Narsami aasaanerani tammaarsimaarneq siulleq ukiorpassuarni suliniummut aallarniutaassasoq

Kalaallit Meerartaat aasaq manna siullermeerluni Narsami tammaarsimaartitsissaaq.

Tamanna Kommune Kujalliup Narsamiullu suleqatigiilernerannut aamma aallarniutaavoq.

Kalaallit Meerartaat taama tusagassiutinut nalunaaruteqarpoq.

- Aasaanerani sammisaqartitsisarnerit ukiuni kingullerni sumiiffinni assigiinngitsuni innuttaasut suleqatigilluarumallugit ukkatarisimavagut. Aasaanerani sammisaqartitsinerit suleqatigiinnissamut aallaqqaasiutigissallugit tulluarput, piffissaq ungasinnerusoq eqqarsaatigalugu Narsamiunut ataavartumik pitsaasumillu sunniuteqarluaqqullugit, allattoqarfimmi pisortaq Evi Kreutzmann oqarpoq.

Ikioqatigiinneq pineqarpoq. Illoqarfimmi meeqqat ilaqutariillu inuunerannik pitsaanerulersitsiniarluni innuttaasut piffissami sivisuumi suliniutaannik tapersersuineq.

- Narsami namminneq kajumissutsimik suliaqartarneq ukiorpassuarni ingerlalluartorujussuusuaannarnikuuvoq. Taamaakkaluartorli suli ataatsimoorfiusinnaasut amerlanerit atorfissaqartinneqarput, pingaartumillu Narsami meeqqanut inuusuttunullu suliniutaasunut tapertaanitsigut, suliniutit ineriartortinneqarnissaannut meeqqanut ilaqutariinnullu amerlanerusunut atugarissaarnerulernissaannut pitsanngorsaaqataasinnaalluta, Evi Kreutzmann oqarpoq.

Kalaallit Meerartaat Aasivimmut peqataassasoq

Aasaanerani sammisaqartitsinermi meeqqat inuusuttullu sammisassanut assigiitsunut peqataasinnaapput. Ukioq manna allaanerussutigissavaa Kalaallit Meerartaat peqatigiiffik Aasivillu, ukioq manna ukiuni 50-inngortorsiorluni nalliuttorsiorniartoq Narsamilu aasaanerani sammisassaqartitsinerup nalaani Aasivitsitsiniartoq, suleqatigineqassammat.

- Aasivitsitsisussat peqatigalugit sammisassaqartitseqataanissarput qilanaarnaqaaq, Narsarmiut meerartaannut inuusuttaannullu nuannissaqaaq, Evi Kreutzmann oqarpoq

Kalaallit Meerataat Narsami Qeqertarsuarmilu ataatsikkut piffissami juulip 9-aniit 22-anut aasaanerani sammisaqartitsissaaq. Kullorsuarmi immikkut ittumik workcampeqassaaq. Tamaani ilaqutariit meerartallit illuisa qalipanneqarnissaannik qalissialersorneqarnissaannillu innuttaasut suliniutaat tapersersorneqassaaq. Suliniut innuttaasut kissaataat malillugu piviusunngortinniarneqarpoq.