Kalaallit Nunaat ukkataralugu qaannanik ingerlaaqatigiinneq malinnaavigineqarluartoq

Inuit tusindillit Københavnip umiarsualivia aqqusaarlugu qaannamik sapaatiummat ingerlaaqatigiipput. Ingerlaaqatigiinnermi Kalaallit Nunaata erfalasuanik amerlasuunik, oqalugiartunik, nipilersortunik qilaatersornermillu, FN-ip nunarsuarmi nunat inoqqaavisa ulluat malunnartinneqarpoq.

Taamatut Danmarkimi kalaallit kattuffiat Uagut tusagassiutitigut nalunaarummi paasissutissiivoq.

Uagut, Mellemfolkeligt Samvirke peqatigalugu ingerlaaqatigiinnermik aaqqissuisuupput, Uagumilu pisortap Julie Rademacherip oqalugiaammik ingerlaaqatigiinneq ammarpaa.

Ingerlaaqatigiinnermi qaannamik angalaneq katersuunnissamut periarfissaalluartartoq taanna oqaluttuarpoq:

”Qajaq kalaallit kulturiannut kinaassusiannullu ilisarnaataalluarpoq. Kalaallit Nunaanni inuunermut ukiuni tusindilinni attuumassuteqarluinnartoq. Aammattaaq qajartorneq qallunaanit nuannarineqartorujussuuvoq, aamma Kalaallit Nunaat kalaallillu kulturiat soqutigineqarneruleriartorput.”

“Taamaattumik qajaq katersuuffittut, inuit ataatsimoortinnissaannut, oqaloqatigiinnermik pilersitsinissamut, Kalaallit Nunaatalu Danmarkillu akornanni ataqatigiinnermik nukittorsaanissamut katersuuffissatut periarfissatsialaavoq,” Julie Rademacher oqarpoq.

Folketingimut ilaasortaq Qarsoq Høegh-Dam (N) ingerlaaqatigiinnermi aamma oqalugiarpoq. Kalaaleq isiginnaartitsisartoq erinarsortartullu Nukâka Coster-Waldau nipilersortartoq Kristoffer Jul peqatigalugu, Inuánimamik imminut taasut umiarlummi qilaatersornermik ingerlaaqatigiinnermi takutitsipput.

Ofelia Plads saani Andreas Keil, Københavnimi suliffissaqarnermut, akulerutsitsinermut inuussutissarsiornermullu borgmesteri oqalugiarpoq, umiarlummiit nipilersorneq erinarsoqatigiinnerlu kingorna ingerlanneqarlutik.

Qaannamik ingerlaaqatigiit Sandkajimi Nordhavnimiittumi nipilersornermik erinarsoqatigiinnermillu naggataarput, Mellemfolkeligt Samvirkemilu allattaaneq Tim Whyte, oqalugiarpoq.