Nakkutilliisut nalunaarutaat: Ivaaqqami sulisoqarneq aalajaatsuunngilluinnarlunilu taarseraaffiungaatsiarpoq
Ilaqutaasut toqqissisimannginnerat sulisullu amigaataangaarnerat Siumumit ernumagineqartoq Qaqortumi ulloq unnuarlu paaqqinnittarfimmut Ivaaqqamut 2025-mi 15.-16. oktobari nalunaarutigineqanngitsumik misissuisoqarmat uppernarsarneqarpoq.
Assi: Paninnguaq Steenholdt
Ulloq unnuarlu paaqqinnittarfik Ivaaraq isumaginninnermik tunngaviusumik kivitsisuusutut nalilerneqarpoq, aalajaatsuunissarli suliatigullu pitsaassuseq qulakkeerniarlugu iliuusissatut pilersaarusiortoqarnissaa nakkutilliisoqarfimmit piumasarineqarpoq.
Nakkutilliisut ilaquttat ernumassuteqartut saaffiginninnerisa kingunerisaanik 2025-mi ukiakkut siumut nalunaaruteqaratik Ivaaqqamut takuniaapput. Saaffiginnissut najugaqartut atugassarititaannut sulisullu suliaasa pitsaassusaannut tunngavoq.
Paaqqinnittarfik pulaarnerup nalaani utaqqiisaagallartumik pisortaqarpoq. Aalajangersimasumik pisortaqannginnera pissutigalugu siunissaq ungasinnerusoq eqqarsaatigalugu pilersaarutit ingerlalluarnissaannut ilinniartitsinermullu tunngatillugu siunnersortissaqarniarneq aarlerinartoq Nakkutilliisut naliliipput.
Sulisut taarseraannerujussuat toqqissisimajunnaartitsisoq
Paaqqinnittarfik sulisunik aalajangersimasunik tallimanik amigaateqarpoq. Sulisuttaaq taarseraannerat annertuvoq; Immikkoortortami tungujortumi sulisunit 16-iusunit 13-it 2025-mi sulilerput. Immikkoortortami sulisut 80 procentii ukiup ataatsip ingerlanerani nutaanngortarpata, paaqqinnittarfiup „ilisimasat pisortatiguunngikkaluartut“ qanimullu attaveqatigiinneq annaasinnaavaa, taakkulu innarluuteqartut oqalussinnaanngitsit oqariartuutaannik pisariaqartitaannillu paasinninnissamut pisariaqartinneqarput.
Sulisut ukiut tulleriit marluk aalajangersimasumik nakkutilliiffigineqaratillu tarnikkut nakorsanit ikiorneqarneq ajorput, tamannalu siornatigut nakkutilliinermi suli iluarsineqarsimanngilaq.
Ilaqutaasut pisortanik taarsersuisoqaraangat allannguuterujussuaqartarneranik maluginiaasarput. Najugaqartut siornatigornit tapersersorneqarpallaanngitsut isumassorneqarpianngitsullu isumaqarput, aamma aqutsisut najugaqartunut „misigissutsikkut ungasillisimasut“ oqaatigineqarput. Najugaqartuttaaq aalajangersimasunik saaffissaqarnissaminnik amigaateqarput.
Sulisut nuannaarlutik suleqatigiilluartuullutillu sulipput, aammali pisortanut attaveqarnerup ilungersunarnera uppernarsarpaat. Sapaatip-akunnerata naaneranittaaq sulisoqarniarneq ilungersunartuusoq oqaatigaat.
Pisortamik atorfinitsitsinissaq innersuunneqartoq
Nakkutilliisutut piaartumik aalajangersimasumik pisortartaartoqartariaqarlunilu aalajangersimasumik timimik sungiusaasoqalerlunilu pillorissaasoqalertariaqartoq nalilerpaat.
Taamaammat ulloq unnuarlu paaqqinnittarfiup ataavartuunissaq qulakkeerniarlugu najugaqartunut tamanut attaveqarfigineqarsinnaasunik alajangersimasumik toqqaasariaqarput.
Nakkutilliisuttaq sulisut aalajangersimasumik nakkutigineqaqqullugit tarnikkullu nakorsanit ikiorneqartaqqullugit Ivaaqqamut innersuussutigaat.
