Namminersorlutik Oqartussat suliffeqarfiutaat pisortartaartoq

Marloriarluni pisortaanerugallarsimavoq, maannalu pisortatigoortumik atorfinitsinneqarpoq. Nalik Venturesimi siulersuisut Peter Christiansen 2025-mi novembarip 14-ianniit pisortaanertut atorfinitsippaat.

Tamanna ingerlatseqatigiiffiup tusagassiutitigut nalunaarutaani allassimavoq.

Siornatigut pisortaasimasoq Thomas ’Tyt’ Mogensen isumaqatigiissuteqarnikkut juulimi tunuarpoq, maannalu taarserlugu atorfinitsitsisoqarpoq.

Peter Christiansen, 2022-miilli ingerlatseqatigiiffimmi aningaasaqarnermut pisortaasimasoq ingerlatseqatigiiffimmi Namminersorlutik Oqartussanit pigineqartumi siulersuisuni siulittaasup Miki Lyngep tatigilluinnarpaa:

- Peter ukiorpaalunni aaqqissugaanitta iluani pingaarutilittut inissisimasuuvoq, tamannalu tunngavigalugu tatigilluinnarparput Nalik Ventures piffimmut aalajangersimasumik aningaasaliinernut ineriartornernullu pitsanngorsaanissamut ingerlariaqqitsitsissasoq. Suliassami piumasaqaataasut aaqqissugaasumik tamakkiisumik isiginnittaaseqarneq najukkamilu atuutitsilersitsisarneq piiginnaasaqarfigai, Miki Lynge oqarpoq.

Ingerlatseqatigiiffik naapertorlugu Peter Christiansen mittarfiit nutaat sananeqareernerisa kingorna suliassanut siuttuussaaq, kapitalillu tulliani ineriartortitsinissamut sinaakkutit pitsanngorsarneqassapput: soorlu umiatsianik angallassisartunut, camp-inut, akunnittarfinnut inuussutissarsiornikkullu tunngavinni tikeraartussat amerliartornerini tigusisussanut:

- Nalik Ventures tapersiinermik taarsigassarsinermillu taamaallaat suliaqarfiussanngilaq, isumassarsianik piviusunngortitsiviussaaq. Isumassarsiat sumiiffimmi aalajangersimasumik allannguiviusinnaasut, inuussutissarsiorfillu periarfissagissaarnerpaaffiani pitsanngorsaaqataalluni, Peter Christiansen oqarpoq

Nalik Ventures Namminersorlutik Oqartussat inuussutissarsiornermik siuarsaanermut ingerlatseqatigiiffigaat, ilaatigut aallarnisaasunut siunnersuisarlunilu taarsigassarsisitsisartoq. Ingerlatseqatigiiffik ilaatigut suliffeqarfinni aalajangersimasuni nalorninartumik kaaviiaartitaqarfiusuni aningaasaliisarpoq