Løkkep nalunaarutigineqartoq uppernarsarpaa: USA Danmarkilu Kalaallit Nunaannut tunngatillugu siunnerfigisamiileqqipput
Inerniliinissaq siusippallaartoq, Kalaallit Nunaannulli tunngatillugu siunnerfiup attateqqilernera iluatsippoq, Løkke oqarpoq.
Nunanut allanut tunngasunut ministerip Lars Løkke Rasmussenip (M) USA, Danmarki Kalaallit Nunaallu Washingtonimi suleqatigiissitami Issittumi isumannaallisaanerup pitsanngorsarnissaanut aaqqiissutissarsiorsinnaanissaat neriuutigaa.
Assi: Simon Wohlfahrt/AFP/Ritzau Scanpix
Kalaallit Nunaat pillugu suleqatigiissitap USA-p peqataaffigisaat siullermeerluni ataatsimeeqqammerpoq, imalu ingerlalluartigaaq illuatungeriit "siunnerfigisaminniileqqillutik".
Suleqatigiissitap Washington D.C-mi perngaammik ataatsimiinnera pillugu nunanut allanut ministeri Lars Løkke Rasmussen (M) oqarpoq.
- Nunanut allanut tunngasunut ministerip Marco Rubiop ippassaq oqaasii uppernarsarsinnaavakka. Atorfilittat qaffasinnerit naligalugit Washingtonimi siullermeerluta ataatsimiippugut.
- Ataatsimiinneq ingerlalluarpoq. Isumaqatigiissutigineqartut oqaloqatigiissutigineqarlutillu naammassineqarput, ataatsimiinnissallu allat pilersaarusiorneqarput. Imaanngilaq pissutsit aaqqittut, ajunngillalli, Washingtonimi isumaqatigiissutigisagut uterfigaagut, Lars Løkke Rasmussen oqarpoq.
Allamut sanguneq pissutsillu ajorsiartortut
Løkkep "siunnerfigisaminiileqqinneq" suleqatigiissitaliami aaqqiissutissanik oqaloqatigiissuteqartoqarnissaa pillugu isumaqatigiissut pivaa. Taanna Washingtonimi Løkkep nunanullu allanut tunngasunut naalakkersuisup Vivian Motzfeldtip ullut 15-it matuma siorna ataatsimiigiarneranni isumaqatigiissutigineqarpoq.
- Tamatuma kingorna allamut sangusoqarlunilu pissutsit ajorsiartorput. Maannali siunnerfigisatsinniileqqippugut. Arlaleriarlungalu oqaatigeriikkattut, USA-p isumannaallisaanermut tunngasunik isumakuluutai uagut soorunami aamma isumakuluutigaagut.
- Nato-p qanimut suleqatigineratigut USA-p, Kalaallit Nunaata Danmarkillu oqaloqatigiinneratigut tamanna aaqqikkusupparput, Lars Løkke Rasmussen oqarpoq.
Løkke illuatungeriit “angusaqarfiusussamik oqaloqatigiinnissartik” Washingtonimi isumaqatigiissutigigaat oqarpoq. Taamaaliornikkut Amerikamiut isumannaallisaanikkut soqutigisaat piviusunngortinneqarlutillu Kunngeqarfiup “killissai” ataqqineqassammata, tassaasut “nammineq oqartussaassuseqarnerput ataatsimullu killeqarfeqarneq kalaallillu namminneq aalajangiisinnaatitaanerat”.
Isumalluarnerulaartoq
- Sulili inerniliinissaq siusippallaarpoq, sapaatilli-akunnerata siulianut sanilliullugu isumalluarnerulaarpunga, Lars Løkke Rasmussen Washington D.C.-mi pingasunngormat ataatsimiinneq pillugu oqarpoq.
Suleqatigiissitaliaq Lars Løkke Rasmussenip, nunanullu allanut tunngasunut naalakkersuisup Vivian Motzfeldtip, USA-p præsidentiata tullersortaata, J.D. Vancep USA-llu nunanut allanut tunngasunut ministeriata Marco Rubiop Washingtonimi januaarip 14-ianni ataatsimiinnerminni isumaqatigiissutigaat.
Isumaqatigiissuteqarnerup aqaguani Kalaallit Nunaata tiguarneqarnissaanut Trumpip aqutsisuisa sioorasaarinertik sakkortusiartulerpaat.
Trumpilli Natop allattaanera Mark Rutte Issittumi isumannaallisaanerup pitsanngorsarneqarnissaa Nunarsuarmi Aningaasaqarneq pillugu Schweizimi Davosimi ataatsimeersuarnermi isumaqatigiissuteqarfigaa.
Trumpip akitsuutinik sioorasaarinini aamma taamaatippaa, taamaalillunilu Washington D.C-mi suleqatigiissitaq Løkkep Motzfeldtillu januaarip aallartinnerani tikeraarneranni pilersinneqartoq attanneqaqqilersimagunarpoq.
- Tamanna nuannerpoq, isumatusaartumillu oqaloqatigiilernerput nuannaarutigivissorpara, oqaloqatigiillualernittalu qanoq kinguneqarsinnaanera isumaliutigalugu unammillernartumiinnissaa kissaatiginngilara.
- Suliaq suli aaqqiivigineqanngilaq, aallartippugulli anguniagaqarfiussaarlu, Lars Løkke Rasmussen oqarpoq.
/ritzau/
