Nanortalimmi pasinartumik toqusoqarsimaneranik politiit misissuisut

Nanortalimmi najugaqarfiit ilaanni inuk toqungasoq nassaarineqartoq, Kalaallit Nunaanni Politiit sisamanngornermi unnukkut nalunaaqutaq 21.31 nalunaarfigineqarsimapput.

Angut 37-nik ukiulik pineqarpoq, politiillu pasinartumik toqusoqarsimaneratut misissuiffigaat.

Taamatut tusagassiutitigut Kalaallit Nunaanni Politiit nalunaaruteqarput.

Politiit suli illoqarfimmiipput suliarlu misissorlugu.

- Nanortalimmi najugaqarfimmi pasinartumik toqusoqarsimaneranik maannakkut misissuivugut. Sumiiffimmi suliaqarnitsinni ajoqusersorneqannginnissaq kissaatigaarput, allanillu maannakkorpiaq paasissutissaateqanngilagut, vicepolitiinspektør Malik Sandgreen oqarpoq.

Angutip 37-nik ukiullip ilaqutai ilisimatinneqareerput.

Paasissutissanik suliamut attuumassuteqarsinnaasunik peqaruit Kalaallit Nunaanni Politiit kajumissaarpaatsit politiit pigaartuisa oqarasuaataannut 701448-mut imaluunniit Nanortalimmi politeeqarfimmut saaffiginneqqullugit.