Nadjap inuunera kiffaanngisusseqarpoq

Nadja Irena Olesen Jehovap Nalunaajaasuinit marsimi anivoq.

Jehovap Nalunaajaasuinut ilaaginnassaguni najoqqutassiat tunngavigineqartullu malissinnaajunnaarneri pissutaavoq.

Najoqqutassiat ataatsimoornerni aalakooqqusaannginnermut aamma katisimanani atoqateqaqqusaannginnermut ilaatigut tunngasut.

Nadja Irena Olesen imerneq ajoraluarluni ataatsimuualaartunullu akuusorsuuneq ajoraluarluni, upperisaq peroriartornermini inuunerisani imminut tulluanngitsoq paasilerpaa. Taamaammat aniniarluni aalajangerpoq.

- Uppertuujuassaangali. Buddhistinngorunnarnangalu allanut ilanngunnavianngilanga. Guutimut uppernera uanniippoq, imermik najorsiutigaluni oqarpoq.

Nadja Irena Olesen Nuummi ilinniartut inaanni, ataatsimik sinittarfilimmi, nerisarfimmi issiavoq. Taassuma qitornani marluk, 13-inik ukiulik Nicolai aamma qulingiluanik ukiulik Zoi.

Ullaap tungaajuvoq, qalipaasunngorniarlunilu suliffimminiit qiteqqulluni. Sullisai qarliit qaqortumik qalipaatitersimapput.

Ikuallattoqalerpat qaqqamiluunniit ajutoortoqarpat kalerrisaarut appittussaq qarliiniippoq. 32-nik ukiulik Nadja Irena Olesen kisimiittuullunilu qalipaasunngorniaanermi saniatigut qatserisartuuvoq, qaqqamut sineriammilu annaassiniaasartuulluni.

Qatserisartunngorusunneq meeraanerminiilli takorloortagaa ukiut pingasut matuma siorna piviusunngorpoq.

- Nuannareqaara. Assersuutigalugu inissiami ikuallattoqartillugu siullersaalluni iserluni inunnik annaassiniarsinnaaneq nuannaraara, oqarpoq paninilu qiviarlugu.

Anaanami nerrivimmi issiaviata ungasinngisaani nalaasarfimmiippoq. Zoi atuanngiffeqarpoq, ullumilu sivisuumik sininnikuulluni. Ullaakkorsiutissaminik coco popsinik aalleriarluni ingeqqippoq.

Asanninneq, uiverneq aqqusaakkallu sakkortuut

Nadja Irena Olesenip ataataa Maniitsumi qalipaasutut suliffittaarmat angajoqqaavi naapeqqaarput. Arnaa angutaata suliffittaavani suliffeqarpoq.

Ataataa qallunaajuvoq, anaanaatalu qallunaat taamani nuannarivallaanngilai. Angutaa meterinik marlunnik takissuseqarpoq, angisuujulluni nukittullunilu. Nadja Irena Olesenip anaanaa asannilerpoq.

Nadja Irena Olesen qatanngutigiinni pingasuusuni nukarlersanngorluni juulip tallimaanni 1994-imi inunngorpoq. Qaqortumi Jehovap Nalunaajaasuinik amigaateqartoqarmat ukiut pingasut qaangiummata nuupput.

Nadja Irena Olesenip meeraanermi sivisunerpaartaa tassani najugaqarpoq.

Angerlarsimaffik peroriartorfigisani asanninnermik ulikkaartutut eqqaamavaa, aammali paatsiveqanngitsutut. Peroriartornerminiilli eqqaamasai amerlanngillat.

Naak meeraalluni nuannaartuugaluarluni, peroriartornerani misigissutsit sakkortuut atuupput, angerlarsimaffiani ilaatigut kamajasoqarpoq — aamma ilaqutariit sakkortuumik aqqusaagaqarnikuupput angajoqqaavisa unammilligassaqalernerannik kinguneqartumik.

Ilaqutariit misiginikuusaanni sakkortunerpaat ilaat tassaavoq meeqqat ilaat atornerlugaasimasut akisussaaffigilernerat. Ilaqutariinni taanna initunikuuvoq.

- Angajoqqaama ajunnginnerpaamik isumassorpaat. Uanga aamma taakkununnga anaanaaranngorpunga, oqarpoq.

Nadja Irena Olesenip meeraanermini ataatani ataqqisorujussuuaa. Arfinilinnik ukioqarluni ataatami qalipaasutut suliffeqarfiani annikitsualunnik suliaqartalerpoq – sivitsunngitsorlu narlorissaasalerlunilu qalipaasalerpoq. Atuarnerminiit nuannarineroqaa.

- Meeqqat atuarfianni ilikkagaqarpallaarneq ajorpunga, oqarpoq.

Nadja Irena Olesen naqinnernik ilisarsisinnaanngilaq, matematikki pikkoriffigivallaanngilaa atuarfimmilu meerarpassuit allat assigalugit qinngasaarneqartarluni. Atuarfiup angerlarsimaffiullu akornanni oqaloqatigiinnerni, arlaat aaqqittariaqartut ilinniartitsisunit qaqinneqartartut eqqaamavaa.

Assani atorlugit suliaqarsinnaanini atuarfimmi nuannarisatuaraa - soorlu sananeq. Taamaammat 16-inik ukioqarluni meeqqat atuarfiat naammassigamiuk Nuummut nuulluni Saviminilerinermik Ilinniarfimmi biililerisunngorniatut aallartippoq.

Inuuneq uppernerlu

Nadja Irena Olesen Jehovap Nalunaajaasuinit upernaaq aninera upperisamiit siullermeerluni aninerunngilaq.

Nuummut ilinniariarluni nuunnermi kingorna ukiumi siullermi taamaalinikuuvoq.

