Naalakkersuisut Helena Lynge Møller naalakkersuisoqarfiup pisortaatut atorfinitsippaat

Helena Lynge Møller Meeqqanut, Inuusuttunut, Inatsisit atuutsinneqarnerannut Naligiissitaanermullu Naalakkersuisoqarfimmi naalakkersuisoqarfiup pisortaatut nutaatut Naalakkersuisunit atorfinitsinneqarpoq. Taanna ulloq 1. september 2026 atorfimmini aallartissaaq.

Taama Naalakkersuisut tusagassiorfinnut nalunaarumminni allapput.

Naalakkersuisut naapertorlugit Helena Lynge Møller maj 2026-milli naalakkersuisoqarfimmi pisortaagallartutut atuuppoq. Tamanna sioqqullugu naalakkersuisoqarfimmi tassani Suliniutinut Akimuisunut Nakkutiginninnermullu Immikkoortumi immikkoortumi pisortaavoq.

Naalakkersuisoq Mariane Paviasen Jensen (IA) atorfinitsitsinermik nuannaarutiginnippoq:

- Helenap naalakkersuisoqarfimmi pisortatut atorfimmut angernera nuannaarutigisupilussuuara. Naalakkersuisoqarfiup suliassaqarfianut oqartussaqarfianullu annertuumik ilisimasaqarpoq, naalakkersuisoqarfimmilu pisortaagallartutut aqutsinikkut piginnaasami nukittuujunerat takutereerpaa.

– Suliassaminik naammassinnissinnaanera tatigilluinnarpara, pitsaasumillu suleqatigiinnitta nanginnissaa qilanaaraara, Meeqqanut, Inuusuttunut, Inatsisit atuutsinneqarnerannut Naligiissitaanermullu Naalakkersuisoq Mariane Paviasen Jensen oqarpoq.

Helena Lynge Møller siusinnerusukkut Isumaginninnermut Aqutsisoqarfimmi nuna tamakkerlugu pinaveersaartitsivimmik Paarisamik akisussaaffeqarluni immikkoortumi pisortaavoq. Ilisimatusarfimmi inuiaqatigiilerinermi kandidatiuvoq, tamatumalu saniatigut aqutsinermi diplominnaffiusumik ilinniagaqarluni.