Meeqqat ujaarineqartut

Ilulissat avannaani meeqqat marluk sisamanngornermi unnukkut ujaarineqarput.

Kalaallit Nunaanni Politiit pigaartuisa pisortaat Jeppe Ansager, taamatut paasissutissiivoq.

Meeqqat marluk, aqqaneq-marlunnik aqqaneq-pingasunillu ukiullit sisamanngornermi ualikkut pingasunut qiteqquttoq illuaqqamit anisimapput. Meeqqat kommune neqerooruteqarnerani illuaqqamiipput.

Meeqqat kujammut ingerlaarsimapput, ujaasinerlu sisamanngornermi ualikkut kinguneqanngimmat, politiit SAR-imik ujaasissallutik unnukkut qulip missaani aalajangerput.

Meeqqat marluk ujaariniarlugit, politiit umiatsiamik ikaarunneqarput. Issittumilu Sakkutooqarfik aqqutigalugu qulimiguulik aamma ujaasisoqarluni.

Meeqqat ajunngitsut nassaarineqartut nalunaaqutaq 03.53 nalunaarutigineqarpoq. Illuaqqami sinittut nassaarineqarput, Jeppe Ansager oqaluttuarpoq.

Kommuni, meeqqallu ilaqutaat ilisimatinneqartarput.

Pisiniarfimmi tillinniartoqarmat immiaaqqat tupallu tillinneqarput

Ujaasinerup saniatigut, Maniitsumi pisiniarfik Akiki tallimanngornerup unnuaani tillinniarfigineqarsimasoq, pigaartut pisortaat oqarpoq.

Pisiniarfimmi kalerrisaarut nalunaaqutaq 03.41 aallartippoq, Matu Securitymillu pigaartoq orniguppoq.

Pigaartut pisortaat naapertorlugu nakkutilliinermut atortunik misissuinermi paasinarsivoq inuit sisamat pisiniarfimmut tillinniarlutik isertut, tupanik immiaaqqanillu karsinik pingasunik tigusisinnarlutik qimaasimapput.

Politiit pisumut takunnissimasinnaasunik ujaasipput. Takunnittullu politiinut 70 14 48-mut sianerlutik saaffiginnissinnaapput.

Kamik Deres Tankimi Nuummiittumi tillinniartoqarneranik Politiit tallimanngornermi ullaakkut nalunaaqutaq 06.03 nalunaarfigineqarput.