Nerisassanik pilersuisut suliumajunnaarnerat pissutigalugu Air Greenaland eqqorneqartoq

Air Greenlandip timmisartuanut tallimanngornermi Nuummiit, Københavnimut ilaasut nerisassanik sassaalliiffigineqassanngillat. Ilaasullu ilisimatinneqarput ullormut timmisartumi nerisassaqaranilu imeruersaateqassanngitsoq.

Air Greenlandip nerisassanik pilersuisuini sulisut isumaqatigiinnginnerat pissutaalluni taama pisoqartoq, Air Greenlandip piujuartitsinermut attaveqaqatigiinnermullu pisortaa Inga Dóra G. Markussen Sermitsiamut oqarpoq.

- Suliumajunnaartut suliumajunnaarnertik pissutigalugu timmisartumi nerisassanik imeruersaatinillu sassaalliisoqarsinnaananilu akitsuuteqanngitsunik tuniniaasoqarsinnaanngilaq. Nalunaarfigineqarpugut suliumajunnaarneq suli maannamut atuutissasoq, taamaattumik timmisartumut ilaasut, timmisartumi nalinginnaasumik sassaalliisoqarnissaa aqagu naatsorsuutiginngilaat, Inga Dóra G. Markussen oqarpoq.

Taanna oqarpoq Air Greenland digitalimik nerisassanut akiliummik (voucher) ilaasussat oqarasuaataata normuannut inniminniinermi allassimasumut aqagu nassiussisoqassasoq.

– Voucher Københavnip Nuummilu mittarfiini kiisalu Nuummi neriniartarfinni aalajangersimasuni atorneqarsinnaavoq. Ilaasut eqqaamasariaqarpaat imerpalasunik isumannaallisaanermi misissuisarfimmut nassarnaveersaassallutik, Inga Dóra G. Markussen ilisimatitsivoq.

Air Greenlandip pissutsit qanimut malinnaavigai, neriuutigalugulu aaqqiagiinnginneq piaarnerpaamik aaqqinneqarumaartoq erseqqissarpaa.