Meeqqeriviit 2028-miit akeerutissasut , nalunaarutigineqarmat Pia Clasen Lundblad nuannaatsanngilaq. Paarlattuanilli taanna misigivoq.
Angajoqqaat amerlasuut meeqqerivimmiittarnermut akiliutimmik sipaaruteqarsinnaalernissartik qilanaarigaluaraat, Pia Clasen Lundblad, Nuummi perorsaasutut sulisoq, ernumassuteqarpoq.
Meeqqeriviit 2028-miit akeerutissasut , nalunaarutigineqarmat Pia Clasen Lundblad nuannaatsanngilaq. Paarlattuanilli taanna misigivoq.
Angajoqqaat amerlasuut meeqqerivimmiittarnermut akiliutimmik sipaaruteqarsinnaalernissartik qilanaarigaluaraat, Pia Clasen Lundblad, Nuummi perorsaasutut sulisoq, ernumassuteqarpoq.
- Eqqarsaatigilluagaanngitsumik aalajangiisoqarsimasoq isumaqarpunga, taanna oqarpoq.
2027-mut aningaasanut inatsisissatut isumaqatigiissummi, meeqqerivinni angajoqqaat akiliuteqartarnerat januaarip aallaqqaataa 2028 aallarnerfigalugu, atorunnaarsinneqassasoq partiit sisamat Demokraatit, Inuit Ataqatigiit, Siumut aamma Atassut isumaqatigiissutigaat.
Augustine Møller meeqqerivinni suliffimmi qimannissaanik nammineq aalajangerpoq. Meeqqanik toqqaannartumik sullissilluni tassani siusinnerusukkut sulivoq. Sulinermini atugassarititaasut artukkerneqarsimanerat, sulisussaaleqineq kiisalu akissarsiat inuuniutissatut naammanngitsut pissutigalugit taama aalajangerpoq.
Assi: Oscar Scott Carl
Angajoqqaat meeqqatik meeqqerivimmiitittarnerannut siunissami akiliuteqartarunnaarnissaat, tamatuma kingunerissavaa. Taarsiullugu aningaasartuutit Nunatta Karsianit akilerneqartassapput.
Pia Clasen Lundblad perorsaasutut ilinniarnini 2011-mi naammassivaa. Sermitsiami allaaserisat ilaanni ”Assaat kissalaartut amigaataanerat”-ni ulloq sulisussanik amigaateqarfiusoq, ilaatigut perusuersartarfiliarnissamut allaat piffissaqartannginneq kiisalu meeqqat isumassorneqarnissamut sulisut kissaatigisaattut attaveqarfigineqarnissamullu piffissaqarfigineqanngitsut pillugit apriilimi oqaluttuarpoq.
Nutaanik nalunaaruteqartoqarneratigut meeqqerivinni pissutsit pitsanngoriarnissaanut Pia Clasen Lundbladip naatsorsuutigisai annertunngillat. Paarlattuanik pissutsit suli ajornerulernissaannut ernumassuteqarpoq.
- Sipaarniuteqartoqareersorlu, naatsorsuutigaara pissutsit suli ajornerulissasut. Meeqqeriviit akeerutissappata, aningaasat arlaatigut sumiiffinni allaniit aaneqassasut naatsorsuutigaara, taanna oqarpoq.
Aaqqissuussinermut tassunga ukiumut 37 millionit koruunit 2028-miit 2030-mut immikkoortinneqarput. Naalakkersuisut allannguutissatut pisariaqartut 2027-ip ingerlanerani piareersassavaat, kommuninillu meeqqerivinnik ingerlatsisuusunik isumaqatigiissusiussallutik.
Sumiginnagaasutut misigivoq Augustine Møller, perorsaasutut isumaginninnermilu ikiortitut ilinniagaqartoq, meeqqeriviit akeqarunnaarnissaannik aalajangernermut isornartorsiuisut ilagaat.
- Akuerineqarsinnaanngilaq. Sooq meeqqerivinni sulisunut immikkut eqqumaffiginninnerunissaq salliutinneqanngila? Sooq akissarsiavut qaffanneqanngillat? Ulapippallaarluta sulereerpugut, taanna oqarpoq.
