Tusagassiuut: USA-p Kalaallit Nunaanni sakkutooqarfiit marluk ammarnissaat pilersaarutigaa

USA Kalaallit Nunaanni sakkutooqarfiit nutaat marluk pilersinniarlugit pilersaaruteqarpoq. DR-ip tamanna ataasinngornermi unnukkut paasivaa.

Sakkutooqarfiit taakkua Kalaallit Nunaanni sumi inissinneqarnissaat pillugu suli paasissutissat erseqqissut saqqummiunneqanngitsut, tusagassiorfik allappoq.

Ministeriuneq Mette Frederiksen ulluni makkunani New York-imiippoq. USA-p præsidentia Donald Trump aamma Naalakkersuisut Siulittaasuat Jens-Frederik Nielsen peqatigalugit Kalaallit Nunaannut tunngasumik illersornissamut isumaqatigiissut marlunngornermi atsiussavaat.

Atsioqatigiinnissaq marlunngornermi nalunaaqutaq danskit nalunaaqutaat malillugu 16.30 FN-ip illuutaani pissasoq naatsorsuutigineqarpoq.

Ministeriuneqarfik tallimanngornermi nalunaarpoq, Danmark, USA aamma Kalaallit Nunaat sapaatip-akunnerani matumani isumaqatigiissummik atsioqatigiittussaasut. Isumaqatigiissutip Issittumi Atlantikullu Avannaani isumannaallisaanermut suleqatigiinneq nukittorsassavaa.

Isumaqatigiissut pillugu maannamut paasissutissat ikittuinnaat saqqummiunneqarsimapput.

Donald Trump Truth Social-imi tallimanngornermi allappoq, isumaqatigiissutip ilaatigut USA-mut Kalaallit Nunaanni “isumannaallisaanermut pisariaqartitanullu allanut tamanut ataavartumik aqutsineq” qulakkiissagaa.

Mette Frederiksenilli erseqqissarpaa isumaqatigiissummi “kunngeqarfiup naalagaaffittut kiffaanngissuseqarnera aamma nunap immikkoortuini ataqatigiissuunera, kiisalu Kalaallit Nunaanni innuttaasut namminneq aalajangiisinnaatitaaffiat” akuerineqartoq.

Taassuna tamanna ataasinngornermi unnukkut New York-imi DR-mit aamma TV 2-mit apersorneqarnermini oqaatigeqqippaa.

- Nammineq oqaasissaqarneq tunniutinngilarput, Danmarkimilu ministeriunertut tamassuma tunniunnissaanut piareersimanngisaannarpunga. Tunngaviusumik inatsiserput malissavara, Mette Frederiksen tusagassiorfinnut taakkununnga marlunnut oqarpoq.

– Taamaakkaluartoq nammineq oqaasissaqarneq attatiinnarlugu nunanik allanik isumannaallisaanikkut illersornikkullu suli qaninnerusumik suleqatigiittoqarsinnaavoq, oqarpoq.

Mette Frederiksen isumaqatigiissutip imarisai pillugit paasissutissanik amerlanerusunik saqqummiussiumanngilaq, isumaqatigiissut marlunngornermi atsiorneqartinnagu.