Ilulissani nutaamik akunnittarfiliortoqarnissaa akuerineqartoq

Ilulissani akunnittarfinnik amigaateqarneq nutaarsiassaanngilaq. Nutaarsiassarli tassaavoq illoqarfimmi takornarianit nuannarineqaqisumi akunnittarfiit ilaneqartussanngornerat.

Akunnittarfittaarnissamut qinnuteqaat, Avannaata Kommuniani qinikkat septembarip 25-ani ataatsimiikkamik oqaluuseraat.  Partiit borgmesteriutitaqartut, Siumut Nalerarlu qinnuteqaatip inaarutaasumik akuerineqarnissaanut amerlanerussuteqarlutik akuersisuupput. Suleqatigiit oqaaseqartuat, Ujuut Olsen (S), qinnuteqaat pillugu kommunalbestyrelsimut ima oqarpoq:

- Siumumit Naleqqamiillu suliaq marloriarluni tusarniutigineqarsimasoq maluginiarparput. Ilulissani namminersortut annertuumik suliaqarnerat nuannaarutissaavoq tapersersortariaqangarput. 

- Qinnuteqaataasoq taamatut isikkoqartillugu akuerivarput, Ujuut Olsen oqarpoq.

Illuatungiliuttut akuerseqataanngillat. Tassani ilaatigut tunngavilersuutigaat akunnittarfissamut akunnittarfiliortussat aqquserniortitsisimanerat malitassat malillugit suliarineqarsimanersoq apeqquseramikku.

Borgmesterilli Lars Erik Gabrielsenip (S), ingerlatsiviup malitassat malissimassagaat upperilluinnarlugu aamma oqaatigaa.

Akunittarfissap tungaanut aqquserniornermi malitassat malinneqarsimanersut aamma misissorneqassaaq, tamannami illuatungiliuttut kissaatigaat.

Piginnittut marluk

Suliffeqarfik akunnittarfittaarniarluni qinnuteqartoq tassaavoq Ilulissat Invest ApS. Taassuma akunnittarfiliassani taaguteqartippaa Hotel Anchor Bay. Suliffeqarfimmut piginnittut marluupput, tassaasut, Flemming Bisgaard aamma Peter Jensen

Akunnittarfissaq illoqarfiup avanaatungaani, Nuugaarsummi, maanna suli sanaartorfigineqarnikuunngitsumi, inissisimassaaq. Akunnittarfik quleriinnik pingasunik portussuseqassaaq. Init 80-ssapput siniffissallu katillugit 148-ssallutik. Akunnittarfissaq 2.210 m²-inik annertussuseqassaaq. Pilersaarutaasullu naapertorlugit 2028-mi juulip aallaqqaataanni piariissaaq.

Avannaata Kommuniata suliniummut qinnuteqaat siornatigut tusarniutigaa. Tusarniaaneq pillugu paasissutissani akunnittarfissap qanoq isikkoqarumaarnissaa assilianngortinneqarpoq. Uani takusaqarnerugit. 

Sulisut inissaat alliliinissarlu

Suliniummut pilersaarut maanna qinikkanit amerlanerussutilinnit akuerineqartoq naapertorlugu akunnittarfiliassaq naammassineqarnermi kingorna aamma allilerneqarsinnaassaaq.

Taassuma saniatiguttaaq sulisut inissaannik, tallimanik aamma sanaartortoqassaaq. Taakkua akunnittarfissap maannalu mittarfiup tungaanut aqqusernup akornanni inissisimassapput. Taakkua saniatigut aamma illuaqqanik pingasunik, arsarnersiortarfittut ateqartinneqartunik, sanaartortoqassaaq.

Akunnittarfissaq biilinut unittarfeqassaaq, aammalu pisuttuartunut aqqummik, akunnittarfiup saavatigut, tassa immamut ungasinngitsukkut, pisuttuartarfeqalernissaa pilersaarummut ilaapput.