Lars Peter containerimi angerlarsimaffittaarpoq: Matuersaat tigugakku qiavunga

Sisamanngorneq januaarip 22-at Lars Peter Sanimuinamut puigunaatsuuvoq. 

Ukiummi affaani angerlarsimaffeqanngitsooreerluni inuunermini allannguisussamik pisoqarneranik nalunaarfigineqarpoq, containerinimi initaartoq kommunimit qujasaaniarlutik sianerput. Ima pileritigaaq kommunimut arpasukaaginnaq matuersaat aallugu.

- Matuersaammik tunisikkama qiallungalu nilliallungalu, nuannaangaarama aqqutaa tamaat qiavunga ineerassama tungaanut, Lars Peterp initaarnini eqqaagamiuk suli killitsisimarpalulluni oqarpoq. 

Taanna 39-nik ukioqarpoq, Tasiilamilu peroriartorluni. Meeraqarfimmini ukiup affaata matuma siorna tikillugu najugaqarpoq, ullulli ilaanni najugaqatigiissinnaajunnaaramik nalunngisamini ilaquttaminilu taamanili sinnumasalerpoq. 

- Ilungersunaqaaq. Kamak annertoorujussuaq ukiup affaani tassani pigivara, ullut ilaanni tulleriit ikioqqugaluarluni qisuariartoqanngitsoq kommunimiit, Lars Peter oqaluttuarpoq. 

Qasuneq kaannerlu  

Siniffissaqarumalluni qamuuna nukkiorneq kaannerlu qaammaterpassuarni ulluinnarai. 

- Angerlarsimaffeqannginnerup nalaani misigisakka ilungersunartorujussuupput. 

Kingumut qiviaruni ullut ajornerpaartai eqqaamalluarpai. 

-  Ajornerpaanikuuvoq silarluttumi ullut pingajussaani silaannarmiinnikuunera nerisaqarnanga. Ullulli sinneri oqinnerusumik atortarnikuuakka, ullaanngoraangat  nalunngisamma suuffaani soraarnissaata tungaanut sinittarlunga.

Lars Peterp ernera maanna arfineq-marlunnik ukioqarpoq, allilaareeramilu paasinnissinnaallualereerluni. 

- Nalligalunga qiasarnikuuvoq iserfissaqanngitsunga nalunnginnamiuk. 

Containerini initaarami ernini ilanngulluni qujamasummat nukittorsaatigisaqalugu oqaluttuarpoq. 

- Erninnguara aamma toqqissiallanneroqaaq angerlarfissaqalerama.

Ajortuliornaveersaarpunga

Lars Peter imigassamik atuisuunngilaq, namminerlu oqaluttuarnera malillugu ukiumut ilaanni marloriarluni imersinnaasarluni.

- Imerajuttuni imertuniluunniit unnuiffissarsiortarnikuuvunga. Suuffami inissaqaraangama unnuiffiginiaaluttakkannik kammaqarpunga, silarlukkaangat annermik tassaniittarlunga, kisianni ilaatigut silamiittarpunga, Lars Peter oqarpoq. 

Sila nillertereersoq angerlarsimaffeqanngitsuugami unnuiffissaarulluinnaraangami suliffigisimasami toqqorsiviani kiassagaanngitsumi sinittariaqartarsimavoq. Ullut artornarsilluinnaraangata ajortuliorusunneq allaat takorloortarpaa. 

- Allattarpunga ilaanni Facebookimut immaqa isertitsivimmiileruma pillualissuunga. Aajukua isertitsivimmiittut uannit pilluarnerusut. Uffarfissallit, innarfissallit, ineerallit. 

Tassungali killissimannginnini qujamasuutigeqaa. 

- Nukittullunga naammagalugu ajortuliornaveersaarlunga qaangerpara. Ugguanngilanga ajortuliorsimannginnama.  Palasip oqaloqatigisarnerani oqaatsinik isumatoorujussuarnik tunisinera aamma peqqutaaqataagunarpoq. 

Tipikkunnaarpunga 

Lars Peter meerartaanngikkallarami avannaani aalisakkerivinnut 2016-imiilli suliartortarpoq. Erninili ungasalermat kingullermik 2021-mi suliartornikuulluni.

Kingorna Tasiilami assigiinngitsuni suliffeqartarpoq. Kisianni angerlarsimaffeqanngitsuulluni sulinissaq tulluanngeqisoq nammineerluni misigaa.

- Suliffissarsisaraluarpunga suliffittaarusuttaraluarlungalu, kisianni atisakka tipittorujussuullutillu uffarneqassanangalu peqqusiileqinartarnermik, taamaalilluni sivisuumik sulerusussuseqanngilanga.

- Maannakkut tipikkunnaarlungalu, kaakkunnaarlungalu qiiajunnaarama pilluaqaanga, Lars Peter oqarpoq. 

Containerinut nutserami eqqiluisaaqqissinnaalernini iluarusuutigeqigaa ersarippoq. 

- Ineerannguaq taanna ullut tamangajaasa pujoralaajarlugulu asattarpara. Nerereerlungalu sanerlungalu, Lars Peter illalaarluni oqarpoq. 

Suliffittaariasaartoq

AAMMA ATUARUK

Angerlarsimaffeqanngitsut pillugit ilisimatusartut: Tasiilami iliuuseqartoqarnera qujanarpoq, kisianni...

Containerit maanna najugaqarfigineqartut arfineq-pingasuupput marlunnillu ilaqqinneqartussaallutik. Tasiilami inissaaleqineq angerlarsimaffeqannginnerlu ima ajornartorsiutaatigipput containerinut utaqqisut 30-t sinnilereerlugit. 

- Nalunngisaqarpunga arlariinnik uattut inissisimasunik, kisianni suli angerlarfissaqanngitsunik, Lars Peter oqarpoq. 

Taassuma angerlarfissaqalernini pilluaatigigaluarlugu timini sivisuumik eqqissineq ajulersoq oqaluttuaraa. Containerimut nooreerluni suliffissarsiornissani takorluullattaaleruttorlugu suliffigisimasaminit sapaatip-akunnera kingulleq saaffigiteriasaarpoq. 

Pilersuisup iffiorfiani unnuarsiortutut paarlattaasinnaanerluni aperineqarami nalorninani akuersivoq. 

- Inuit akornanniileriataarluni angerlarsimaannarunnaarluni iluaqaaq. Massakkut suleqatigilikkakka siornatigut suleqatiginikuugakkit aamma, illartaqaagut, Lars Peter oqilisimarpasilluni oqaluttuarpoq. 

Paarlattaanermini sulinini ingerlalluariarpat aalajangersimasumik sulilersinnaanini periarfissaammat takutitsilluarusuppoq. 

Containerit inissiat sivisunerpaamik ukiuni marlunni najorneqarsinnaapput, taakkunaniissagaannilu inissarsiortutut nalunaarsorsimanissaq piumasaqaatinut ilaavoq. Nammineerluni angerlarsimaffittaarnissaq Lars Peterp anguniagaani tullinnguuppoq. 

- Neriuutigiuaannarpara nammineq angerlarsimaffittaarnissaq suliuaannalernissarlu.  Eqqarsaatinniiginnaavittarpoq angerlarsimaffittaarnissaq, Lars Peter naggasiilluni taama oqarpoq.