Meeqqat sikumi isumannanngitsumiittut: Navianartorsiortoqarsinnaaneranik politiit mianersoqqusipput

Naak siku suli isumannaraluartoq, Qaqortumi Tasersuarmi meeqqat qeqertamut ingerlaarsimapput. Politiit upalugaarsimanermilu suliaqartut sakkortuumik maanna mianersoqqusipput

Siku isumannaatsumik nalilerneqartinnagu Tasersuaq angallavigineqarsinnaanngilaq. Siku isumannarunnaarpat nalunaarutigineqassaaq.
Saqqummersinneqarpoq

Kalaallit Nunaanni Politiit aamma Kommune Kujallermi Upalungaarsimasut Qaqortumi Tasersuarmi meeqqat sikumi isumannartukkut ingerlaarneranni aggersarneqarput.

Taama Kommune Kujalleq nittartakkamini allappoq, aammali sakkortuumik mianersoqqusivoq.

Tamanna Kommune Kujallermi politiit pisortaata Michael Karstenskovip ernummatigaa.

– Qaqortumi Tasersuarmi ippassaq pisup kingorna sikup qanoq navianartiginera meeqqat ilumut ilisimaneraat assut isumakuluutigaara. Siku maanna angallavigissallugu suli saappallaarpoq. Taamaattorli meeqqat tatsip qeqqanut avalassimasut takuavut, oqarpoq.

Taassuma naqissuserpaa Tasersuaq itisoorujussuusoq sikullu ataa sakkortuumik sarfaqartoq.

- Taamaammat siku aserorpat erniinnaralaaq navianartorsiortoqalersinnaavoq.

Politiit pisup kingorna kommuni, atuarfik meeqqallu angajoqqaavi attaveqarfigaat.

Politiit upalungaarsimasullu angajoqqaat tamaasa kajumissaarpaat sikumi angalanerup navianaatai pillugit meeqqaminnik oqaloqateqartarnissaannik.

- Imaanngilarlu aatsaat annertuumik ajutoortoqarpat pissutsit pimoorunnialissagivut, Michael Karstenskov oqarpoq.

Siku angallavigineqarsinnaaneranik naliliisoqartinnagu Tasersuaq angallavigineqarsinnaanngilaq. Siku isumannarunnaarpat nalunaarutigineqassaaq.

Powered by Labrador CMS