Landryp Kalaallit Nunaat pillugu oqaasii: Naalagaaffik nutaaq USA-mut immaqa ilanngunneqarsinnaavoq

Inuiattut Ullorsiornermi pilluaqqussut nittartakkatigut inuit attaveqaqatigiittarfianni X-imi, immikkut aallartitamit Jeff Landrymit ivertinneqarpoq:

- Inuiattut Ullorsiornermi Kalaallit Nunaanni qeqertami imaannaanngitsumi inuiaat, tamassi pilluaritsi. Qanortoq ulloq manna kulturissinnik, ileqqutoqqassinnik naleqartitassinnillu kingornussassinnut eqqaasitsisuugili, Jeff Landry allappoq.

Amerikamiut Kalaallit Nunaannik soqutiginninnerat pilluaqqusinermini ilaatigut ersersippaa:

- Soorlulusooq USA-p namminersulivinneranit ukiut 250 nallersimaleraat, kiffaanngissuseq periarfissallu nalliuttorsiutigineqarneranut peqataavugut. Imaasinnaavorlu USA ukiuni 251-nini nalliuttorsiornerani naalagaaffimmik ataatsimik ilannguttoqartoq, Jeff Ladry allappoq, USA-p erfalasua, kingornalu Kalaallit Nunaata erfalasuanik allatani naggaserlugit.

USA-p præsidentiata Donald Trumpip Jeff Landry Kalaallit Nunaannut immikkut aallartitatut decembarimi 2025-mi toqqarpaa. Donald Trumpip arlaleriarluni Kalaallit Nunaat tiguniarlugu oqariartuuteqarnermini Kalaallit Nunaat Kunngeqarfillu tamaat tatisimavai.

Jeff Landry immikkut aallartitatut kiffartornerup saniatigut naalagaaffiup immikkoortuani Louisianami guvernøriuvoq.

Inuussutissarsiornermik suliaqartut ataatsimeersuarneranni Future Greenland Nuummi maajimi ingerlanneqarmat Landryp Kalaallit Nunaat tikeraarpaa, tassanilu aamma Naalakkersuisut Siulittaasuat Jens-Frederik Nielsen (D) Nunanullu Allanut Naalakkersuisoq Múte B. Egede (IA) ataatsimeeqatigai.

Jens-Frederik Nielsen naapertorlugu ataatsimiinnermi kalaallit tungaannit erseqqissaasoqarpoq "kalaallit inuiaat tuniniarneqarsinnaanngitsut, aamma inuit namminneq aalajangiisinnaatitaanerat nerliutigineqassanngitsoq“.

Suleqatigiisitaliaq Kalaallit Nunaannit, Danmarkimit USA-millu atorfilittanit qaffasissumik inuttalersorneqartoq januaarimiilli isumaqatigiinngissutit aaqqinniarlugit isumaqatigiinniarsimavoq.