Nanortalimmiu Julius imerunnaarnikuuvoq: Imerajuttut imigassamik matusineq qaatussutigiunnanngilaat   

Piffissaq 1998-imut utertissavarput.

Julius Adolfsenip imigassamik ikiaroornartumillu atornerluinera taamani ukiaagaa ajornerpaaffimminiileruttorpoq.

Imigassartorfiusumi nakuuserfiusumilu peroriartorami imersimatilluni kamassaqarujussuartarpoq - allaat nuliani nakuuserfigisarlugu. Nuliarisimasaata naammatsilluinnarami ukiuni arlaqalersuni qimanniartareerlugu qimappaa.

- Nuliarinikuusannit qimataaneq oqartarpunga misigisartakkanni sakkortuut ilagigaat. Asasaq toqukkut qimagukkaangat tassa toqusarpoq. Kisiannili qimagaalluni asasamik suli sakkortunerusutut ippoq. Illoqarfeqatigivara takusinnaallugulu, kisianni oqaloqatigisinnaanagu, Julius Adolfsen oqaluttuarpoq. 

Tassani inissisimaleruttorluni allamik aamma sakkortuumik aqqusaagaqarapoq. Pissaqartilluni imertuartarami umiarasualivimmi suliffimmini sulinngitsoortarpoq.  

Juliusip Nanortalimmi umiarsualivimmi suliffiata naammagilerpaa naggataanilu soraarsillugu. 

- Tujorminaqaaq nuanniillunilu. Imminut naleqarpianngittutut isigilernaqaaq, soorlu: "Tamaani suinnartungaana?"-mik apereqqajaanarluni. Nuliama qimariaraminga suliffinnit soraarsitaariarama, akiligassanullu malinnaasinnaajunnaarlunga. 

Ima imerajutsigilersimagami allat qanigisani attavigiunnaarsimagamigit saaffissaasuaqaaq. Inoorusukkunnaaqqavoq, panituanili taamani 16-inik ukioqartoq eqqarsaatigiualerpaa, sunaaffami inuunerlunnermini aniguinissaminut iluaqutigilluassallugu. 

Atornerluisuunerminit qanoq aniguisimanera kingusinnerusukkut tikissavarput. 

Imerajuttut nassaarsiortuartarput 

Julius ukiut 25-t sinnerlugit atornerluisuunikuugami, imigassamik atornerluisut Kommune Kujallermi matoqqatitsisoqarnerani qanoq inneri takorloorluarsinnaavaa. Namminermi aamma imigassamik matoqqatitsineq taamani nalaannikuuaa.

- Matoqqanera taanna pikkunaalliornaqaaq, imigassamik pisiniarsinnaajunnaarpugut, Julius Adolfsen oqaluttuarpoq.  

1990-imi ukiortaami pisoq eqqaamalluarpaa. Taamani Narsami inunnik arfineq-marlunnik toqutsisoqarnerata kingorna kujataani imigassaq matoqqatinneqarpoq. Juliusimut piffissaq pikkunaaqisoq.

- Immiorneq atugarilerparput, tassami immaqa uangaannaanngitsoq. Matusisoqanngikkaluartorluunniimmi immiorneq taamani atugaraara silara aallartikkusukkakku. Imigassamik taamani pinngitsuuisinnaajunnaartutut imminut nalilersinnaavunga. Silamik aallaataasinnaasunik ujartuineq pilertarpoq. Taamatut uanga inissisimanikuuvunga. 

Imigassamik matoqqatitsineq imigassamik ajornartorsiuteqanngitsunut iluaqutaassasoq qularinngilaa. 

- Tassami allanut iluaqutaassooq, soorlu aamma uanga massakkut matusisoqarnerani iluarusuppunga. Taamanikkut imigassamik atuisuunerma nalaani matusisoqarmat uannut allakuluuvoq, imigassamik pisiniarsinnaannginnerup pigisaanik uannut inuttut nipaarluunartutut oqaatigigaanni iluarnerussooq, Julius oqaluttuarpoq. 

Qanoq iliornikkut ilorraap tungaanut saattoqarsinnaagami? 

Matoqqatitsinerli allanik suliniuteqarnikkut ilaleraanni ilorraap tungaanut saakkiartortoqarsinnaanera qularinngilaa.

- Matusiinnarneq annerusumik susoqanngippat, oqallittoqanngippat, annerusumik iluaqutaassuseqanngilaq. Anguniagaqartoqanngippat arlaatigut, Julius Adolfsen oqaluttuarpoq. 

Suliniutit soorlu suusinnaagamik?

