Politikkikkut pisunik malinnaasimaguit naalakkersuisoqatigiit naalakkersuisunullu ilaasortat pillugit susoqarnera ilisimassajunnarsivat. Pisulli arlaqarnikuummata aallaqqaataaniit killiffissioqqaariarta.
Jens-Frederik Nielsenip naalakkersuisoqatigiit naalakkersuisunullu ilaasortat nutaat marsip 28-ani siorna 2025-mi saqqummiummagit partiit suleqataasut katillugit sisamaapput, naalakkersuisunullu ilaasortat quliullutik.
Politikkikkut pisunik malinnaasimaguit naalakkersuisoqatigiit naalakkersuisunullu ilaasortat pillugit susoqarnera ilisimassajunnarsivat. Pisulli arlaqarnikuummata aallaqqaataaniit killiffissioqqaariarta.
Jens-Frederik Nielsenip naalakkersuisoqatigiit naalakkersuisunullu ilaasortat nutaat marsip 28-ani siorna 2025-mi saqqummiummagit partiit suleqataasut katillugit sisamaapput, naalakkersuisunullu ilaasortat quliullutik.
UKU TUNUARPUT
Novembarip 13-iat 2025:
Isumaginninnermut, suliffeqarnermut, nunamut namminermut avatangiisinullu naalakkersuisoq Bentiaraq Ottosen tunuarpoq.
Decembarip qulingiluaat 2025:
Meeqqanut, inuusuttunut ilaqutariinnullu naalakkersuisoq Mads Pedersen tunuarpoq.
Marsip 13-iat 2026:
Siumut naalakkersuisoqatigiinnit tunuarpoq, taamaalilluni Vivian Motzfeldt nunanut allanut ilisimatusarnermullu naalakkersuisutut tunuarpoq.
Marsip 25-at 2026:
Naaja. H. Nathanielsen Folketingimut ilaasortanngorami inuussutissarsiornermut, aatsitassanut, nukissiutinut, inatsisit atuutsinneqarnerannut naligiissitaanermullu naalakkersuisutut tunuarpoq.
Ukioq ataasiunngitsorluunniit naalakkersuisoqatigiit partiit pingasunut ikilipput, naalakkersuisunullu ilaasortat sisamat tunuarlutik. Naalakkersuisoqatigiit ukioq ataasiunngitsorluunniit tassunga killinnerat Naalakkersuisut Siulittaasuata Jens-Frederik Nielsenip siunertarisimanngikkaluaramiuk ugguarpoq.
- Pissutsit assigiinngitsut aallaavigalugit ukioq siulleq una taamaassinnaasimanngilaq, kisianni taanna aallaavigalugu nikeriassaagut suleriaqqillutalu, taanna oqarpoq.
Anguniakkat naalakkersuisunullu ilaasortat nutaat Partiit sisamaanatik pingasuinnaallutik naalakkersuisoqatigiilermata, naalakkersuisunullu ilaasortat sisamat amigaatigineqarmata nunatta siuttua piffissaq tulliuttoq eqqissisimaarpallaarnissamut piffissaqanngilaq.
Ulapissagunaqaatit?
- Aap, Naalakkersuisut Siulittaasunngoramali nalinginnaasunngornikuuvoq piffissap ilaani ullormut 14-16 tiimit sulilluni. Ulapinneq taanna eqqumiitsuunngilaq. Takornartaanngilaq immaqa akisussaaffik taama ittoq paaralugu ulapinnissaq.
Atassutip naalakkersuisuutitani Bentiaraq Ottosen tunuarmat, Maritha Broberg innersuutissallugu nalunaareernikuuvoq. Inuit Ataqatigiit Naaja H. Nathanielsenip Mads Pedersinnillu taartissaanik innersuusisussaassaaq, Vivian Motzfedt aamma taartissarsiniarneqartussaavoq. Kingulliit taaneqartut eqqarsaatigalugit Jens-Frederik Nielsen atilersuerusunngilaq, taamaattoq ataaseq qularnanngilaq.
Inatsisartut upernaakkut ataatsimiilerunik naalakkersuisunut ilaasortat sisamat ivertinnissaat akuersissutigissavaat. Kim Kielsen Siumut naalakkersuisoqatigiinniikkallarmat Inatsisartut Siulittaasuunikuummat allamik siulittaasoqalissanersoq isummerfigineqartussaassaaq.
Assiliisoq: Oscar Scott Carl
- Inatsisartut katersuutilerpata periarfissaq siulleq atorlugu ivertitsissaagut, taanna oqarpoq.
Naalakkersuisoqatigiit partiit pingasuinnanngortut nutaamik isumaqatigiissusiornissaat aamma piumaarpoq.
- Naalakkersuisunik ivertitsigatta politikkikkut isumaqatigiissuterput taanna naaperianeruvoq partiit sisamat akunneranni. Partiit taakkua sisamat tamarmik pissarsiaqarlutillu ilai naaperiaaffeqarput.
- Maannakkullu alloriaqqinnissatsinni qiviagassarput unaavoq: Arlaatigut tassuuna allannguisoqassua? Partiit arlaannik eqqarsaatersuuteqarpat? Partiimmi maannakkut suleqatigiittut pingasuupput, Jens-Frederik Nielsen oqarpoq.
Naalakkersuisunut ilaasortat marluk qineqqusaarnerat peqqutigalugu Atassut naalakkersuisoqatigiinniiginnassanerluni apeqqusiinikuuvoq, Folketingimullu qinersisoqareerpat aalajangernissartik oqaatiginikuullugu.
Ataassutip siulittaasuata Aqqalu C. Jerimiassenip Naalakkersuisut Siulittaasuat Jens-Frederik Nielsen oqaloqatigeereerlugu naalakkersuisoqatigiinniiginnarnissartik aalajangiuppaa.
- Soorunami suleqateqarnissarput pingaarnertut anersaarivarput. Naapeqateqarfissagut ujartorusunneruagut avissaartuussutissaninngaanniit, Aqqalu C. Jerimiassen taama ullumi sisamanngornermi oqarpoq.
