Namminersorlutik Oqartussat naalagaaffiup eqqartuussissuserisua nutaamik isumaqatigiissuteqarfigigaat
Poul Schmithip Namminersorlutik Oqartussat suliffeqarfiutaannut inatsisilerituutut sulinini annertusivaa, tamannalu Nuummi nutaamik allaffeqalernermik kinguneqarpoq.
Poul Schmithip, naalagaaffiup eqqartuussissuserisuata Københavnimi allaffia assimiippoq. Siunissami Nuummi aamma immikkoortortaqalissaaq.
Assi: Christian Lindgren/Ritzau Scanpix
Eqqartuussissuserisut suliffeqarfiat Poul Schmith naalagaaffiup eqqartuussissuserisuatut naalagaaffimmut inatsisitigut siunnersuisartutut ilisimaneqarpoq. Suliffeqarfik ukiuni arlalinni Namminersorlutik Oqartussanik aamma siunnersuisarsimavoq, maannalu isumaqatigiissut nutaaq Poul Schmidtip Kalaallit Nunaanni suliaanik tunngaviliivoq:
– Namminersorlutik Oqartussanik isumaqatigiissuteqarnerput tulluusimaarutigaarput, suleqatigiilluarnerullu ineriartortinnissaa qilanaaraarput, suliffeqarfimmi piginneqataasoq Sune Fugleholm oqarpoq.
Isumaqatigiissummi sinaakkutigineqartut malillugit siullermeerluni Namminersorlutik Oqartussat ingerlatseqatigiiffiillu namminersorlutik oqartussanit pigineqartut tamarmik isumaqatigiissummut ataatsimut katersorneqarput, Poul Schmith ilisimatitsivoq.
– Pitsaanerpaamik sullissisinnaaniassagatta Nuummi allaffeqalerniarluta aalajangerpugut. Taanna Pisortat Illersuisuannik taaguuteqalerpoq.
– Suliassaq tatiginnilluni tunniunneqrtoq pimoorullugulu inuiaqatigiinnut kalaallinut ataqqinningaarluta suliarissvarput, Sune Fugleholm oqarpoq.
Aamma kommuuninut sullissisinnaasoq
Sune Fugleholmip Nuummi allaffittaaq, Issortarfimmi inissisimasoq, tusagassiiviullu Sermitsiap illuutaaniittoq iluaniittoq nammineq akisussaaffigilissavaa.
Poul Schmith Kalaallit Nunaanni Namminersorlutik Oqartussat suliffeqarfiutaannut, aningaasaateqarfiinut ingerlatseqatigiiffiinullu eqqartuussissuserisussatut pingaarnertut sulissaaq.
Poul Schmithip eqqartuussissuserisui naalagaaffiup eqqartuussissuserisuattut 1936-mili taaguuteqarsimapput, inatsisinut tunngasuni naalagaaffimmut siunnersuisarlutillu sinniisuusartut.
Naalagaaffiulli eqqaartuussissuserisoqarfia 2028-mi atorunnaarsinneqassasoq danskit naalakkersuisui qanittukkut aalajangerput. Eqqartuussissuserisut allat taamaalillutik naalagaaffimmut assigiinngitsutigut ikiuussinnaalissapput.
