Namminersornerullutik oqartussani pisortaanerusimasup isumaqatigiissut USA-mut atassuteqaatinik nalinginnaasunngortitsinissaa neriuutigigaa

Kingullermik Amerikamiut sakkutooqarnikkut Kalaallit Nunaanniinnerat pillugu annertuumik 2004-mi Igalikumi isumaqatigiissuteqartoqarpoq. Igalikumi isumaqatigiissut illersornissamut isumaqatigiissummut 1951-meersumut ilassutitut isumaqatigiissutaavoq, Kalaallillu Nunaat suleqatitut USA-mit akuerineqarpoq.

Kaj Kleist taamanikkut namminersornerullutik oqartussani pisortaaneruvoq, taamanikkullu Amerikamiunik attaveqarnerup immikkoortuni arlalinni ajornakusoornera patsisigalugu, sakkutooqarfiillu tamanut matoqqasorujussuarmik ingerlataammata, isumaqatigiissut annertuumik aalassassutaavoq.

Taamanikkut nunanut allanut naalakkersuisoq Josef Tuusi Motzfeldt USA-p Danmarkilu peqatigalugit Igalikumi isumaqatigiissusiortuuvoq.

– Pisoq annertoorujussuuvoq, taamanikkummi siullermeerluta Amerikamiut sakkutooqarfii pillugit isumaqatigiissutip immikkoortuanik atsioqataaqqaarpugut, Kaj Kleist oqaluttuarpoq.

Isumaqatigiissutip nutaap qanoq imaqarnera takussallugu soorunami soqutigisupilussuullugu ilanngullugu oqarpoq, tassanilu nipip qanoq ittup atorneqarumaarnera alaatsinaakkumavaa.

Donald Trumpip ukiuni kingullerni ilungersunartorsiortitsinera eqqaassanngikkaanni, 2004-p kingorna USA-p, Danmarkip Kalaallillu Nunaata akornanni pissutsit oqaloqatigeeriaaserlu pitsaanerulersimasoq, Kaj Kleist naliliivoq:

– Ullumikkut pissutsit ukiut 20-t matuma siornanit allaanerunerat oqaatigisinnaavara. Inuit ammanerulersimapput. Namminersornerulluni oqartussaanermut maannalu namminersorluni oqartussaanermut aamma tunngatillugu, Kalaallit Nunaat Amerikamiut suliffeqarfiinik pitsaasumik suleqateqartarpoq.

Nunat suleqatigiilluartut

– Suleqatigiinnermik anersaaqarpoq kikkut tamarmik illersorumasaannik, Amerikamiut, kalaallit danskillu anersaap tamatuma attatiinnarnissaa soqutigisaraat.

Kaj Kleistili annertunerusumik oqaaseqaqqinnginnermini isumaqatigiissut takoqqaarumavaa, pingaarnertulli neriuuteqarpoq:

– Ukiualuit kingulliit pisimasut eqqarsaatigalugit Kalaallit Nunaata, Danmarkip USA-llu akornanni pissutsit nalinginnaasunngorteqqinneqassasut neriuppunga, tamatumanimi Amerikamiut præsidentiata Kalaallit Nunaat tigungajalluguluunniit naalagaaffimminut ilanngutingajavippaa.

– Nunani killerni aallartitaqarnermi malittarineqartut atorlugit nalinginnaasumik pissutsit nalinginnaaleqqikkumaarnersut takussavarput.

Kalaallit Nunaata, Danmarkip USA-llu akornanni isumaqatigiissut marlunngornermi Naalagaaffiit Peqatigiit New Yorkimi ataatsimeersuarneranni atsiorneqassasoq ilimagineqarpoq. Naalakkersuisut Siulittaasuat Jens-Frederik Nielsenip (D), ministeriunerup Mette Frederiksenip USA-llu præsidentiata Donald Trumpip isumaqatigiissummik atsiornermut atatillugu naapinnissaat ilimagineqarpoq.