Arnanut angerlarsimaffeqanngitsunut najugaqarfiit ulikkaarput — kommuni arnat angerlarsimaffeqanngitsut pisariaqartitsisut najugaqarfissaanik pilersitsivoq

Kommuneqarfik Sermersooq Nuummi marlunnik angerlarsimaffeqanngitsut najugaqarfiannik katillugit 80-inik initalinnik ingerlatsivoq, aasallu ingerlanerani najugaqarfinni taakkunani unnuiartortartut amerliartuinnarput.

Taamaattumik kommunip Nuussuarmi meeqqeriviusimasoq Umiaq arnat pisariaqartitsisut unnuiffissaattut septembarip aallaqqaataani pilersippaa. Arnanut angerlarsimaffeqanngitsunut najugaqarfik nutaaq 16-ninik inissaqarpoq.

Taamatut kommunimi ingerlatsivik Aningaasaqarnermut Inuussutissarsiornermullu Ataatsimiititaliami politikerinut paasissutissiivoq. Siulittaasup aalajangiineratigut alliliineq pivoq, aqutsisullu Umiaq angerlarsimaffeqanngitsunut neqeroorutitut arnat immikkoortortaqarfiannik peqalernissaasa tungaanut utaqqiisaasumik unnuisarfeqartussanngorlugu ukiuni pingasuni tulliuttuni ingerlaannassasoq, politikerit akuerissagaat innersuutigaat.

Umiami arnat unnuisarfiata pilersinneqarnissaa tikillugu Kujallerpaani unnuisarfimmi arnanut immikkoortortami aqqaneq-marlunnik inissaqartarpoq.

– Kujallerpaani arnat immikkoortortaqarfiat aqqaneq-marlunnik inissaqarpoq, taakkulu ulikkaakkajuttarput, taamaattumik arnat angutit immikkoortortaqarfianni ullumikkut inissinneqartarput. Tamanna pitsaanerpaajunngilaq, tassami amerlanertigut arnat sanngiitsut navianartorsiortullu tassaniittarmata, ingerlatsivik pissutsit pillugit allappoq.

Kujallerpaani arnat immikkoortortaqarfiat Umiamut nuunneqarpoq, taamaalilluni angutit unnuisarfimmiittut inissaqarnerulerput.

Tamatuma saniatigut kommunip najugaqarfiutaata aappaa, Ungaaq, ininik 44-nit 52-inut allilerneqarpoq. Taamaalilluni Nuummi najugaqarfiit katillugit 24-nik ilaneqarsinnaalerput, tassa 80-init 104-nut.

Ingerlatsivik naliliivoq inissanik amerlanerusunik pilersitsinissaq ingerlanneqanngippat, innuttaasunut najugaqarfimmi inissamik pisariaqartitsisunut itigartitaasalernissaat imaluunniit arnat immikkoortumi arnanut angutinullu inissalimmut isersinnaanngitsut atugaasa ajornerulersinneqarnissaat ullumikkut akuerisariaqartoq.

Umiaq najugaqarfittut atuinnassappat nunap immikkoortuata allanngortinnissaanut akuersissut pisariaqassaaq, ilaatigut sanilerisat tusarniaavigineqaqqaassapput.

Aammattaaq naatsorsuutigineqarpoq unnuisarfik arfineq-pingasunik sulisussaqassasoq, taakkualu ukiumut akissarsiaannut aningaasartuutit 2,4 millionit koruunit missaanniissallutik.

Ingerlatsivimmit erseqqissarneqarpoq angerlarsimaffeqannginneq pillugu inatsiseqanngitsoq, taamaattumillu unnuisarfinnik ingerlatsineq inatsisitigut pisussaaffiunngitsoq.

– Ingerlatsivik isumaqarpoq isumaginninnermut inatsisiliorneq innuttaasunut ataqatigiissumik sullissinissamut pingaaruteqartoq, illoqarfinnilu allani assingusunik neqerooruteqarnissamut assigiimmik piumasaqaateqarnermigut kommunimi neqeroorutinut pisariaqartitsineq annikillisinneqarsinnaasoq. Inatsiseqannginnera pissutigalugu kommunit angerlarsimaffeqanngitsunut neqeroorutit pilersinnissaannut ingerlannissaannulluunniit aningaasanik pissarsisimanngillat, Kommuneqarfik Sermersuumi ingerlatsivik allappoq.