Lars Erik Gabrielsen kommunimi isorartoqisumi inoqarfippassualimmilu upernaaq borgmesterinngoreerluni aasaq manna angalavoq.
Kommunerisanni 2025-mi suna eqqaamanerpaaviuk?
Lars Erik Gabrielsen kommunimi isorartoqisumi inoqarfippassualimmilu upernaaq borgmesterinngoreerluni aasaq manna angalavoq.
Kommunerisanni 2025-mi suna eqqaamanerpaaviuk?
- Eqqaamanerpaasannik eqqaasaqassaguma nunaqarfinnut illoqarfinnullu angalanigut immikkut taasariaqarpakka, najukkani atukkat paasisimasaqarluarfiginissaat pingaarmat sulinitsinni. Uggoraarali Qaanaaq suli tikinnginnatsigu tamanna ukiup tulliuttup aallartisimalernerani naammassissuarput. Aammali eqqaamavakka atuutilerninniik innuttaasorpassuit ilassiorlutik, uummammiuminnik apuussisarnermikkut suleqatiginnikkusussuseqarnerat. Tamanna immikkuullarippoq ullut tamaasa misigisartagara.
Borgmesterillu suliamini suut iluatsilluarsimanerlugit aperineqaruni angalasimanini eqqaanngitsoorsinnaanngilaa.
- Iluatsinnerpaasorivara qulaani allariikkattuut nunaqarfippassuit takuneri, Lars Erik Gabrielsen oqarpoq.
Angalanerminili tassani aamma tupaallaateqarpoq.
- Tupannaqaarlu atukkat tusartareeraluarlugit aamma sanasutut ilaat takusareeraluarlugit killiffimmi kinguarsimangaarneri. Qamuuna aliatsaatigivara ilisimalluarlugu nunatsinnut aalisartoqarfiunermikkut qanoq tunniussaqangaartartuugaluartut utertitsivigineqarsimannginneri. Allaat eqqarsartarlunga tassaniitinneqartut inuerukkiartornissaat siunertaralugu. Tamanna qamuuna akerleringaarpara, nunarujussuarpummi siammasissumik inoqarfeqartoq tassaavoq nunatsinnik paarsisuusut, inoqartitsisuusut.
Utaqqisinnaaneq ilinniarpaa
Borgmesterinngorlunili sungiunniagassat arlaqarput, taakkua ilagaat utaqqisinnaaneq.
Borgmesteritut ilinnut suna ukioq manna unammillernarnerpaava?
- Unammillernarnerpaasoq tassaagunarpoq naammassisaqarusussuseq annertugaluartoq utaqqikatannalaartoqarsinnaasarnera atuutsitsilernissanut. Tamanna sungiunniagassaavoq, taannaammat innuttaasut naammasseqqusinerminni apuuttuagaat. Ileqqut allanngortinniagassat piffissamik atuiffiusariaqarmata naammagittartariaqarneq inituvoq.
Suliassaq suna ukioq manna naammassinngitsoorpiuk?
- Naammassinngitsuugara taannaavoq Qaanaaq eqqaanilu nunaqarfiit tikinngitsoorneri, inissialiortitsiniarnerput naatsorsuutigisamiit arriinnerusoq, kisianni ingerlavoq, Lars Erik Gabrielsen naggasiivoq.
