NALILIINEQ
Naalakkersuisut siulittaasuata taarsiisussamik assingusumik nassaarniarnissaa ajornaatsuinnaassagunanngilaq
Kalaallit Nunaanni inuiaqatigiinnut annaasaavoq meeqqanut, inuusuttunut ilaqutariinnullu naalakkersuisuusimasup taamak piginnaasaqarluartigisup Mads Pedersenip tunuarnera. Taanna poortuinani oqaasissaminik saqqummiussisarpoq, oqariartuutaalu innuttaasunut amerlasuunut uummataannut toqqaannaq apuuttarput. Maanna apeqqutaalerpoq Naalakkersuisut siulittaasuata Maasitut piginnaasaqarluartumik nassaarsinnaanersoq.
4. junimi Mads Pedersen tusagassiortunik katersortitsinermini tulluusimaarluni titartakkat meeqqanit tunissutisiani takutissorpai. Taanna taamani oqaluttuarpoq nunatsinni sumulluunniit pigaangami, meeqqat titartakkaminnik tunissuteqartarnerat sulinerminut assut nukittorsaatigisarlugu. Taamaattoqarneralu apeqqusigassaanngitsumik ersersitsivoq Maasi meeqqat naalakkersuisorisimagaat.
Assiliisoq: Jensine Berthelsen
Ulloq ataaseq qaangiutiinnartoq Mads Pedersen meeqqanut, inuusuttunut, ilaqutarinnullu - kingullertigullu nunamut namminermut - naalakkersuisutut tunuarnerani - ersarippoq nunatta piginnaasaqarluartumik tatiginartumillu Naalakkersuisuni ilaasortamik annaasaqarnera, naalakkersuisoqarfiummi taassuma meeqqanik, inuusuttunik ilaqutariinnillu sullissinera tamanut pingaaruteqarmat.
Mads Pedersenip, Maasip, maanna siusinnerusukkut Naalakkersuisuni suleqatigisimasai, kisianni aamma Inatsisartuni ilaasortat partiit akimorlugit oqariartuuteqarput Mads Pedersenip Naalakkersuisutut tunuarnera uggornartuusoq. Tamatumali ilutigisaanik aamma suleqatigisimasai paasinnerminnik ersersitsipput, nammineq ilaqutariinnilu pissutsini pingaarnerutillugit tunuarnissani aalajangiussimammagu.
Politikkikkut suleqataasa saniatigut aamma Sermitsiap aamma KNR-ip nittartakkatigut atuartartui ikigisassaanngitsut Mads Pedersensip tunuarneranut amerlasuut qisuariaateqarput, oqariartuuteqarlutik uggoralugu meeqqanut, inuusuttuaqqanut ilaqutariinnullu Naalakkersuisutut taannarpiaq annaaneqarmat.
Mads Pedersensip politikkimik suliaqartilluni isummertarnermini ersersittuartarpaa paasinnilluarsinnaalluni suna pineqarnersoq, tassa meeqqanik sumiginnaaneq aammalu tamatuma kingunerisaanik meeqqat isumagineeruttarneranni ajornartorsiutit suut meeqqat aqqusaartarneraat. Tassunga atatillugu arlaannaatigulluunniit Maasip isertuunneq ajorpaa nammineq aqqusaagaqartarsimalluni, meeqqat inuusuttuaqqallu misigisassarinngisaannagassaraluannik.
Mads Pedersen qinikkatut inissisimanngilaq. Taannali naalakkersuisutut inissisimanermini inersimasut tamarmik akisussaaffimmik tigusisariaqartut ineriartorneq allanngortinneqassappat ersarissumik oqariartuuteqartarpoq, tamannalu innuttaasut uummataannut toqqaannartumik apuussimasoq nalilerneqartariaqarpoq.
Naalakkersuisut siulittaasuat: Uggornarpoq, kisianni ataqqisariaqarpoq
Allaaserisap suliarineranut atatillugu Naalakkersuisut siulittaasuannut, Jens-Frederik Nielsenimut (D) ulapeqisumut apeqquteqarpugut. Qujanartumillu allakkatigut apeqqutigut akisinnaasimavai
Siullermik apeqqutigaarput Mads Pedersenip tunuarnera Naalakkersuisut siulittaasuattut aamma Naalakkersuisunut qanoq isumaqarnersoq:
- Uggornarpoq,
piffissami taama sivikitsigisumi naalakkersuisutut sulilluarami. Kisianni tassa
peqqissutsini ilaquttanilu pillugit taama aalajangernera ataqqisassaavoq, Jens-Frederik Nielsen akivoq.
Aappassaanik apeqqutigaarput Naalakkersuisunut ilaasortat
suliassaasa annertuallaarneranik tunuarneq ersersitsinersoq. Ilaatigut Maasip
nassuerutigigamiuk suliffini sulianilu angerlarsimaffimminut
nassartalersimallugit ilaquttani ilagigaluarlugit eqqarsartaatsimigut suliani
initusangaarmata ilaquttaminut najuutinngitsutut ittarsimalluni:
- Soorunami
naalakkersuisunut ilaasortat tamatta nunatsinnut pitsaanerpaaq anguniarlugu
suligatta ilaatigut sulianut tamaviaarnerput assigiinngitsunik
sunniuteqartarpoq, Naalakkersuisut siulittaasuat akivoq.
Pingajussaanik apeqqutigaarput Maasip taartissaanik nassaarniarnermini eqqartaatai suunersut:
- Pisoq qanittuararsuuvoq, tassami
ippassaq pivoq, taamaammat toqqaannartumik una apeqqut maanna
akisinnaanngilara.
Sisamassaanik aperaarput Maasip
tunuarnerata saniatigut aamma isumaginninnermut il.il. naalakkersuisuusimasoq
Bentiaraq Ottosen aamma tunuarnikuummat, taakku taarserneqassanersut Inatsisartut
ataatsimiileqqippata Naalakkersuisut massakkut katitigaanerat naapertorlugu?
Imaluunniit Naalakkersuisut katitigaanerat allanngortissallugu
pilersaaruteqarnersoq:
- Maanna
Meeqqanut, Inuusuttunut, Ilaqutariinnut Nunamullu Namminermut akisussaaffik
tigugallarpara. Piffissap takutikkumaarpaa oqartussaaffiit naalakkersuisunut
ilaasortanut agguataarneqarallassanersut. Kisianni tassa maanna
naalakkersuisuusimasut tunuartut taartissaat Inatsisartut ataatsimiilerpata
innersuussissaagut Inatsisartullu ivertitsisuujumaarput, Naalakkersuisut siulittaasuat Jens-Frederik Nielsen akivoq.
Inatsisartut ukiaanerani ataatsimiinnerminnit unillatsiareerlutik februarip pingajuani ataatsimiinnertik nangittussaavaat.
