Nanortalik: Ikuallanneq qutsissumut siaruaammat qaminniarnera ajornartorsiutaavoq
Nanortallip eqqaani nuna ikuallattoq marlunngornermi ualikkut paasineqarpoq. Qatserisartut ikuallattoq atsinnerusumiittoq qamissinnaasimavaat, anorsaarneranilli peqquteqartumik inneq qutsinnerusumut aallarpoq, qamikkuminaassillunilu.
Nuna ikuallattoq illoqarfimmit ersareqaaq, unnuaq taarsimmat inneq ersareqisoq assilisami takuneqarsinnaavoq.
Assiliisoq: Bolethe Helbig
Nanortallip akiatungaani Sissarissumi nuna ikuallattoq qaminniarlugu qatserisartut 19-it, kajumissutsiminnillu ikiuuttut aqqaneq-marluk ippassaq ualingaatsiarneraniit unnuaruullugu qatserillutik ulappupput.
Avannerluni sikuntimut 18-it 25-llu akornanni anoraasuartarmat inneq sumut tamaanga siaruaatipiloorsimasoq Nanortalimmi qatserisarfimmi pisortaq Thorvald Madsen oqaluttuarpoq. Anorlerneratalu qatseriniarneq ajornarnerulersippaa.
- Pumpeqarfigisarput sissamiittoq avannertillugu assut mallertarami, slangerlu mallit apparnerani silaannaannanngortarluni. Ilungersualluta qamipparput, Thorvald Madsen oqarpoq.
Ikuallanneq atsinnerusumiittoq qaminneqaraluartoq inneq qummut siaruaattoq suli qaminneqanngilaq, qatserisartullu taama qutsitsigisumiittoq qaminniassappassuk navianarsinnaalluni.
Helikopteri atorneqarataannaavoq
Ikuallanneq qerrualunni 2-300 meterisut qutsitsigisumiilermat qaminniarnerani helikopteri atorneqassanersoq nalilerneqassaaq.
- Illoqarfiup tungaanut aallassappat inunnut navialisitsinissaa nalilersorluaqqissaariarlugu helikopteri attartorniarneqassanersoq paasinarsissaaq, Kommune Kujallermi upalungaarsimanermut pisortaq Asmus Hansen Sermitsiamut oqarpoq.
Nunap ukiup imaalinerani ikuallattarnera qaqutigoortoq Nanortalimmi qatserisarfimmi pisortap Thorvald Madsenip oqaluttuaraa. Sumili tamani aputeqarasaaraluartoq nuna paneqisoq aamma ilanngullugu oqaatigaa.
- Suna ikuallannermik aallartitsisimanersoq iluamik akisinnaanngilara. Imaassinnaasoq igalaaminernit aallartissimasoq, qanga sodavandit igalaaminikuinit. Kisianni erseqqissumik akisinnaanngilara, Thorvald Madsen oqarpoq.
Ikuallanneq Sissarissumi ippassaq ualikkut aallartikkami pujuliungaatsiarpoq.
Assiliisoq: Laurethe Frederiksen Abelsen
Namminneq kajumissutsiminnik ikiuuttut qutsavigai
Qatserisartut 19-iusut ikuallanneq taama annertutigimmat ikiorneqartariaqalermata namminneq kajumissutsiminnik ikiuuttussat pisariaqartinneqalerput. Maannamut namminneq kajumissutsiminnik ikiuuttut aqqaneq-marluk qatserinermi ikiuupput.
- Namminneq kajumissutsiminnik ikiuuttut qujanakulooqaat. Assut qujaffigerusuppakka, Thorvald Madsen oqarpoq.
Kajumissutsiminnik ikiuuttut saniatigut pisiniarfiit qatserisartut sutugassaannik pajuttut aamma qutsavigiumavai.
- Ajaaja Kiosk Nanortalimmilu Brugseni piumaffigineqannguaratik namminneq tunniussiartorput. Tuppallernaqaaq, Thorvald Madsen oqarpoq.
Inneq maanna innamut siaruaassimammat qatserisartut namminnerlu kajumissutsiminnik qatserisut angusinnaanngilaat. Taamaammat namminneq kajumissutsiminnik ikiuuttunik pisariaqartitsinngikkallarlutik taassuma ilanngullugu oqaatigaa.
