Mattaarniartuusartut pillugit nalunaarutit marluk angullu biilinik ajutoornermi kingorna tigusarineqartoq

Innuttaasut Facebook aqqutigalugu pisiniaraangamik mianersornerusassapput.

Kalaallit Nunaanni Politiit sisamanngornermi peqquserlunnernik marlunnik nalunaarfigineqareertullu, pigaartut pisortaat Aputsiaq Hansen taamatut kaammattuuteqarpoq.

Nalunaarutiginnittut marluk Nuummi najugaqarput, Facebookilu aqqutigalugu qilalukkap qernertap mattaanik pisisimallutik. Pisisup aappaa 1.650 koruuninik akiliisimavoq aappaalu 2.900 koruuninik akiliisimalluni, tamarmilli pisiatik tigusimanngilaat.

Politiit taakku suliat marluk misissorpaat, pigaartullu pisortaata erseqqissarpaa mianersoqqussut soorunami taamaallaat mattannik pisinermut tunngatinneqarani nioqqutissanut allanut Facebook aqqutigalugu tuniniarneqartunut tamanut tunngasuunera.

Angut ajutoornermi kingorna tigusarineqartoq

Nuup illoqarfiata qeqqani tallimanngornerup ullaassaani nalunaaqutaq 04.02 angallannikkut ajutoortoqartoq politiinut nalunaarutigineqarpoq.

Biilit kussinermut nakkarsimapput, angullu aalakoorpasittoq biilimit niusoq takuneqarsimalluni.

Politiit ornigupput, biilertorlu ajutoornermi ajoqusernani, imigassartorsimalluni biilersimasutut pasineqarluni tigusarineqarpoq.