Naalakkersuisut nikittaalluni sulisoqartarnissaa pillugu: Pissutsit maanna atuuttut atorsinnaanngillat

Kalaallit Nunaanni Peqqinnissaqarfik Danmarkimi nunap immikkoortuini peqqinnissaqarfimmi sulisussanik pissarsiniarluni isumaqatigiissuteqarnera maajip naanerani nalunaarutigineqarnerata, kingunerisaanik eqqissiviilliornermik pilersitsisoqarpoq.

Naak sulisut amerlanerusut pisariaqartinneqaraluartut, taakku tamarmik naligiimmik pineqarusupput.

Tamanna pillugu Inuit Ataqatigiit sinnerlugit Inatsisartunut ilaasortap Paarma Lund Kreutzmannip §37 naapertorlugu Naalakkersuisunut apeqquteqarpoq:

Aaqqissuussineq pillugu nakorsat peqqissaasullu aalajangersimasumik

atorfeqartut aaqqissuussineq pillugu aarleqquteqarnerat Naalakkersuisup

ilisimavaa?

”Naalakkersuisut sianigaat, nikittaalluni sulinermik aaqqissuussinerit pillugit isumakuluuteqartoqalernera, taakkualu isumakulunnerit pimoorullugit tiguneqarneqarput. Tassunga atatillugu sulisut misilittagaat isiginneriaasiisalu aaqqissuussinerup piviusunngortinnerani ilanngutissallugit pingaaruteqarpoq.” Naalakkersuisut siulittaasuat Jens-Frederik Nielsen (D) peqqissutsimut innarluutilinnullu naalakkersuisoq Anna Wangenheim (D) sinnerlugu akivoq.

Taassuma paasissutissiissutigaa aaqqissuussaq aqutsisooqatigiinniit qanimut malinnavigineqassasoq, taamaalilluni aaqqissuussamik tamatuminnga misilittakkat allanngortittariaqarnermik ersersitsisut tunngavigalugit sinaakkutit ataavartut naleqqussarfigineqarsinnaaniassammat.

Anna Wangenheimip aqutsisut sulisullu oqaloqatiginerani, aaqqissuussap pitsaanerusunik atugassaqartitsilersinnaanera aqutsisunit sulisunillu neriuutigineqartoq taassuma innersuutigaa.

Atuaruk aamma

Suliffeqatigiiffik stafetordning pillugu: Ajunngilaq, kisianni naammaginanngilaq

Kikkut akissarsiaqarnerussappat?

Peqqinnissaqarfiup sulisunik pisariaqartitsiffiusunik nalunaaruteqartarnera aaqqiissutaassaaq, tamatumalu kingorna Danmarkimi immikkoortortaqarfimmit isumaqatigiissuteqarfigineqartumit Kalaallit Nunaanni atorfik taanna piffissami aalajangersimasumi inuttalerneqartassaaq.

Danmarkimi peqqinnissaqarfimmi sulisut Kalaallit Nunaanni isumaqatigiissutit naapertorlugit akissarsiaqartinneqassapput, nittaarlunili sulinermut naalagaaffimmit tapisisarput.

Taamatut nalunaaruteqartoqaraluartoq nakorsat peqqissaasullu arlallit danskinit nakorsanit peqqissaasunillu kalaallinit akissarsiaqarnerunissaat ernummatigaat.

Jens-Frederik Nielsenip Paarma Lund Kreutzmannimut akissummini piffissami killilimmi atorfillit, suliartornerminni soraarummeernermilu angalanermut akiliuteqartartut, aamma danskit nunap immikkoortuini oqartussaasut sulisumik inissiassaannit atugassaqartitsisartut taakkua isumaqatigiissummut ataatsimut ilaappat.

AAMMA ATUARUK

Bonus og betalt bolig skal lokke danske sygeplejersker til Grønland

Danmarkimi nikittaalluni sulisoqartarnissaa isumaqatigiissutigineqarput, taamaattumillu Kalaallit Nunaanni Peqqinnissaqarfik tamatumunnga sunniuteqarsinnaanngilaq. Peqqissaasut Danmarkimi isumaqatiginninniutigineqartumit 15 procentimik qaffasinnerusumik tapitut akissarsiaqarsinnaapput imaluunniit suliunnaarnermi kingorna 15 procentimik qaffasinnerusumik akissarsiaqarsinnaallutik.

Nikittaalluni sulisoqartarnerani peqataasut atorfinitsitsinermut, ukiumullu akissarsianut tapiissutinik, isumaqatigiissutit naapertorlugit sulisunut aalajangersimasunut taamaallaat atuuttunik, pissarsissanngillat.

”Ukiut kingulliit aningaasaqarnikkut isumalluutitigullu peqqinnissaqarfimmit unammillernartut isiginiarneqartorujussuusimapput, Naalakkersuisullu taakku pimoorulluinnarpaat. Minnerunngitsumik sumiiffimmi sulisartut eqqarsaatiginissaat pineqarpoq. Ukioq kingullerli Naalakkersuisut nalunaarutigaat, pissutsit allanngortinnginnissaat attanneqarsinnaanngitsoq, aamma nukinginnartumik sulisoqarniarnikkut unammillernartut aaqqiivigisariaqartut piffissamut ungasinnerusumut pilersaarutit naammassineqarsinnaanerat qulakkeerniarlugu. Peqatigitillugu nikittaalluni sulinermik aaqqissuussinerup taartaasartut allaffeqarfiinit sulisunik pisariaqartitsineq annikillisinnissaa periarfississavaa, kingunerissavaalu peqqinnissaqarfiup annertuumik sipaaruteqarnera.,” Jens-Frederik Nielsen akissummi allappoq.

Ilinniartitsinerup nanertuutaa

Isumakuluutigineqartartoq alla tassaavoq piffissami killilimmi atorfillit ilinniartinneqarnerat piffissartuutigineqartalernissaat.

Paarma Lund Kreutzmannip aamma tamanna apeqqutigaa.

Sulisut ingerlaavartumik suliartortarnerat naatsorsuutigineqarpoq, sulisut aalajangersimasumik piffissaqarlutik sivisunerusumillu suliartortarnissaat, taamaalilluni ullumikkumut sanilliullugu sulisunik ilinniartitsinissaq annerusumik pisariaatutissasoq, Jens-Frederik Nielsen akissuteqarpoq.

“Nikittaalluni sulinermik aaqqissuussinermi pingaartillugu eqqarsaatigineqarpoq, sulisumut aallarniutitut suliffimmilu suliassanut ilitsersuussineq imatut piareersarneqassasoq, ingerlatsinermut tapertaasutut atorfilinnullu sulisunut naleqqutinngitsumik pisarissersuutaanani.”

Taassuma nassuerutigaa mannakkut taartaasartut allaffeqarfiinit sivikitsumik atorfilinnut atuinermullu atatillugu atorfillit sulisut annertuumik suliassanut ilinniartitsinissamut ullumikkut annertuumik peqquneqareerput.

”Nikittaalluni sulinermik isumaqatigissuteqarnerit atuutilersinnerisigut naatsorsuutigineqarpoq ilinniartitsinissamik suliassaq taanna annikinnerulissasoq, pissutigalugu atajuarneq nukittorsarneqassammat uteqqiattumillu ilinniartitsinissamut pisariaqartitsineq annikinnerulerluni. Peqatigitillugu nikittaalluni sulinermik aaqqissuussinerup immikkoortortaqarfinni suliamut tunngasuni ineriartorneq napparsimasunut sulisunullu atorfeqartunut iluaqutaasumik tapersersussavaa,” Naalakkersuisut siulittaasuat akivoq.