Naalakkersuisut nutaat ivertinneqarput - nikisiterineq annikitsoq

Nivi Olsenip Maritha Brobergillu Naalakkersuisunit tunuarnerat pissutigalugu, Naalakkersuisunik nutaanik maanna ivertitsisoqassaaq.

Demokraatit Inuit Ataqatigiillu partiini marluinnaallutik naalakkersuisooqatigiipput.
Saqqummersinneqarpoq

Naalakkersuisut marluk sapaatip-akunnerata siuliani, tunuarput. Taamaammallu naalakkersuisunik marlunnik ivertitsisoqassaaq.

Tamanna Inatsisartut ataatsimiinneranni ullumi oqaluuserisassani, siullertut pissaaq.

Atassut naalakkersuisooqatigiinnit ataasinngornermi novembarip 9-anni anivoq, taamaalillunilu Maritha Broberg (A) Isumaginninnermut, Suliffeqarnermut, Ilaqutariinnut Nunamullu Namminermut Naalakkersuisutut tunuarpoq. Nivi Olsen (D) Ilinniartitaanermut, Kultureqarnermut, Timersornermut Ilageeqarnermullu Naalakkersuisutut Aqaguani tunuarpoq.

Naalakkersuisutut innersuussat tassaapput Jens-Erik Kirkegaard aamma Stine Egede. Naalakkersuisut Siulittaasuat Jens-Frederik Nielsen (D). taama oqapoq,

Demokratinit Jens-Erik Kirkegaard innersuunneqarpoq. Taanna qinersivimmi matumani qinigaanngilaq siornatigulli Siumut sinnerlugu 2013-imiit 2014-imut, inuussutissarsiornermut, aatsitassanut kingusinnerusukkullu suliffeqarnermut Naalakkersuisuuvoq .

Jens-Erik Kirkegaard (D) Naalakkersuisunut ilaasortaq nutaaq.
Stine Egede (IA) Naalakkersuisunut ilaasortaq nutaaq.

Siulittaasulli Naalakkersuisutut innersuunneqartut marluk sunik oqartussaaffeqassanersut oqaatiginngilaa.

Inuit Ataqatigiit Stne Egede (IA) naalakkersuisutut innersuuppaat. Taanna Kommune Kujallermi kommunalbestyrelsimut ilaasortaavoq 2025-milu qinersinissaq tikillugu borgmesteriulluni.

Naalakkersuisulli nutaat ivertinneqartinnagit Inatsisartunit akuersissutigineqassapput. Partiillu oqaluttarfimmiit oqaaseqarsinnaatitaapput.

Illuatungiliuttut avissaartuuttut

Allanngorarnerit Naleqqamit akuersaarneqanngitsut Jens Napãtôĸ´ oqarpoq, taamaattumillu Naalakkersuisunut nutaanut taaseqataanatillu akerliussanngillat.

Naalakkersuisut nutaat tapersersorniarlugit, Naalakkersuisuusimallu qutsavigalugit, Mimi Karlsen Inuit Ataqatigiit sinnerlugu oqaluttarfimmit oqarpoq.

Siumup Naalakkersuisunngortussanut inassuteqaatit tusaatissatut tigullugit akuerseqataassasoq, Erik Jensen oqarpoq. Naalakkersuisullu nutaat sulilluarnissaannik kissaallugit.

Naalakkersuisooqatigiinnit anisariaqarsimanertik partiimit annernartuusoq, Atassutip siulittaasua Aqqalu C. Jerimiassen oqarpoq. Partiip naalakkersuisoqatigiinnit aninera Nivi Olsen naalakkersuisutut tunuartariaqarnerannik isummernermik aallaaveqarpoq. Atassutillu tunuarnerata kingorna aatsaat taama pisoqarpoq. Aqqalu C. Jerimiassenip oqaatigaa Atassutip Naalakkersuisut nutaat taaseqataaffigiumaaraat.

Nikisiterineq annikitsoq

Jens-Frederik Nielsenip Naalakkersuisut sunik akisussaaffeqarusunnersut saqqummiuppai, nikisiterivorlu.

Jørgen Rosbach ilinniartitaanermut, kulturimut, timersornermut ilageeqarnermullu naalakkersuisunngorpoq, Jens-Erik Kirkegaardilu avatangiisinut, pinngortitamut, nukissiornermut ilisimatusarnermullu naalakkersuisunngorluni.

Stine Egede isumaginninnermut, suliffeqarnermut, ilaqutariinnut nunamullu namminermut naalakkersuisunngussaaq.

Ilaasortat sinneri akisussaaffitik tigummiinnassavaat.

Nutarterneqarpoq.

NAALAKKERSUISUT

Naalakkersuisut Siulittaasuat: Jens-Frederik Nielsen (D)

Nunanut Allanut, Inuussutissarsiornermut Aatsitassanullu Naalakkersuisoq: Múte Bourup Egede (IA)

Aningaasaqarnermut Naalakkersuisoq: Aqqaluaq B. Egede (IA)

Ilinniartitaanermut, Kultureqarnermut, Timersornermut Ilageeqarnermullu Naalakkersuisoq: Jørgen Rosbach (D)

Avatangiisinut, Pinngortitamut, Nukissiornermut Ilisimatusarnermullu Naalakkersuisoq: Jens-Erik Kirkegaard (D)

Meeqqanut, Inuusuttunut, Inatsisinik Atuutsitsinermut Naligiissitaanermullu Naalakkersuisoq: Mariane Paviasen Jensen (IA)

Peqqissutsimut Innarluutilinnut Naalakkersuisoq: Anna Wangenheim (D)

Ineqarnermut, Attaveqaqatigiinnermut, Isorliunerusunut Upalungaarsimanermullu Naalakkersuisoq: Iddimanngiiu Jensen Bianco (IA)

Aalisarnermut, Piniarnermut, Nunalerinermut Inuussutissarsiutinullu Naalakkersuisoq: Peter Borg (D)

Isumaginninnermut, Suliffeqarnermut, Ilaqutariinnut Nunamullu Namminermut Naalakkersuisoq: Stine Egede (IA)

Powered by Labrador CMS