Napãtôk’ Gabrielsenimut: Mianersorit

Avannaata Kommuniani borgmesteri, Lars Erik Gabrielsen (S), Qaanaap eqqaani nunaqarfinni, Qeqertani Siorapalummilu, containerinik sannavinnik umiatsialeriffiutigisunik pisiniarnermi, allaffissornikkut isumaqatigiinniarsimanera kommunimi politikkikkut suleqataata qaninnerpaap, tassa borgmesterip tulliata siulliup, Jens Napãtûp, ippigaa.

- Ikiuisimanerminut oqaasertaliinera ippinnartoqarsinnaasoq paasivara, Jens Napãtôk’ Sermitsiamut oqarpoq.

Kommunimi borgmesterip ikiuunnini borgmesteritut "sulinermi avataatigut" tassa "borgmesterituunngitsoq" ikiuunnerusoq Sermitsiamut sapaatit akunnerata siuliani oqaatigaa.

- Borgmesterituunngitsoruna nammineq soqutigisorujussuuginga. Suliap sukkasuumik ingerlannissaa pillugu nammineq containerinnguanik sannavinnik umiatsialeriffiusinnaasunik siunnersuusiortitsinikuuvunga. Sananeqartussanngorput, Lars Erik Gabrielsen, Sermitsiamut sapaatit akunnerisa siulianni oqarpoq.

AAMMA ATUARUK:

Borgmesteri: Borgmesterituunngitsoq kiffartuussigama

Taassuma suliffeqarfik Danmarkimiittoq, containeriliortartoq, DC Supply A/S, ilutsit akillu pillugit isumaqatigiinniarfigalugu allaffissorluni attaveqatigisarsimavaa. 

"Borgmesterituunngitsutulli" oqarnera tunuliaqutaaqataasup isumaqatiginngilaa. 

- Borgmesteriujuaannarpoq ulloq unnuarlu. Taanna oqaaseq eqqumiilaarpoq atugaa.

- Killinganiippoq, taama oqarnera borgmesteriunani. Ulloq unnuarlu borgmesteriugami, Jens Napãtôk’ oqarpoq.

Suliaq ippinnartoqartinngikkaa

Jens Napãtôk’ ilisimatitsivoq Sermitsiap sapaatit akunnerisa siuliani Lars Erik Gabrielsen pillugu allaaserisaqareernerata kingorna avannaani politikkikkut pissaaneqarnerpaat marluk oqaloqatigiissimasut.

Jens Napãtûp oqaloqatigiinnerminni Lars Erik Gabrielsenimit nassuiaanneqarami suliaq pissusissamisut suliaasutut nalilerpaa, naak borgmesteri containeriliorfimmut, containerit isikkussaanik allaffissorluni, politikkikkuunngitsoq, ilaatigut isumaqatigiinniaraluartoq. 

- Ikiuiumatunera takuara-aasiit, taamaammat paasissutissat uannut tunniunneqartut toqqammavigalugit suliaq ippinnartoqartinngilara, Jens Napãtôk’ oqarpoq.

Taava imaappa borgmesterip allaffissornikkut suliaqarsinnaanera aamma akuersaarissi?

- Naamerluinnaq, aamma taamaaliorsimanngilaq, nalunngisaqarami attaveqaateqarami.

Containerit aningaasaateqarfiup Thulefondip akilissagai, siulittaasoq, Jens Danielsen, Sermitsiamut siusinnerusukkut aamma oqarpoq. Borgmesterilu suliaqarnermini aningaasannassanngitsoq taassuma aamma erseqqissaatigaa. 

- Naamik. Taamannak eqqarsaateqanngilagut, Jens Danielsen oqarpoq.

Inatsit ilisimatusartorlu

Kommunit aqunneqarnerat pillugu Inatsisartut inatsisaanni allassimasoq naapertorlugu borgmesteri qinigaaffik tamaat atuuttarpoq. Tassa imaappoq borgmesteri angerlaruni imaluunniit allaffini qimakkuniuk borgmesteritut atuuffeerutiinnarsinnaanngilaq.

Tamannalu aamma Ilisimatusarfimmi ingerlatsineq pillugu ilisimatusartup oqaatigaa.

- Politikkikkut tatigineqarluni atuuffeqarneq, tassa “innuttaasunut sinniisuuneq”, atuuffimmit ulluinnarni immikkut sulinngiffeqarfigineqarsinnaanngillat, Najaaraq Demant-Poort Sermitsiamut sapaatit akunnerisa siulianni oqarpoq.

Mianersoqqusisoq

Jens Napãtûp Lars Erik Gabrielsen, ulloq unnuarlu borgmesteritut atuuffeqarmat mianersornerusarnissaanik kaammattorpaa.

- Allaffitsinni sulinngikkaluaruttaluunniit qinikkatut mianersortumik pissusilersortussaavugut. Taanna siunnersuutigaara inuttaanut, taanna oqarpoq.

Sermitsiap mianersoqquneqartoq, tassa borgmesteri Lars Erik Gabrielsen, mianersornerulissanersoq pillugu attaveqarfigaa. Allaaserisalli suliarineqarnerani akissuteqanngilaq.

Naalakkersuisut borgmesterillu iliuusaat assigiitsinngikkai

Naleqqap, aamma Jens Napãtûp, Naalakkersuisunut ilaasortaasimasoq, maanna Folketingmut ilaasortaq, Naaja H. Nathanielsen (IA) aamma Peqqissutsimut Inunnullu Innarluutilinnut Naalakkersuisoq, Anna Wangenheim (D), Folketingemut, ukioq qineqqusaarmata sakkortuumik isorai. Naalakkersuisummi borgmesterillu ulloq unnuarlu atuuffeqartut isornartorsiutaannut ilaavoq. Naalakkersuisulli qineqqusaarnerat borgmesterillu allaffissornikkut isumaqatigiinniarnera imminnut sanillersuunneqarsinnaanngitsutut isigineqarput.

- Assigiinngitsorujussuupput. Borgmesterip saaffiginninnera piffissami sivikinnerusumi attaveqaatinut saaffiginninneruvoq. Kisianni Naalakkersuisut taakkua sassartut Naalakkersuisutut suliutigalutik ullorpassuarni qineqqusaarput, Jens Napãtôk’ oqarpoq.