PEQQINNISSAQARFIK

Nikittaallutik sulisussat siulliit Nuummukartut

Dronning Ingridip Napparsimavia Nuummiittoq oktobarip aallaqqaataani sygeplejerskinik siullermik Kalaallit Nunaata Danmarkillu akornanni nikittaalluni sulinermik aaqqissuussinermut atatillugu suliartortunik tikilluaqqusisinnaalissaaq.

Nikittaallutik sulisunut aaqqissuussineq Kalaallit Nunaanni peqqinnissaqarfimmi aalaakkaanerusumik ataavarnerusumillu inuttaqarnissaq anguniarlugu isumaqatigiissutaavoq.

Assi: Oscar Scott Carl

Thomas Munk Veirum Thomas Munk Veirum Tusagassiortoq

Saqqummersinneqarpoq 17. Septembari 2026 - 09:31

Ussassaarut

Nikittaalluni sulinermik aaqqissuussinertut taaneqartumi isumaqatigiissutip siulliup isumaqatigiissutigineqarnera, Kalaallit Nunaanni Peqqinnissaqarfiup ilisimatitsissutigaa. Nikittaalluni sulisarnermi peqqinnissaqarfimmi sulisussaaleqinerup ikiorsiivigineqarnissaa siunertaavoq.

Isumaqatigiissut siulleq Odense Universitethospitalimi Kirugisk Afdeling A-p Nuummilu Dronning Ingridip Napparsimaviani pilattaanermut immikkoortup K2-p akornanni isumaqatigiissutaavoq.

Isumaqatigiissutip siunissami prankym-kirurgiske sygeplejersit Odensimi immikkoortumi atorfeqartut pingasut Nuummi Dronning Ingridip Napparsimaviani ukioq kaajallallugu atorfimmik nikittaallutik matussusiinissaat kinguneraa.

Sygeplejerski siulleq OUH-meersoq immikkoortumi oktobarip aallaqqaataani aallartilluni qaammatini tallimani tassani sulineratigut, aaqqissuussineq ingerlanneqassaaq. Tulliatalu taarsissavaa, qaammatinilu pingasuni tassaniissalluni, atorfinitsitsinerlu kingulleq qaammatinik sisamanik sivisussuseqartussatut pilersaarutaavoq.

Peqqissutsimut inunnullu innarluutilinnut naalakkersuisup, Anna Wangenheimip (D) isumaqatigiissuteqarneq nuannaarutigaa:

Ussassaarut

– Kalaallit Nunaanni Peqqinnissaqarfiup Danmarkimilu napparsimaviit akornanni nalituumik suleqatigiittoqareerpoq, suleqatigiissutigineqartullu maanna annertusineqarnerat takullugu nuannerpoq, taanna oqarpoq.

Kalaallit Nunaanni Peqqinnissaqarfimmi aningaasaqarnermut direktøri Pierre Vassard malillugu OU-mik isumaqatigiissut pitsaalluinnartuuvoq:

– Pilattaasarnermik immikkoortut marluk akornanni isumaqatigiissutip, aaqqiissutinik ataavartunik aalaakkaasunillu, nikittaalluni sulisarnermik aaqqissuussinermi kissaatigineqartunik, pilersitsineq ajornanngitsoq, peqatigisaanillu Kalaallit Nunaanni Danmarkimilu immikkoortut akornanni suliatigut suleqatigiinnermik, ilisimasanik avitseqatigiinnermik kiisalu piginnaasanillu ineriartortitsisoqarsinnaanera takutippaa, tamannalu nikittaalluni sulisoqarnermi siunertarineqartunut ilaavoq, aningaasaqarnermut pisortaq oqarpoq.

Piffissami aggersumi nikittaalluni sulisoqarnissamik isumaqatigiissutit amerlanerit isumaqatigiissutigineqarnissaat, peqqinnissaqarfiup ilimagaa.