- Assersuuteqassaguma meeqqaninngaanniit inuusuttunut, aammami inersimasunut susassaqartitsineq. Soorlu siornatigut atorluarneqartarpunga, imerajuttuunikuuninnut ikiaroorajuttuunikuuninnullu. Tamakkua atorluarneqartariaqarnissaat kissaatiginarsigami.   

- Imigassamik ikiaroornartumillu atuiunnaarnikuullunga imigassamik ajornartorsiuteqarnermut akiuiniarnermi ikiuukkusoqaanga. Nalunnginnakku atugaralugit inuunermut qanoq aserorsaataatigisut. Kommunip imaluunniit pisortat kisimik nammassinnaannginnamikku taama ajornartorsiut angitigisoq, taanna oqarpoq.

Sapaatip-akunnera 18, imigassartornaveersaarfittut siuliatigut ilisimaneqartoq, aamma assersuutigaa. 

- Taanna ukioq naallugu atorneqartuuppat soorlu kommunit namminneq aalajangissavaat qanoq akuttutigisunik (innuttaasunik aaqq.) naapitsisinnaaneq, qaammammut imaluunniit qaammat allortarlugu, imaluunniit qaammatit pingasukkaarlugu. Tamakkua anguneqartuuppata pimoorussiartuaarnissaq angujartuaarneqarnissaa naatsorsuutigisinnaavara, Julius Adolfsen oqarpoq. 

Naqqanninneq 

Imigassamik atornerluisut atornerluisuunerminnit aniguerusulernissaannut peqqutaasut sorpassuusinnaasut taassuma tikkuarpaa.

Namminerli atornerluisuunermit aniguerusulernera uterfigeqqilaassagutsigu suut tamarmik ajorluinnartumut pisimanerannik peqquteqarpoq. 

Nuliani suliffinilu annaareerlugit, taakkulu saniatigut akiligassarpassuaqalereerluni taamani naqqannissimanini eqqaamalluarpaa.

- Taamanikkut nakkarnerpaaffinniillunga inoorusukkunnaarama. Inuuneq uannut imaarukkami. Naleeruttutut illunga. Ajornartorsiutit amerlangaarmata uanni, taava inoorusukkunnaarlunga. Tassami, sivisuumik taanna pigivara. Inoorusukkunnaarneq, toqorusuinnalerneq.  

Qanigisani allat iluamik attaveqarfiginnginnamigit panini, taamani 16-inik ukioqartoq, ajornerpaaffimmiinnermini eqqarsaatigiuartalerpaa. 

- Paniga taamani naalliunnartorujussuarmik misigitereerlugu peerutissaguma suli naalliuutaata annertunerulernissaa eqqaarsaatigilerpara. Misigissutsikkut tarnikkullu ikilersornikuuara. Ataataartugaarussooq, ataatamik uannut oqarsinnaajunnaarluni. Tamakkua eqqarsaatit tikittalerakkit katsorsartinnissannut qanilliartuaalerpunga.  

Pimoorullugu aniguerusulerneq 

Siullermik 1998 naalersoq ilaqutariinnut katsorsaasoqarnerani katsorsartippoq, tassanilu imigassamik ikiaroornartumillu atornerluisuunini nassuerutigaa.

1999 aallartisimariitsiartoq Qaqiffimmi katsorsartilluni aallartippoq, januaarillu 15-iani 1999-imi kingullermeerluni imigassamik imerpoq. 

- Peqqissimissutiginngisaannarpara katsorsartinnikuunera. Akerlianik qujamasuttaqaanga pilluartaqaanga katsorsartikkama. Aamma erligeqaara inuuneq imigassartaqanngitsoq ikiaroornartortaqanngitsoq. Akiuukkusoqaanga suli, nalunnginnakku akiuukkunnaaruma sumut pisussaassallunga, Julius oqaluttuarpoq. 

Pania taamani anaanamini najugaqarpoq, panini, atornerlueruttulernermi nalaani misiginerlutsissimasaqisani katsorsartereernermini najugaqatigilerpaa.

- Uannut nuuppoq, arnaata soorunami akuerinngikaluarpaa, nalunnginnamiuk qanoq ittuusunga. Nukittoqqutigeqaara uannut nuukkumanera aammalu nuunnera. 

Julius maanna 90-ikkunni inuunerminut sanilliullugu allarluinnarmik inuuneqarpoq. Ukiut 18-it matuma siorna allamik aappartaarsimavoq pilluarluni najukkaminik.

Pingasunik ernutaqarpoq ataatsimillu ernutaqqiuteqarluni. Kinguaanilu inuunertik allamik taarserusunngilluinnarpaa.

- Nukittoqqutigeqaakka tamakkua tamaasa, ullumikkut taakkua inissisimatippaannga, asanninnermik toqqissisimanermillu peqarfigigakkit, Julius taama naggasiivoq.