Naalakkersuisunik ullumi qinersisoqartussanngortoq
Naalakkersuisoqarfiit ataavartunik inuttaqanngitsut akissaasussanik ullumi innuttalerneqassapput. Inatsisartut ataatsimiinnissaannut oqaluuserisassaq "Naalakkersuisunik qinersineq" ilanngunneqarpoq.
Naalakkersuisoqatigiit partiivini siulittaasut, Múte Bourup Egede (IA) aamma Jens-Frederik Nielsen (D).
Assi: Oscar Scott Carl
Inatsisartut ullumi nalunaaqutaq qulinut ataatsimiilerunik, Naalakkersuisunut ilaasortat nutaat qinissavaat.
Taakkua kikkuujumaarnersut ataatsimiissutissani allassimanngilaq. Naalakkersuisut Siulittaasuat, Jens-Frederik Nielsen (D), Inatsisartut ataatsimiillutik aallartippata oqaluttarfimmut qaqissaaq. Tassani Naalakkersuisunut ilaasortat naalakkersuisoqarfinnut sorlernut akisussaaffeqartikkusunnerlugit innersuussani saqqummiutissuai. Innersuussinera aallaavigalugu Inatsisartunut ilaasortat taasissapput.
Naalakkersuisoqarfiit marluk inuttalerneqassasut
Naalakkersuisoqarfiit marluk piffissaq tamaat akisussaasuusussamik inuttaqanngillat. Nivi Olsen (D) Ilinniartitaanermut, Kultureqarnermut, Timersornermut Ilageeqarnermullu Naalakkersuisutut marlunngornermi nammineerluni tunuarpoq. Suliaq Kalaallit Nunaanni Qimussertartut Kattuffianut, KNQK-mut tunngasoq taassuma tunuassutigaa. KNQK nunap karsianit tapiissutit pissarsiani siunertaanut atortarsimanngikkai tamanit paasineqarpoq.
Atassut naalakkersuisoqatigiinnit ataasinngornermi aamma tunuarpoq. Taakkua Nivi Olsenip naalakkersuisutut atuutsiinnarneqaraluarnera suleqatigiinnut peqataajunnaarnerminnut tunngavilersuutigaat. Taamaalilluni Isumaginninnermut, Suliffeqarnermut, Ilaqutariinnut Nunamullu Namminermut Naalakkersuisuusimasoq, piffissami tassani napparsimalluni sulinngiffeqartoq, Maritha Broberg (A), naalakkersuisutut aamma atuukkunnaarpoq.
Tassalu naalakkersuisoqarfiit taakkua ullumikkut inuttalerneqarnissaat naammassineqarsinnaanngorsimasutut, Naalakkersuisut Siulittaasuata nalilerpaa.