Isumaqatigiissut pillugu Trumpi qisuariarnera, Løkkep naammagisimaarinnittutut nalilerpaa

USA-p, Kalaallit Nunaata Danmarkillu akornanni isumaqatigiissut isumaqatiginninniutigineqareersoq amerikamiut præsidentiata tallimanngormat nalunaarutigaa.

Tamannalu Amerikamiut isumaqatigiissutip imarisaa naammagisimaaraat isumaqartinneqarsinnaavoq, nunanut allanut tunngasunut ministeri isumaqarpoq.

- Præsidenti nammineerluni avammut nalunaaruteqassalluni aalajangerpoq, tamannalu ersarissumik takussutissaavoq qaffasinnerusumik suleqatigiissitami isumaqatigiissut pitsaasoq anguneqarsimasoq taanna isumaqartoq, Lars Løkke Rasmussen USA-mut tikinnermini ataasinngornermi unnuakkut USA-p, nalunaaqutaa malillugu.

Nunanut allanut tunngasunut ministeri New Yorkimi FN-ip ataatsimeersuarneranut atatillugu sapaatip akunnerata aallartinneraniilli ataatsimiippoq.

Lars Løkke Rasmussenip nammineq isumaqatigiissut qaammatini arfineq-pingasuni kingullerni isumaqatiginninniutigineqartoq naammagisimaarpaa, tassami taamani nunanut allanut ministeriusimasoq Vivian Motzfeldt peqatigalugu januaarimi Amerikamiut isumaqatigiissutigaat USA-mit, Kalaallit Nunaannit Danmarkimillu atorfilittat qaffasissut peqataatillugit pingasunik suleqateqarnikkut sulineq aallartinneqassasoq.

Diplomatit ataatsimiinnerat Donald Trumpip Kalaallit Nunaat tiguarniarlugu ukiortaap kingorna oqareernerata kingorna aallartippoq.

- Isumaqatigiissuteqarutta, tamannalu atsiorneqareerpat aatsaat paasissavarput, soorunami imarisaa naammagisimaarilluinnassavara. Tamanna aamma naalagaaffeqatigiinni tamarmi pissutissaalluarpoq. Tassa taakkuupput maannamut oqaatigisinnaasakka, Løkke oqarpoq.

Isumaqatigiissut suli atsiorneqarsimanngilaq, taamaattumillu suli aalajangerneqarsimanngilaq, USA-mi nutaarsiassaqartitsiviit naapertorlugit naatsorsuutigineqarpoq atsioqatigiinneq marlunngornermi ingerlanneqassasoq.

Kalaallit Nunaat pillugu isumaqatigiissut tunngavigalugu USA sakkutooqarnermik annertuumik Kalaallit Nunaanni pilersitsissasoq, USA-p præsidentia tallimanngormat oqarpoq.

Tamanna pillugu Danmarkimi nunanut allanut tunngasunut ministeri ima oqaaseqarpoq:

- Isumaqatigiissut pillugu oqaaseqassanngilagut, aallaqqaammulli oqarnikuuvugut USA-p sillimaniarnerminik soqutigisaanik naapertuilluartunik isumaginninnissamut ammasugut, soorlu kunngeqarfik ukiorpassuarni taamaassimasoq.

- USA-p Kalaallit Nunaanni sakkutooqarfii siornatigut 17-iusimagaluarput. Maanna ataasiinnaavoq, taamaattumik tamanna tunngavigaarput. Neriuppungali ullualuit qaangiuppata isumaqatigiissuteqassalluta, Lars Løkke Rasmussen oqarpoq.

USA-p præsidentiata siorasaarinera Kalaallit Nunaannut sunniuteqarpoq. Pissaaneq atorlugu tiguaanissamik siorasaarinerit kalaallit ulluinnarni tusaraangamikkit ’artornartartoq´, Naalakkersuisut siulittaasuat Jens-Frederik Nielsen januaarimi oqarpoq.

Danmarkip nunanut allanut tunngasunut ministeriata Kalaallit Nunaata pisariaqartitaanik toqqissisoqarnissaa qilanaaraa.

- Isumaqatigiissutip kingunerisaanik pissutsit eqqissaallassinnaapput, tamannalu ingammik Kalaallit Nunaanni annertuumik toqqissisimatitsisimanngilaq, soorlu nammineq Kalaallit Nunaannut angalaninni aamma kalaallit politikeriinik Danmarkimilu kalaallinik oqaloqateqarninni misigisara.

- Tassa, isumaqarpunga tamanna pingaarnerpaajusinnaasoq, imarisaalu kingusinnerusukkut uterfigisinnaasarput, nunanut allanut ministeri oqarpoq.

RITZAU