Landry: USA-p Kalaallit Nunaanni sunniuteqaqqilernissaanut piffissanngorpoq

USA-p Kalaallit Nunaanni immikkut aallartitaa, Jeff Landry, pingasunngornermi unnukkut oqariartuuteqaqqippoq. USA-p Kalaallit Nunaanni najuunnera annertusaqqinneqartariaqartoq.

Nutaarsiassaqartitsivik AFP taama allappoq.

- USA-p Kalaallit Nunaanni sunniuteqaqqilernissaanut piffissanngorpoq (put its footprint, aaqq..), Landry Nuummiit aallarnissani sioqqutitsiarlugu oqarpoq.

Landry Louisianami siorna decembarimi guvernøritut aamma Kalaallit Nunaannut immikkut aallartitatut ivertinneqarpoq.

USA-p præsidentiata Donald Trumpip Kalaallit Nunaata tiguarnissaanik kissaateqarnera, arlaleriarluni saqqummiutereeraalu taanna ivertinneqarpoq.

Taassuma tikeraarnerani ilaatigut, Kalaallit Nunaata namminersulivinnissamik piumasaqaatai ataqqinerai aperineqarpoq.

USA ataasiinnarmik aappaluttunik killigititaqartoq taanna akivoq, tassa USA-p nammineq killigititaa.

Isumannaallisaanerup pitsaanerulersinnissaa siunertaralugu USA-p Kalaallit Nunaanni sakkutooqarfinnik ammaanissani kissaatigigaa, oqarpoq.

- Præsidentip nunami sillimaniarneq pillugu iliuuseqarnerunissani, Kalaallit Nunaannilu sakkutooqarfiit ilaat inuttalersorneqaqqinnissaat eqqartortarai Isumaqarpunga, ullaassakkut danskit nalunaaqutaat pingasunngortoq taama oqarpoq.

USA Kalaallit Nunaanni maannakkut ataasiinnarmik sakkutooqarfimmik, Pituffimmi Space Base-mik, siornatigut Thulemi sakkutooqarfimmik taaneqartartumik, sakkutooqarfeqarpoq.

Landry Nuup mittarfianut sapaammi unnukkut mippoq, ataasinngornermilu tikeraarnermini Kalaallit Nunaanni naalakkersuisut siuttui ataatsimeeqatigai.

Tamatuma kingorna naalakkersuisut siulittaasuat Jens-Frederik Nielsen (D) nunanullu allanut Naalakkersuisoq Múte B. Egede (IA) USA-mit aallartitat pitsaasumik ataatsimeeqateqarsimallutik nalunaarput.

Jens-Frederik Nielsen naapertorlugu naalakkersuisut aallaqqaammulli iliuuserisartagaat erseqqissarpaat.

- Kalaallit Nunaat kalaallillu inuiaqatigiit ataqineqassasut oqaatigaarput, Naalakkersuisut siulittaasuat ataasinngornermi ualikkut Nuummi tusagassiortunik katersortitsinermi taama oqarpoq.

USA-p Danmarkimi aallartitaa Ken Howery, Kalaallit Nunaanni sumiiffinni sapaatip akunnerata ingerlanerani assigiinngitsuniippoq.

Ilaatigut Amerikamiut Nuummi konsulateqarfiata allaffiisaata nutaap sisamanngorpat atoqqaartinnissaa suliassaraa. Nutaarsiassaqartitsivik Sermitsiaq naapertorlugu Naalakkersuisut siulittaasuat Jens-Frederik Nielsen ammaanersiornermi peqataassanngilaq.

Aamma Landry peqatigalugu marlunngornermi pingasunngornermilu, inuussutissarsiutilerisut  ataatsimeersuarnerannut peqataapput.

/ritzau/