Løkke: Rusland eqqissinissaq pillugu isumaqatigiinniaqataarusuinngilaq
Vladimit Putinip piumasaqaatini "annertunerpaat" attatiinnarpai, sakkuaakkunnaarallarnissamillu kissaateqarani, Løkke oqarpoq.
Ruslandip Ukrainellu akornganni eqqissinissamik isumaqatigiinniarnerit ulluni makkunani tusagassiorfinnik sammineqangaatsiaraluartut, nunanut allanut ministerip Lars Løkke Rasmussenip (M) Ruslandip eqqissinissamik kissaateqarneranik takusaqarsinnaanngilaq.
Assi: Olivier Hoslet/EPA/Ritzau Scanpix
Ruslandip Ukrainellu akornganni eqqissinissamik isumaqatigiinniarnerit ulluni makkunani tusagassiorfinni sammineqangaatsiaraluartut, nunanut allanut ministerip Lars Løkke Rasmussenip (M) Ruslandip eqqissinissamik kissaateqarneranik takusaqarsinnaanngilaq.
Nunanut allanut ministerit Bruxellesimi ataasinngornermi ataatsimiinnissaanni apuunnermini taama oqarpoq.
- Isumaqatigiinniarnernik Abu Dhabimi aallartitsoqarmat tigusanillu paarlaasseqatigiittoqarmat ajunngivippoq.
- Kisianni aamma isumaqarpunga unneqqarilluta oqaatigisariaqaripput isumaqatigiinniavinnissanut tunngavissaqarpasinngitsoq, Løkke oqarpoq.
EU-lli pisortatigoortuunngitsumik Europa sinnerlugu aallartitassanik Dublinimi tallimanngormat toqqaanera ajunngitsutut isigaa.
Nunat E5-it – Frankrig, Tuluit Nunaat, Tyskland, Polen aamma Italien, EU Kommissionimiit aamma Rådimit sinniisut aallartinneqassapput.
- Maanna paasivarput kikkut oqaloqatigiinnerni peqataassanersut. Kisianni annerusumik iluatitserpassinngilagut.
- Tulleriiaarinerit inissinnissaat pingaaruteqarpoq. Sakkuaakkunnaarallarnissamik aallarniuteqartariaqarput, Lars Løkke Rasmussen oqarpoq.
EU-mi ilaasortat naalagaaffiisa naalakkersuisuisalu siuttui Dublinimi aamma taama siunniussaqarput.
Sakkuaakkunnaarallarnissamik siunnerfeqarneq siulliunneqarpoq. Kingornalu eqqissinissaq pillugu isumaqatigiissut. Taannalu inissereerpat allat eqqartorneqarsinnaapput, soorlu Europami sillimanianermi iliuusissat, sorsunnerup ingerlaannarnerani Ruslandip eqqartorusutai.
RITZAU