Perorsaasut, isumaginninnermi ikiortit ikiortaasullu allat peqatigalugit soqutigineqanngitsutut misiginini taassuma oqaluttuaraa.
- Isigineqanngitsutut misigivunga. Meeqqanik sullissisuusugut salliutinnata taamatut aalajangiisoqarnera akueriuminaappoq.
Angajoqqaat akiliuteqartarnerisa atorunnaarsinneqarnissaa eqqunngitsumik aalajangiinerusoq perorsaasoq Pia Clasen Lundblad isumaqarpoq. - Isumaqarpunga aalajangiineq eqqarsaatigilluagaanngitsoq aalajangiunneqarsimasoq, taanna oqarpoq.
Assi: Oscar Scott Carl
Kisimiilluni pilersuisutut perorsaasutut sulinermi saniatigut allamittaaq suliffeqartariaqarsimalluni , ilaqutariit aningaasaqarnerannik ingerlatsiinnarnissamut akissarsiani naammassimanngimmata, Augustine Møller apriilimi Sermitsiamut oqaluttuarpoq.
Augustine Møller meeqqerivimmi suliunnaassalluni nammineq aalajangerpoq. Sulinermi atugassarititaasut artukkerneqarsimanerat, sulisussaaleqineq kiisalu akissarsiat inuuniutissatut naammanngineri pissutigalugit taama aalajangerpoq.
Taamaakkaluartoq aalajangiinerup pitsaasortai aamma takusinnaallugit taassuma erseqqissarpaa. Ingammik ilaqutariinnut aningaasaqarnikkut ajornartorsiuteqartunut tamanna iluaqutaassaaq.
- Angajoqqaanut aningaasaqarnernikkut ajornartorsiuteqartunut tamanna iluaqutaassasoq paasilluarsinnaavara. Soorunami taakkununnga pitsaasuuvoq. Meeqqerivinnili sulisut salliutinneqartariaqartut isumaqarpunga, taanna oqarpoq.
Angajoqqaat: Meeqqeriviit akeerunnerat ajornartorsiutinik aaqqiissutaassanngilaq Aalajangiineq perorsaasut sulisullu akornanni taamaallaat ernumassutigineqanngilaq. Angajoqqaattaaq meeqqerivinni pissutsit pillugit naammagittaalliorput.
- Taama pakatsinartigisumik kissaatigisatta akerlianik aalajangiisoqarnera akuerineqarsinnaanngilaq, Evannguaq Olsen Cortzen oqarpoq.
Angajoqqaaqatini peqatigalugit Nuummi meeqqeriviup Nukariit sulisussaaleqiffiungaarnera pillugu akerliussutsimik ukioq manna siusinnerusukkut taanna, takutitsivoq.
Angajoqqaat akerliussutsimik takutitsinermut peqataasut ilaat suli attaveqarfigisarlugit, taakkulu pingaarnersiuineq qanoq ingerlanneqarnera paasiuminaatsikkaat oqaluttuarpoq.
- Tupaallappunga paasinngilaralu sooq taama aalajangiisoqarnersoq. Allaat eqqarsarpunga immaqa uagut nipangersarniarluta taamaaliortoqarsimasoq, Evannguaq Olsen Cortzen oqarpoq.
Meeqqanut sulisunullu atugassarititaasut pitsaanerulersinneqartariaqartut angajoqqaat akerliussutsimik ukioq manna siusinnerusukkut takutitsigamik, oqariartuutigaat. Ilaatigut sulisunut akissarsiat qaffanneqarnissaat aamma kissaatigaat.
Ajornartorsiutit pillugit siusinnerusukkut angajoqqaat oqariartuutigisimasaannut, tamanna aaqqiissutaanngitsoq taanna isumaqarpoq.
- Immaqa angajoqqaat meeqqerivimmiititsinermut annertuumik akiliisartut aningaasatigut sipaaruteqarsinnaapput, meeqqanulli sulisunulluunniit atugassarititaasut pitsaanerulersinneqarnavianngillat, taanna oqarpoq.