Kalaallit arnat assammik arsarlutik nunanut allanut unammisartui Parisimut VM-imut anngunniunnermi peqataajartorput

Arnat assammik arsarlutik nunanut allanut unammisartut sungiusaasuat Jakob Larsen sungiusaasup ikiortaa Kim O. Petersenilu unammisartunik 17-inik toqqapput, taakkulu Parisimi misiliilluni unamminermi Kalaallit Nunaat sinnerlugu peqataassapput.

Taama TAAK tusagassiutitigut nalunaarummi allappoq.

Parisimut angalaneq VM-imut anngunniunnissamut piareersarnermi alloriarneruvoq pingaarutilik. Unamminerit pingasut ulluni pingasuni ingerlanneqassapput, tamatumalu nalaani nukiit tamaasa atortariaqarput, aamma arsaattarfiup iluani avataanilu sungiusarnerit aalajangersimasut ineriartortinnissaat pisariaqartinneqarpoq.

Parisimi Marokko, USA aamma Frankrigip U19-it nunanut allanut unammisartui unammissavaat.

- Unammisartut amerlasuut maannakkut angusarissaarput, tamannalu unammisartoqatigiit tamarmik pikkorinnerulernissaannut iluaqutaavoq. Parisimi unamminissamut arsaattartut 15-it målmandillu marluk peqataassapput. Pingasoriarluni unammisoqartillugu unammisartutut ataatsimoornissarput tamanillu piareersimanissaq pingaaruteqarpoq, Jakob Larsen oqarpoq.

Unammisartut nutaat marluk Christina V. Lange aamma Karla de Kam unammisartunut nukittorsaataassapput. Najaaja L. Heilmann seeqqumigut ajoqusernini pissutigalugu unammeqataassanngilaq. Sungiusaqqilernissaa pilersaarusiorneqarpoq, neriuutigineqarpoq novembarimi tulliani unamminissamut piareeqqissalluni.

– Unammisartut tamarmik, maannakkut toqqarneqarsimasut toqqarneqanngitsulluunniit, ullut tamaasa ilungersortariaqarput. Toqqarneqarnera takorluugaannaasussaanngilaq juullillu tungaanut suliniuteqartuassaagut, Jakob Larsen erseqqissaavoq.

Unammisartut oktobarip 20-aniit 23-anut Parisimiissapput.