MIO-p USA-mit tatineqarnerup nalaani meeqqat atugarissaarnerat misissorpaa

Meeqqat Illersuisuat Stina Sværd qanittukkut atuartunut pulaarpoq. Kalaallit Nunaata USA-llu akornanni ajornartoornermut atatillugu meeqqat eqqarsartaasiat misissorniarlugu pulaarpoq.

Atuartut taakkualu angajoqqaavi paarsisuiluunniit meeqqat Kalaallit Nunaanni pissutsinut isiginnittaasiat misissorniarlugu immersugassanik apeqqutinik imalinnik nassinneqarsimapput.

- Meeqqat pissutsimi tassani qanoq eqqarsartarnersut misigisarnersullu pillugit paasisaqarnerorusukkaluarpugut, taamaalilluta apeqqutaannut akissuteqarnissamut pitsaanerusumik ikiuussinnaajumalluta, Stina Sværd tusagassiutitigut nalunaarummi oqarpoq.

Taannalu nangippoq:

- Meeqqat tusaaneqarnissartik pisinnaatitaaffigaat, aamma oqaatsit ukiunullu naleqquttumik paasissutissanik pissarsinissartik pisinnaatitaaffigaat. Meeqqat apeqqutaat tusarfinnit tutsuiginartunik akissuteqarfigineqarpata, nalunngilarput tamanna toqqissisimalersitsissasoq.

MIO-p meeqqat apeqqutaat akiniarpai

Inuit attaveqatigiittarfiisigut eqqunngitsumik paasissutissiisarneq meeqqanik siooralersitsillunilu ernumalersitsisarmat MIO-p meeqqat apeqqutaat katersorlugillu oqartussanut attuumassuteqartunut ilisimasalinnullu akissutissarsiorniarpoq.

Meeqqat atuarfiini atuartut akulliit angajulliillu aamma angajoqqaajusut paarsisuusulluunniit atuarfik aqqutigalugu immersugassanik tunineqassapput. Paarsisut angajoqqaallu meeqqatik immersugassamik immersuineranni ikioqqullugit MIO-mit kajumissaarneqarput.

- Nuna tamakkerlugu sapinngisamik amerlanerpaanik akissuteqarnissaq pingaaruteqarpoq, tassami meeqqat misigisaat pissutsillu assigiinngitsorujussuusinnaasarmata sumi najugaqarnerat aammalu qanoq periuseq apeqqutaatillugu. Meeqqat inuusuttullu eqqarsaatitik, misigissusiat aammalu ernumanartorsiornerat ilumut assilisassiarisinnaajumallugu pisariaqarpoq meeqqat inersimasullu tamarmik inuunermi pissutsinik inissisimaffimmiittut, Stina Sværd oqarpoq.

Kalaallit Nunaata USA-llu akornanni pisut pissutigalugit inuiaqatigiinni politikkikkullu atukkat toqqissisimajunnaarsitsillutillu apeqquterpassuaqalersitsinerisa nalaanni meeqqat inuusuttullu sunik pisariaqartitsinersut paasiniarnissaa pisariaqalersimavoq.

- Taamaattumik aamma neriuutigaarput meeqqerivinni meeqqallu angerlarsimaffiini sulisut meeqqat peqataanissaannut ikiuussinnaassasut, taamaalilluni aamma meeqqat inuusuttullu angerlarsimaffimminni najugaqanngitsut, aammalu ilinniarnerni taamaattuni tusarneqannginnissamik ulorianartorsiortartut, isiginnittaasiannik aamma paasisaqarsinnaassalluta, Stina Sværd naggasiivoq.

Immersugassat sisamanngornerup februaarip aqqaneq-aappaata tungaanut immersorneqarsinnaapput.