Ukiut marluk sioqqullugit kuisippoq taamaalillunilu Jehovap Nalunaajaasuinut ilanngulluni upperisami najoqqutanut malinnittunngornissani akueraa.

Ullumikkut kingumut qiviaraangami nammineq piumassutsiminik angajoqqaamiluunniit naatsorsuutai naammassiniarlugit kuisinnikuunerluni nalornissutigisarpaa.

- Meeqqat marluk atornerlugaanikut ilaqutariuulluta isumagisarileqqammerpagut, taamaattumik nuannaartitsiniarlunga taamaaliorsimagunarpunga, Nadja Irena Olesen oqarpoq.

Jehovamut Nalunaajaasuniit aneqqammerluni marlunnik meerartaarpoq — 2013-imi ernertaarpoq angummiillu allamik 2017-imi panittaarluni.

Panimmi inunngorneraniit ukioq ataaseq qaangiuttoq, angajoqqaaminut qatanngutiminullu angajullernut ukiuni arfineq-marlunni attaveqanngereerluni, Jehovap Nalunaajaasuinut ilannguteqqippoq. Ukiorli ataaseq qaangiutiinnartoq aneqqilluni.

Nuummi inuunera inuusuttuunermi misigisakkanik imaqarpoq. Soraareernerup kingorna ataasitualaarneq pilersaarutaanngitsumik illoqarfissioriasaarnermik kinguneqarsinnaasoq. Inuuneq ilinniarnerup, suliffiup anaanaanerullu oqimaaqatigiissaarnissaanik imaqartoq.

Inuuneq oqitsuujuaannarneq ajortoq.

Nadja Irena Olesenip ernini qaammatinik tallimanik utoqqaassuseqartoq angutaalu qimakkamik, iniminniit Nicolailu anisitaanerat ilungersunarnikooqaaq.

- Suuteqanngilanga. Nuuttaqattaarujussuartariaqarnikuuvugut, oqaluttuarpoq.

Biililerisunngorniarnerup naammassiniarnera aamma sivisuvoq, ilinniarnermullu atatillugu suliffik unammilligassaqarfiulluni. Nadja Irena Olesen biilileriffinni arnartatuaakkajuppoq, suliffiullu avatangiisiini arnanut nikassaasoqartarpoq sakkortuumillu oqaluttoqarluni.

Inuuneq uivernerlu nammakkuminaallisinnaasarput, taamaammallu arlaleriarluni tunniutiinnariaraluartarsimalluni.

- Taarsuup iluaniippunga, qaqeqqinnikuuvungali. Taamaattoqarsinnaavormi, oqarpoq.

Biilileriffimmi sulinermi atugassarititat ingerlaannaq naammatsiffigai, biililerisutullu allagartartaarnermi kingorna ukiut marluk qaangiuttut suliffini taamaatippaa. Qatserisartunngorniassalluni ilaquttamilu peroriartornermini inuussutissarsiutaannut uteqqinniarluni aalajangerpoq: Qalipaasoq.

- Ulloq siulleq qalipaasutut sulininni angerlartutut misigaanga. Eqqortumik aalajangersimasutut misinnarpoq, oqarpoq.

Inuuneq kiffaanngissuseqarfiusoq

Nadja Irena Olesenip Jehovap Nalunaajaasuiniit anineraniit qaammatit tallimangajaat qaangiupput. Naak nalugaluarlugu siunissami susoqarumaarnersoq  uteqqinnissani takorloorsinnaanngilaa

Ilaatigut maqaasisarpaa — maqaasinerali ajornakusoorpoq.

- Angajora ingammik maqaasivara. Marluugaangatta illartaqaagut pilukassinnaasarlutalu, oqarpoq.

Ilaquttavit upperisaat pissutigalugu ilaquttatit attaveqarfigisinnaajunnaarnikuunerat ilaatigut kamaatigisarpiuk?

- Kiserlioraangama isumaloqqajaassutiginnaasarpara, inatsilli sooq atuunnersut nalunnginnakku ataqqisarpakka, akivoq, nangipporlu:

- Kuisikkamali Jehovanngornissara qinernikuuara, kingornalu aamma aninissara nammineerlunga aalajangernikuullugu.

Aninini ilaquttaminullu maqaasineq akigalugit maanna kiffaanngissuseqarluni inuunererusutani atorpaa. Marluk qitornaqarluni, suliffimminut tunniusimalluni ikinngutinilu upperisaq perussutini pissutigalugu kukkunissani eqqarsaatiginngikkaluarlugu nuannisaaqatigisinnaallugit.

Inuuneq "kukkussuteqarnissamik" inissalik.

- Kukkusaqaanga. Anaanatut aamma. Kukkunngisaannartuunngilanga. Inuit tamarmik taamaapput, oqarpoq.

- Inuuninni kukkunngisaannarsimasuuguma ueqassagaluarpunga, illorujussuaqarlunga, volvot qimmerlu, oqarpoq qungujullunilu.

Nadja Irena Olesen ullaap tungaani uninngallatsiareerluni suliartoqqittussanngulerpoq, qalipaajartoqqilerlunilu. Issiavimmiit nikuippoq.

Aappaagu decembarimi qalipaasutut ilinniarsimasutut imminut taasinnaalissaaq.

- Ukiualunni suleqqaalaarusuppunga, namminersortunngornissarali angorusuppara, oqarpoq.

Torsuusamukartilluni inoorlaat assingi titartakkallu sanioqquppai. Pappiaraq qaqortumik qernertumillu qalipaatilik oqaaseqatigiinnik assigiimmik allannilik akornanni nivingavoq.

Trust the process, allaqqavoq. (Allanngoriartorneq tatigiuk, aaqq).