Naalakkersuisoq: Avannaani eqqagassalerineq pitsanngoriartunngilaq

Ammaannartumi, soorlu eqqaavissuarni ikuallaaneq inerteqqutaavoq. Eqqakkalli ajornartorsiutaasut upernarluni aput aakkaangat suli ajornartorsiutaanerulertarnerat takornartaanngilaq, aamma Avannaata Kommunianut.

Kommunip ammaannartumi ikuallaasinnaanissaminut qinnuteqaatini marsip 18-iani Avatangiisinut Naalakkersuisoqarfimmut nassiussimagaa, sulili akissummik utaqqillutik, Avannaata Kommuniani kommunalbestyrelsimut ilaasortaq, aamma teknikkimut ataatsimiititaliami siulittaasoq, Sakio Fleischer (S), Avatangiisinut Naalakkersusumut, Jørgen Rosbachimut (D), ammasumik juunip 16-iani allagaqarpoq.

 - Qinnuteqaat 18. marts 2026 nassiunneqartoq suli akissuteqarfigineqanngilaq. Naalakkersuisoqarfiup nalunaarutigivaa Naalakkersuisup atsiornera kisimi utaqqisaasoq. Taannalu ilisimatitsissutaat sivitsortumik nassuiaatigineqattarpoq, Sakio Fleischer allappoq.

Kommuni ammaannartumi ikuallaanissamut aasap sivisunerpaartaani akuerineqarsimasoq, Naalakkersuisoq kommunimut akissummini juunip 18-iani allappoq.

- Avannaata Kommunia ammaannartumi ikuallaasarnissamut immikkut ittumik akuersissummik 15. septembari 2026-p tungaanut tunineqarpoq, Jørgen Rosbach allappoq. 

Naalakkersuisut qanga akuersisimanersut akissummi allaqqanngilaq.

Jørgen Rosbachip qinnuteqaammik piffissami sivisuumi akiniaasaarsimaneq, tassa kommunip isornartorsiugaa, ima oqaasertalerpaa:

- Tusarniaasarneq ataatsimut isigalugu suliat ingerlasarneri peqqutaallutik qinnuteqaatip suliarinera piffissamik atuiffiungaatsiarsimavoq,

Naalakkersuisoq: Avannaata Kommunia pitsannguuteqanngilaq

Avannaata Kommuniani eqqagassalerinermik passussinneq ukiuni kingullerni amerlasuuni unammilligassaqarfiujuarpoq. Kommuni eqqagassat passunnerinut akisussaasuuvoq. Taamaakkaluartoq Naalakkersuisoq pitsaanerulertoqarneranik takusaqanngilaq.

- Naalakkersuisut ukiuni arlaqalersuni Avannaata Kommunia ammaannartumi ikuallaasarnissamut immikkut ittumik akuerineqarnissamik qinnuteqaataannut akuersisarsimapput. Kisiannili eqqagassalerinermi pitsannguutaasunik takusaqarsimanatik.

- Eqqakkanik ammaannartumik ikuallaasarnissamut immikkut ittumik akuersissuteqartarnerit taamaallaat eqqakkanik passussinermi ajornartoornermi aaqqiissutaagallartutut isigineqaraluarpoq, Jørgen Rosbach allappoq.

Tamannali kommunip pisariaqartikkallassagaa siulittaasup nassuerutigaa.

- Ukiunilu tulliuttuni suli ammasumik ikuallaanissamut pisariaqartitsineq atuuttussaassalluni, eqqangassalerinermi pittanngorsaatit naammassinissaannut,  Sakio Fleischer allappoq.

Taanna ammasumik allakkamini ilaatigut allappoq, kommunip eqqagassat passunnerinut ukiumut aningaasartuutigisartagai 30 millionit koruunit missaanniittut.

Eqqakkat alakkarniarai

Avatangiisinut Naalakkersuisoq Avannaata Kommuniani juulip naalernerani angalanissaminut pilersaaruteqarpoq. Tassani borgmesterip Lars Erik Gabrielsenip (S), angalaqatiginissaa naatsorsuutigaa.

- Avannaata Kommuniani eqqaavilerinikkut pissutsit takunissaat siunertaavoq. Angalaninni tassani eqqakkat pillugit oqaloqatigiinnerit pingaarutillit ingerlannissaannut periarfissaqarnissara qilanaareqaara, Jørgen Rosbach allappoq.