Nalunaarusiaq: Sulisussaaleqineq kommuninut tamanut ilungersunarpoq

Sulisussarsiorneq, ingammik peqqinnissaqarfimmi kommunillu suliffeqarfiini, unammillernarpoq. Inuusuttut ilinniarnerminnik unitsitsiinnartartut suli aamma amerlammata, immikkut iliuuseqartoqartariaqartoq naqissuserneqarpoq.

Naalakkersuisut suliffeqarneq pillugu ukiumoortumik nalunaarusiaanni, qanittukkut saqqummersinneqartumi, taamanna atuarneqarsinnaavoq.

Peqqinnissaqarfimmi kommuninilu sulisussarsiornermi ajornartorsiutit, ukiuni arlalinni pisut, nalunaarusiami ilaatigut sammineqarput.

Sivisuumik sulisussaaleqineq kommuninut tamanut tatisisoq, aamma utoqqaat amerligaluttuinnarnerat unammilligassanut annertunerulersitsisoq nalunaarusiami erseqqissarneqarpoq.

- Apeqquserneqarsinnaajunnaareerpoq tamanna, kommunit misilittakkatigut ilisimavaat sulisut aalajangersimasut amerlanerit pissarsiarinissaat ajornakusoortuusoq, tassanilu taartaasartunik atuineq kiisalu atorfininnermi soraarnermilu akissarsiatigut marloqiusamik inissisimanertigut aningaasartuutinik qaffaaqataasimapput., nalunaarusiami allassimavoq.

Peqqinnissaqarfimmi pissutsit assigusut aamma allaaserineqarpoq, tassa sulisussarsiorneq sulisunillu attassiniarneq annertuumik suli unammilligassaapput.

Sulisut taarseraannerujussuat, sivikitsuinnarmik atorfeqartartut amerlasuut kiisalu aalakkaasumik sulisoqarniarneq unammilligassaalluni.

Nakorsat peqqissaasullu Danmarkimi akuersissuteqaqqaartariaaruttut

Aalajangersimasuni siuariartoqarsimanera aamma allaaserineqarpoq, ilaatigut peqqinnissaqarfimmi sulisut Kalaallit Nunaannut tikinnissaat ajornannginnerulernerat.

Peqqinnissaqarfik pillugu septembarimi 2025-mi isumaqatigiissummi atsiorneqartoq atorlugu, nakorsat peqqissaasullu Danmarkimi akuersissuteqaqqaanngikkaluarlutik Kalaallit Nunaanni akuersissummik pissarsisinnaapput.

- Naalakkersuisut neriulluarput, taakkunani suliaqarfinni nunarsuarmit tamaneersunik sulilersitsisarneq pitsaanerulissasoq., nalunaarusiami allassimavoq.

Sulisussaaleqinerup saniatigut inuusuttut ilinniakkaminnik unitsitsiinnartarnerat ajornartorsiutaavoq.

Suliffeqarnermut naalakkersuisoq Maritha Broberg (A) unammilligassat iliuuseqarfiginissaannut susassaqartut qanimut suleqatiginissaat pisariaqartoq oqarpoq:

– Siunissami inuiaqatigiinni suliffeqarnermilu unammillernartut assigiinngitsut suliniuteqarfiit susassaqaqatigiit akornanni suleqatigiinnermik pisariaqartitsipput. Suliffeqarneq, inuussutissarsiortut piginnaasanillu ineriartortitsinerup akornanni suleqatigiinnerup nukittorsarneratigut ineriartortitsinissamut, inuuniarnikkut pitsaasumik atugaqarnissamut suliffeqarnermullu pitsaanerusumik tunngavissaqalersinnaavugut.

– Malitsigisaanik pingaaruteqarpoq kinguaariit tulliuttut suliffeqarnermut piareersimasunngorsarnissaat, tassani innuttaasut katitigaaneranni inuiaqatigiinni allannguutit annertusiartuinnartumik malunnaateqalerumaarmata, suliffeqarnermut naalakkersuisoq Maritha Broberg oqarpoq.