersut suli angummanniaannavik ingerlavugut. Piumaneqarnitta annertussusaa malinnaaffigisinnaanngilluinnarparput.

- Maannamut unamminiarnarnerpaat ilagaat – suliniutinut itigartitsisinnaanissaq – qujanartumilli ilikkalertorpaput, Malu Falck oqarpoq.

Akisussaaffiit

Kuutak Olsenip assiliivimmik inissiineq sammivilersuinerlu pikkoriffigai, Malu Falckillu sullitat tusarnaarneqarnissaat qulakkeertarpaa. Oqaloqatigiinnerup ataqatigiinnerullu inerisarnissaanut atatillugu taanna Takusakkami avammut kiinnertartunngorsimavoq.

- Uanga saaffiginnissutit suliarisarlugllu sullitatsinnut attaveqarnerpaavunga, qularnanngitsumik attaveqatigiinnermik ineriartortitsinissamut oqaloqatigiilluarnissamullu piginnaaneqarnerunera tamassumunnga pissutaavoq. Assersuutigalugu ataatsimiikkaangatta uanga attaveqatiginninnermut tunngatillugu siuttuusarpunga, sullitallu attaveqatigineri ingerlataraakka.

- Kuuttap nukittuffia annertooq tassaavoq sunik tamanik takorluuisinnaanera. Isumassarsigaangami takutitassiap qanoq isikkoqarnissaa pilersaarusioreertarpaa, assiliissutillu sumi inissinneqarnissai ilisimaarilluinnarpai. Suli suliaqarluta aallarteqqajanngitsugut suna tamaat takusinnalereertarpaa. Taanna teknikikkut tunnganerusunik suliaqarpoq, Malu Falck nassuiaavoq, nangipporlu:

- Sullitatta kissaataat Kuutallu isumassarsiaasa taputartuunnissaat uanga isumagisarpakka, tamannalu nukittuffigaarput, aammali annikitsualuit soorlu nutsat atisallu kusanartuunissaat uanga nakkutigisarpakka.

Digitalip silarsuaani, paasissutissani amerlasoorpassuarni, naqinnerit minguittut takuneqarlualernissamut naammaqqajarneq ajorput. Malu Falck naapertorlugu oqariartuut takussaasunngorlugu puiguikkiunneqartussanngorlugulu sakkortunerusumik sunniiniutit atorneqartariaqarput. Oqaatsit assiliartalersuutillu ataqatigiilluinnarnissaata pingaaruteqarluinnarnera aqqummut tassunga ilaasoq taanna isumaqarpoq.

- Silarsuaq isitsinnik misigisaqarfigisarparput, takusassiarineqartartullu naqinnertalersukkanit eqqaamanerusarpagut. Misilittakkakka naapertorlugit oqariartuut paasiuminarsarlugu assitalersorluarlugulu takusassiatut pitsaasumik oqaluttuarineqaraangami tigulluarneqarnerusarpoq.

- Oqariartuut assiliartalersuutillu imminnut atalluinnartariaqarput – soorunalimi sullitatta piumasaat aallaavigalugu assigiinngiiaarsinnaasarpoq, Malu Falck oqarpoq.

Suliassat apeqqutaallutik ullorsiutit immersorneqartut

Suliassap pilersinnissaanut itisuumik anersaartornerit, allattarfissuillu qaqortut atorlugit suliamik aallartitsinissaq pinngorartitsinermi suliaqartartut ilaannut oqinnerusinnaasarpoq. Takusakkamili suleqatigiinni sullitamik oqaloqateqarnermiit isumassarsiat ineriartulersarput. Suliassaqarfimmi matumani ukiuni arlalinni misilittagaqarluarneq niaqormioralugu, suliaq suli aallartinngikkaluartoq, oqaatitigut anninneqartut takusassiassatut naammassereertarpaat.

- Pilersitsinermik suliaqarneq sullitagut ataatsimeeqatigigaangatsigit sullitallu kissaatigisani anguniakkanilu oqaluttuarigaangagit ingerlaannaq aallartittarpoq. Suliassaqarfik ima ilisimasaqarfigitigaarput suliassap qanoq suliarineqarnissaa takorluulereersinnaasarparput. Taamaalinerani suliaq pissusissamisoorluinnarluni immaqaluunniit assiliartalersorluarlugu qanoq suliarineqassanersoq eqqarsaatigilereertarparput, tamannalu eqqarsaatitsinni takusinnaalereertarparput. Pinngorartitsisinnaanerput ilutsinni ima inissilluarsimatigaaq, tamanna pissusissamisuuginnartutut isigilersimallutigu – suliariinnartarparput, Malu Falck oqarpoq.

Takusakka pilersinneqaqqaarmalli suliaq annertooq Kuutak Olsenip qaarasaasiaata isiginnaarutaata saaniippoq. Maanna suliaq annertooq kiisami isiginnaarneqarsinnaalerluni piareeraluttualerpoq. Piviusulersaarutip kulturikkut illorsuarmi Katuami juunip ingerlanerani takutinneqaqqaarnissaa pissaaq, qaannamik unammersuaarnermi unammissutaasartoq pillugu piviusulersaarusiaq: allunaariarneq.

- Kuutak filmiliornermik assiliinermillu suliaqarneruvoq, maannakkullu suliatsinni annerpaaq tassaavoq qaannamik timersoqatigiiffik pillugu piviusulersaarusiorneq. Nunatsinni qaannamik pissartanngorniunnermi unammissutigineqartartoq immikkuullarissoq, tassa allunaariarneq piviusulersaarusiaraarput. Suliarput piareernialerpoq, juunillu ingerlanerani Katuami takutinneqassaaq. Piviusulersaarut suliffeqarfiup aallartinneraniilli suliaralugu aallartipparput, taamaammat ukiut marluk missiliorlugit ingerlapparput. Kuutak suliap ingerlanerani Ilulissani Sisimiunilu assiliilluni immiussivoq. Isumaqarluinnarpunga suliarput taanna Kuuttaap tulluusimaarutiginerpaagaa, Malu Falck oqaluttuarpoq.

Sulinerup qanoq iluseqarnissaanik nammineq aalajangiisinnaassuseqarneq suliffimmi naalagaqarani sulinerup pitsaaqutigilluinnagaasa ilagaat. Takusakkami ulluinnarni nalunaaqutaq nalinginnaasumik malinneqarneq ajorpoq, ullullu ingerlanera nammineq aaliangersinnaalluinnarpaat. Akunnerilli nalinginnaasut naatsorsuuserinermi taamaallaat malinneqartarput.

- Suliartortarnerput aalajangersimasumik piffissaligaanngillat, ullorlummulli suliassanut naleqqussartuarpugut, Malu Falck oqarpoq.