Naalakkersuisut meeqqerivinni sulisunut supervision nukittorsarniaraat

Sulisussaaleqineq sulinermilu avatangiisit tatineqarsimasut meeqqerivinni sulisunut nungullarsaataapput.

Tamanna Pipaluk Olsenip (D) siunnersuutaannut marlunnut Naalakkersuisut akissutaanni atuarneqarsinnaavoq, tassani meeqqeriveqarnermi ilungersunartut pineqarput, taakkulu Inatsisartut ukiaanerani ataatsimiinneranni septembarip 25-ani oqaluuserineqassapput.

-       Kissaatigisatsitut meeqqat avatangiiserisaminni ingerlalluarnissaat naatsorsuutigisinnaannngilarput Ullut tamaasa suliassap pitsaasumik naammassinissaanut atugaasa pitsaasuunissat pingaartutut isiginngikkutsigit, siunnersuummi allassimavoq.

Sulisunik amigaateqarneq meeqqerivinni sulisooreersunik tatineqaataanerulersartoq Pipaluk Olsenip ilaatigut tikkuarpaa.

Taamaammat supervision perorsaasutut sulisunut sulisunullu allanut ataavartumik atugaanerulissasoq siunnersuutigaa.

Supervision sulisut sulineranni pisuni ilungersunarsinnaasuni sakkussatut tapersiiniutitut pingaaruteqarsinnaasoq Naalakkersuisut isumaqatigaat.

Supervision ilinniaqqinnissarlu periarfissaareerput, neqeroorutilli qanoq sulisunit atugaanerulersinneqarsinnaanersut Naalakkersuisut misissorusuppaat.

Supervision Nuummi meeqqerivinni sulisunut atugassaqqippoq. Nunatsinni meeqqerivinni sulisut meeqqanik sullissisussaapput, aamma ulluinnarni ilungersunarsinnaasuni. Aammali sulinermi atukkat oqaluuserinissaannut saaffissaqartariaqarpoq, isumaginninnermi ikiorti isumaqarpoq.

-       Soorunami tamanna iluaqutaassaaq, Maannguaq Broberg Nuummi meeqqerivimmi ikiortitut sulisoq siunnersuut pillugu oqarpoq.

Supervisionittaaq sulinermi tatineqarsimanerup suliarinissaaniit allatigut aamma atorneqarsinnaasoq isumaqarpoq. Unikaallalluni inuunermi killiffigisaq aamma oqaluuserineqarsinnaavoq.

-       Supervisionip ingerlanneqarnerani inuunermi sumut killissimaneq oqaluuserissallugu inuttullu ineriartussalluni aamma inuttut ineriartornermut alloriarnerusinnaavoq annertooq. Tamanna inulerisutut sulinermi pingaartuuvoq, taanna oqarpoq.

Ilungersunartoq uteqqiajuartoq

Meeqqerivinni sulisussaaleqineq nutaajunngilaq. Siusinnerusukkut “Assaat kissalaartut amigaataanerat” AG-mit nangeqattaartumik allaaserineqarpoq, tassanilu ilaatigut sulisussarsiortarneq, sulisorisat sulisoriinnarnissaat sulinermilu atukkat sammineqarput.

Naalakkersuisuttaaq sulisussarsiortarneq attassiinnarnissarlu meeqqerivinni pitsaassutsip qulakkeernissaannut tunngavissatut isigaat.

Sulisut ikinnerpaaffissaat pillugu inimi ataatsimi sisamanik sulisoqartariaqarnerup kingunerisinnaasai suunersut nalunaarusiassami ilaatigut misissorneqassaaq. Taamatut oqaaseqartoqarnera meeqqerivinni aqutsisunit marlunnit ilassilluarneqarpoq.

Siunissami meeqqeriviit qanoq aaqqissugaallutillu sulisulerneqarnissaat pillugu nalunaarusiami aamma naliliinissamut tunngavissaqartoqarnerulissaaq.

Meeqqerivinnut utaqqisoqarnera aamma Naalakkersuisut akissutaaanni sammineqarpoq. Matumani kommuninik suleqateqartariaqarneq ilaatigut pitsaanerusumik pilersaarusiornissamut, inissat amerlinissaannut eqaannerusumillu meeqqat paaqqutarineqarnissaannut periarfissaqarnissaq tikkuarneqarpoq.