Naalakkersuisoq sinniisorlu tusagassiortunik katersortitsisut: - Tatigeqatigiinneq pilerseqqinneqassaaq

Naalakkersuisoq Vivian Motzfeldt (S) USA-llu sinniisua Ken Howery ataasinngornermi ataatsimiinnissaq sioqqullugu oqaaseqassapput.

Nalunaaqutaq qulingiluanut Nuummi Hans Egedep Illuani tusagassiortunik katersortitsisoqassaaq.

Taakku Joint Committeemi ataatsimiinnissaq sioqqullugu naatsumik apersuinertaqanngitsumik oqaaseqassasut, qaaqqusissummi allaqqavoq.

Nutartigaq nal. 9.15: Apeqquteqartoqarnissaa piffissaqarfigineqanngitsoq

Tusagassiortunik katersortitsineq naammassivoq. Tusagassiortut apeqquteqarnissaat piffissaqarfigineqanngitsoq Vivian Motzfeldt oqarpoq.

Nutartigaq nal. 9.10: Motzfeldtip namminneq aalajangiisinnaatitaaneq naqissuserpaa

Naalakkersuisoq Vivian Motzfeldt Kalaallit Nunaata siunissani nammineq aalajangiisinnaatitaaffiginera pillugu aamma oqaaseqarpoq:

- Kalaallit Nunaata siunissaa eqqartoraangatsigu, kalaallit kisitta siunissarput nammineq ilusilersorsinnaagipput erseqqissarusuppara.

- Tamatuma paaseqatigiissutiginera ippassaq (sinniisup ataatsimeeqatiginerani, aaqq.) aamma eqqartoqqinneqarpoq, Vivian Motzfeldt oqarpoq.

Nutartigaq nal. 09.05: Sinniisup Nuummiinnini nuannaarutigaa

Vivian Motzfeldtip katersortitsineq aallarnerlugu oqaaseqareermat, USA-p sinniisua Ken Howery oqaaseqarpoq.

Suleqatini Washingtonimeersut peqatigalugit Nuummiinnini nuannaarutigalugu oqarpoq.

- Ippassaq illoqarfimmi biilerpugut, seqerngullu Sermitsiamut qinngornera takullugu. Sulineq kusanartumik aallartipparput, oqarpoq.

USA-p Kalaallit Nunaannut attaveqarnini pingaartikkaa, aamma kalaallit siunissartik pillugu namminneq aalajangiisinnaanerat pingaartinneqartoq, oqarpoq.

- Ukiut ingerlaneranni angusarpassuaqarpugut, ingammik ukiuni tallimani kingullerni. Suli angusaqarnerusinnaavugut. Inuit Issittumi najugaqartut siunissaat nukittullunilu toqqissisimanarlunilu pigissaarfiusoq tapersersorusupparput, USA-p sinniisua oqarpoq.

Nutartigaq nal. 09.00: Pisut toqqissisimajunnaarsitsisut

Naalakkersuisup Vivian Motzfeldtip USA-p sinniisuata sapaatiummat pitsaasumik oqaloqatigineranut qujalluni tusagassiortunik katersortitsineq aallartillugu oqarpoq.

Siunissami suleqatigiinnerup pitsanngorsarnissaa ataatsimiinnermi oqaluuserineqartoq, taanna oqarpoq.

- Nunatta USA-llu ukiuni 80-ini suleqatigiinnerat ataatsimut soqutigisaqaqatigiinnermik tunngaveqarpoq. Suleqatigiilluaqqilissagutta tatigeqatigeeqqilernissaq pisariaqarpoq, Vivian Motzfeldt oqarpoq, nangipporlu:

- Soorunami pisut toqqissisimajunnaartitsillutillu eqqarsaatinik pilersitsipput. Taamaattumik tamakku ammasumik oqaloqatigiissutiginissaat pisariaqarluinnarpoq. Nunatta USA-llu qanimut suleqatigiinnerat naqissuserusuppara. Siunissami suleqatigiinnissamut attaveqaqatigiinnermullu aqqutissiuisoqarpoq.

Nutartigaq 08.50: Ulloq malunnartinniarlugu Amerikamiut erfalasuat Hans Egedep illuani takuneqarsinnaanngorlugu ilineqarsimavoq, soorlu assimi takuneqarsinnaasoq:

Joint Committee tassaavoq Kalaallit Nunaata USA-llu akornanni aaqqissuussamik naalakkersuinikkut suleqatigiiffik, naalakkersuisut paasissutissiipput.. Ukiumoortumik atorfilittatigoortumik ataatsimiinnermi Kalaallit Nunaata USA-llu naalakkersuisuisa akornanni killiffik, Kalaallit Nunaata USA-llu akornanni susassaqarfiit pingaarutillit arlallit akimorlugit suleqatigiinnerullu siuariartortinnissaa eqqartorneqassapput.

Tusagassiortunik katersortitsineq malinnaaffigalugu allaaserisaq una nutarterneqaqattaassaaq.